მაჩვენებელი, რომელიც გამოქვეყნდა აჩვენებს, რომ გაუმჯობესებულია ის შედეგები რაც ამ პერიოდში გამოწვევების ფონზეც შეიძლება იყოს, - ამის შესახებ საქართველოს ტურიზმის ასოციაციის ხელმძღვანელმა ნატა კვაჭანტირაძემ განაცხადა, რომელმაც 2025 წლის 6 თვის ტურიზმის სტატისტიკა შეაფასა. 

გამოქვეყნებული მაჩვენებლების თანახმად, 2025 წლის იანვარ-ივნისში ( I-II კვარტალი) საქართველოში ტურისტული ვიზიტების რეკორდული მაჩვენებელი დაფიქსირდა და ისტორიულ მაქსიმუმს, 2.3 მილიონ ვიზიტს მიაღწია. საერთაშორისო მოგზაურის ვიზიტების რაოდენობამ კი 3.2 მილიონი შეადგინა.

იგივე საანგარიშო პერიოდში, 2024 წელთან შედარებით, საერთაშორისო მოგზაურების რაოდენობა 4.4%-ით, საერთაშორისო ვიზიტორების 4.6%-ით, ხოლო საერთაშორისო ტურისტების 6.9%-ით გაიზარდა.

„ჯერ სეზონი არ დასრულებულა და სტატისტიკური მონაცემები, რომელიც გამოქვეყნდა იძლევა იმის აღქმას რომ ჯერ კიდევ რაოდენობრივ ჭრილში არ გაქვს ის სურათი რაც შეიძლება იყოს ზაფხულის სეზონისთვის. თუმცა მაჩვენებელი, რომელიც გამოქვეყნდა აჩვენებს, რომ გაუმჯობესებულია ის შედეგები რაც ამ პერიოდში გამოწვევების ფონზეც შეიძლება იყოს. ზაფხულის პერიოდი ჯერ კიდევ წინ არის და კერძო სექტორი ყველაფერს აკეთებს იმისთვის, რომ რაც შეიძლება მეტი სტუმარი შემოიყვანოს ჩვენს ქვეყანაში. იქიდან გამომდინარე, რომ ის დანახარჯები, რომელიც სექტორმა გაწია წლის დასაწყისიდან სხვადასხვა საერთაშორისო გამოფენებში იყოს გამართლებული და ეს გამართლება აისახოს ტურისტების რაოდენობაზე.

ასოციაციის წევრების მოკვლევის საფუძველზე არის იმის დაფიქსირების საშუალება, რომ ასოციაციის წევრები აქტიურად მუშაობენ საერთაშორისო პარტნიორებთან, როგორც ევროპის, ისე აზიის მიმართულებით. რაც შეეხება კომპანიებს, რომელიც აქცენტს უშუალოდ ევროპის მიმართულებაზე აკეთებენ ჯერ კიდევ უწევთ აქტიური მუშაობა იმისთვის, რომ ქვეყანა როგორც მნიშვნელოვანი დანიშნულების ადგილი კიდევ იყოს მათი თვალსაწიერის არეალში. ამისათვის ძალიან ბევრს შრომობს ზოგადად ტურისტული კომპანიები. რაც შეეხება აზიის ქვეყნებს, ეს მიმართულება ისედაც გააქტიურებულია ამ პერიოდის განმავლობაში, რასაც პირდაპირი ავიამიმოსვლები უწყობს ხელს. თუმცა ევროპის მიმართულებები, საიდანაც პირდაპირი ავიამიმართულებებიც ფიქსირდება, გაცილებით მეტი სტუმარი შემოდის ქვეყანაში. ამას ტურისტული კომპანიები ცალსახად აღნიშნავენ. თუმცა ეს არ არის ის მაჩვენებელი, რაც ამ პერიოდისთვის კმაყოფილების შეგრძნებას გვიტოვებდეს. პირიქით, ახლა არის უფრო მეტად გააქტიურების დრო. კიდევ უფრო მეტ გამოფენებში უნდა მივიღოთ მონაწილეობა, კიდევ უფრო მეტად უნდა გავააქტიუროთ მარკეტინგული აქტივობები. როგორც ვიცი ჩრდილო ევროპის ქვეყნებში დაგეგმილია აქტიური მარკეტინგული კამპანიები, რადგანაც მარკეტინგული კამპანიები ნიშნავს, რომ კიდევ უფრო გავზარდოთ ცნობიერება და ცნობადობა საქართველოს მისამართით, როგორც საქართველო - სამოგზაურო ადგილი, უსაფრთხო და საინტერესო ქვეყანა, როგორც თავისი ავთენტურობით, კულტურით, გასტრონომიით. თავისთავად ამაზე აქცენტირება ბევრ ქვეყანაში უნდა გაკეთდეს, რათა ჩვენ ქვეყანა ტურისტულად ვიყოთ წარმატებული, არამხოლოდ სეზონზე, არამედ მთელი წლის განმავლობაში“, - აღნიშნა ნატა კვაჭანტირაძემ.

მან არსებულ გამოწვევებზეც ისაუბრა, რაც ტურიზმზეც პოვებს ასახვას. 

„ყოველ წელს მოჰყვება გამოწვევები, როგორც ქვეყნის შიგნით, ისე გლობალური მასშტაბით. შესაბამისად ტურიზმი არის ის მიმართულება, რომელზედაც ძალიან მყისიერად მოქმედებს ნებისმიერი გამოწვევა და თავისთავად ის ფაქტი, რომ რეგიონის ჭრილში საომარი მოქმედებებია ესეც აისახება ტურიზმის განვითარებაზე“, - აღნიშნა კვაჭანტირაძემ.