ტურიზმის ეროვნული ადმინისტრაციის ხელმძღვანელი მაია ომიაძე მიიჩნევს, რომ ტურიზმის სექტორი ცოცხალი ორგანიზმია, რის გამოც გეგმები კვარტლურად გადახედვასა და საჭიროების შემთხვევაში კორექტირებას ექვემდებარება. მისი თქმით, გლობალური მოვლენების ფონზე საქართველო აგრძელებს ბაზრების დივერსიფიკაციას, ტრადიციულ ბაზრებზე აქტიურ მარკეტინგულ კამპანიებსა და ახალი ქვეყნების ათვისებას, რაც მოიცავს როგორც საერთაშორისო გამოფენებს, ისე ზაფხული-შემოდგომის სეზონებისთვის დაგეგმილ აქტივობებს.

„ვინაიდან ტურიზმი თავისი ბუნებით ძალიან ცოცხალი ორგანიზმია, ჩვენ მუდმივად ვაკვირდებით დასახული გეგმების შესრულებას. კვარტალური მონაცემების - იქნება ეს შემოსავლების სტატისტიკა თუ ვიზიტორების რაოდენობა - ანალიზის საფუძველზე, საჭიროებისამებრ, ჩვენს სამოქმედო გეგმაში გარკვეული კორექტივები შეგვაქვს.

მიმდინარე მსოფლიო მოვლენები გვიბიძგებს, გარკვეულწილად გადავხედოთ ჩვენს გეგმებს. თუმცა, უცვლელი რჩება ჩვენი მთავარი ხედვა - ბაზრების დივერსიფიკაცია და ტრადიციულ ბაზრებზე აქტიური მარკეტინგული კამპანიების წარმოება.

ჩვენ საკმაოდ ინტენსიური აქტივობები გვაქვს დაგეგმილი ზაფხულისა და შემოდგომის სეზონებისთვის, პარალელურად კი უკვე აქტიურად ვემზადებით ზამთრის სეზონისთვის.

ჩვენს დღის წესრიგშია ახალი მიმართულებები, ახალი ქვეყნები და ახალი გამოფენები. სულ მალე, მაისის ბოლოს, საქართველო შანხაიში, ITB China-ზე, პარტნიორი ქვეყნის სტატუსით წარსდგება. დარწმუნებული ვარ, ჩვენი ქვეყანა ეროვნული სტენდით ღირსეულ პრეზენტაციას გამართავს.

ამ მნიშვნელოვან ღონისძიებაში ბიზნესსექტორი ჩვენთან ერთად მიიღებს მონაწილეობას. საკმაოდ ინტენსიური და დატვირთული სამუშაო დღეები გველოდება. ვფიქრობთ, ჩინური მხარეც არანაკლები ინტერესით ელოდება ამ დღეს“, - აღნიშნა მაია ომიაძემ.

მისი განცხადებით, ერთ-ერთი მნიშვნელოვანი მიმართულება საერთაშორისო მასშტაბის პროექტებია, მათ შორის საქართველოს შესახებ ცნობადობის ამაღლება მსოფლიოს წამყვან მედია გამოცემებში, როგორიცაა The New York Times, Financial Times, Condé Nast Traveller და Vogue, სადაც ქვეყანა ყოველწლიურად პოზიტიურად არის წარმოდგენილი.

როგორც ომიაძემ აღნიშნა, მიმდინარე წელი ტურიზმის მიმართულებით იქნება აქტიური და დატვირთული, მრავალმხრივი საერთაშორისო კამპანიებითა და ახალი ინიციატივებით.