Kass Land Diamond Resort-ი, ატრაქციების პარკი - რა სიახლეები ელოდებათ წელს KASS LAND-ის სტუმრებს
რამდენიმე კვირაში KASS LAND • წალკის კანიონი • Tsalka Canyon-ის ტერიტორიაზე Kass Land Diamond Resort ოფიციალურად გაიხსნება. როგორც Business Insider Georgia-სთან Kass Group-ის დირექტორმა ეკატერინე თოდრიამ განაცხადა, რეზორტი ამ დროისათვის სატესტო რეჟიმში ფუნქციონირებს და პირველი სტუმრები იანვარში მიიღო.
გარდა განთავსების ობიექტისა KASS LAND-ის ტერიტორიაზე ზაფხულის ტურისტული სეზონისთვის ბევრი სიახლე იგეგმება.
„სასტუმროს ოფიციალური გახსნა იგეგმება ივნისის თვეში და აქტიურად მიმდინარეობს მოსამზადებელი სამუშაოები.
ასევე იგეგმება მასშტაბური ატრაქციების პარკის გახსნა, რომელიც საუკეთესო გასართობი ადგილი იქნება ოჯახებისთვის. ატრაქციების პარკი მოიცავს გიგანტურ სლაიდს, ჩამოსასრიალებლებს, სხვადასხვა ასაკობრივი ჯგუფებისთვის განკუთვნილ განსხვავებულ ატრაქციებს და აღმოსავლეთ ევროპაში ყველაზე გრძელ ტრასაზე მოწყობილ კარტინგს.
ვინაიდან მსგავსი სახის რეზორტი საქართველოში არ არსებობს და დაინტერესება საკმაოდ მაღალია, ვფიქრობთ, რომ ვიზიტორების რაოდენობა შარშანდელთან შედარებით მნიშვნელოვნად გაიზრდება“, - განმარტავს ეკატერინე თოდრაძე.
რეზორტი მოიცავს 62 ვილჰაუსს და 55 ნომრიან სასტუმროს, ჯამში 350 სტუმრის განთავსება არის შესაძლებელი. სასტუმრო რამდენიმე თვეა სატესტო რეჟიმში მუშაობს და აქვს ჯავშნები როგორც ინდივიდუალური, ასევე ჯგუფური.რეზორტის ტერიტორიაზე დამატებით ვილჰაუსების მოწყობა იგეგმება.
ეკატერინე თოდრაძის თქმით, 2024 წელს KASS LAND-ს 100 ათასი ვიზიტორი სტუმრობდა. აღნიშნული მაჩვენებლებიდან კი უცხოელი ვიზიტორების წილი დაახლოებით 65% იყო, საქართველოს მოქალაქეების კი 35%. უცხოელი ვიზიტორებიდან კი განსაკუთრებით აქტიურობდნენ ქვეყნები - რუსეთი, ისრაელი, ინდოეთი, ემირატები, ყაზახეთი და ა.შ
აღსანიშნავია, რომ KASS LAND-ში მაღალი სეზონი მაისიდან იწყება ოქტომბრამდე გრძელდება.
სხვა სიახლეები
ტურიზმის ეროვნული ადმინისტრაცია საერთაშორისო მარკეტინგულ კამპანიებს აგრძელებს
18.11.2026.11:47
საქართველოს ტურისტული პოტენციალის პოპულარიზაციისა და საერთაშორისო მოგზაურების მოზიდვის მიზნით, საქართველოს ტურიზმის ეროვნული ადმინისტრაცია სამიზნე ბაზრებზე საერთაშორისო მარკეტინგულ კამპანიებს აქტიურად განაგრძობს.
კამპანიის ფარგლებში, დიდი ბრიტანეთის 50-მდე ცენტრალურ ლოკაციაზე საქართველოს საიმიჯო ბანერებია განთავსებული. მათ შორის, ლონდონის ისეთ პრესტიჟულ უბნებსა და ხალხმრავალ ადგილებში, როგორებიცაა მეიფერი, კენსინგტონი, ნოთინგ ჰილი, ბრიქსტონი, ქვინს პარკი, ჩელსი, ტაუერ ბრიჯი და სხვ. აღნიშნული კამპანია დიდ ბრიტანეთში მიმდინარე წლის ბოლომდე გაგრძელდება.
საქართველოს ტურიზმის ეროვნული ადმინისტრაციის ხელმძღვანელის, მაია ომიაძის შეფასებით, დიდ ბრიტანეთში განხორციელებულმა ინტეგრირებულმა მარკეტინგულმა აქტივობებმა და პირდაპირმა ავიამიმოსვლამ ქვეყნის ცნობადობის ამაღლებასა და ბრიტანელი ვიზიტორების ნაკადის მნიშვნელოვან ზრდას შეუწყო ხელი:
„საქართველოს ტურიზმის ეროვნული ადმინისტრაცია მთელი წლის განმავლობაში ახორციელებს მარკეტინგულ კამპანიებს სამიზნე ბაზრებზე და დიდი ბრიტანეთი არის ერთ-ერთი გამორჩეული ბაზარი, სადაც მთელი წლის განმავლობაში სხვადასხვა ტიპის ინტეგრირებული კამპანიები მიმდინარეობს. გარე რეკლამები ლონდონის ქუჩებში, ასევე მეტროში, სხვადასხვა ტიპის აქტივობები, ასევე აღსანიშნავია დიდ მედია-ტურისტულ პლატფორმებზე: ბუქინგსა და სკაისკანერზე კამპანიები, სადაც ზამთრის სეზონის პოპულარიზაცია მიმდინარეობს. მთლიანობაში ბრიტანეთი ტურიზმის ეროვნული ადმინისტრაციისთვის არის ერთ-ერთი ყველაზე მნიშვნელოვანი სტრატეგიული ბაზარი. მესამე კვარტალში 18%-ით არის გაზრდილი ვიზიტორების რაოდენობა. რა თქმა უნდა, მნიშვნელოვანია პირდაპირი ფრენები, საბოლოო ჯამში მთლიანობაში ეს ინტეგრირებული მუშაობა იღებს იმ შედეგს, რომ საქართველო კიდევ უფრო მოთხოვნადი და ცნობადი ხდება ბრიტანეთის ბაზარზე და შედეგად, ბევრად მეტი ბრიტანელი მოგზაური სტუმრობს საქართველოს“.-აღნიშნავს მაია ომიაძე.
ტურიზმის ეროვნული ადმინისტრაცია საერთაშორისო მარკეტინგულ კამპანიებს აშშ-სა და ევროპის, ახლო აღმოსავლეთისა და აზიის სხვადასხვა ქვეყანაში, მათ შორის ინდოეთში, ჩინეთში, სპარსეთის ყურის ქვეყნებში, აშშ-ში, გერმანიაში, საფრანგეთში, პოლონეთში, სკანდინავიის ქვეყნებში, ისრაელსა და სხვა სამიზნე ბაზრებზე, მთელი წლის განმავლობაში აქტიურად ახორციელებს.
საერთაშორისო ბაზრებზე გათვლილი მარკეტინგული აქტივობები უცხოელი მოგზაურების დაინტერესებასა და საქართველოს, როგორც მიმზიდველი ოთხსეზონური ტურისტული მიმართულების, ცნობადობის ამაღლებას ემსახურება.