სასტუმრო Hotel Carpe Diem Gudauri მიმდინარე ზამთრის ტურისტული სეზონის სტარტით კმაყოფილია და იმედი აქვს, რომ თუ ამინდი ხელს არ შეუშლის, სეზონი წარმატებით ჩაივლის და კურორტს უფრო მეტი სტუმარი ეყოლება.

„კარგი სეზონია, მოთხოვნა დიდია და დატვირთულობაც ძალიან კარგია. ახალი წლის პერიოდში სასტუმრო შარშანაც სავსე იყო. ამ ეტაპზე რთულია კონკრეტული პროგნოზების გაკეთება - ყველაფერი დამოკიდებულია ამინდზე. ბოლო პერიოდში ამინდი სერიოზულად გვიშლის ხელს, თუმცა სტარტი ნამდვილად კარგია.

ადგილობრივების გარდა აქტიურობენ უცხოელებიც. ძირითადად სტუმრები ისრაელიდან არიან, რაც ჩვენს შემთხვევაში წინასწარ ჯავშნებს უკავშირდება. ისრაელიდან ჩამოსული სტუმრები საშუალოდ 5–7 დღე რჩებიან, ხოლო ადგილობრივები დაახლოებით 2 ღამეს“, - ამის შესახებ Business Insider Georgia-სთან Hotel Carpe Diem Gudauri-ს გენერალურმა დირექტორმა ილია ბარბაქაძემ განაცხადა.

მისი თქმით, მიმდინარე ტურისტულ სეზონზე გუდაურში მდებარე სასტუმრო Carpe Diem-ს მომსახურების ტარიფების გაზრდაც მოუწია.

„მიმდინარე წელს ფასების ზრდაც მოგვიწია, დაახლოებით 10%-ით, რაც გაზრდილ ხარჯებს უკავშირდება: გაიზარდა ხელფასები, გაიზარდა პროდუქტებზე ფასები და მეც მიწევს ტარიფების გაზრდა“, - აცხადებს სასტუმროს დირექტორი.

Carpe Diem Gudauri-ს გენერალური დირექტორი მიიჩნევს, რომ კურორტისთვის აუცილებელია ისეთი აუდიტორიის მოზიდვა, რომელიც ზამთრის დასვენებას ანიჭებს უპირატესობას.

„საჭიროა ისეთი ტურისტების მოზიდვა, რომლებმაც იციან, რა არის ზამთრის ტურიზმი. ვგულისხმობ სამიზნე აუდიტორიაზე უფრო მეტად აქცენტირებას, რადგან კურორტზე შემოდის ისეთი ტურისტიც, რომელსაც ზამთრის კურორტის სპეციფიკა არ აქვს გაცნობიერებული. ვფიქრობ, კერძო სექტორი ტურისტების მოსაზიდად მაქსიმუმს აკეთებს. ჩვენ ჩვენი მხრიდან ყველა არსებულ რესურსს ვიყენებთ იქნება ეს შიდა თუ გარე რეკლამა, რათა ჩვენი ხმა სამიზნე აუდიტორიას მივაწვდინოთ“, - აცხადებს ილია ბარბაქაძე.

სასტუმრო Carpe Diem Gudauri 2011 წელს გაიხსნა და 61 სასტუმრო ნომერს აერთიანებს.