გემო ფესტმა ძალიან ბევრი მოგზაური გაახარა და, რაც ყველაზე მნიშვნელოვანია, ბევრ ადგილობრივ მოსახლეს შემოსავალი შეუქმნა, – აცხადებს ტურიზმის ეროვნული ადმინისტრაციის ხელმძღვანელი.

გემო ფესტი 2025-მა საკუთარ ვიზიტორებს მომავალ წლამდე უკვე დაემშვიდობა, თუმცა მიმდინარე წელს ის საკმაოდ აქტიურად ჩატარდა ქვეყნის სამ რეგიონში და ბევრი სტუმარიც მიიღო.

„ორი დღის განმავლობაში მიმდინარეობდა გემო ფესტი პირველად სამცხე-ჯავახეთის რეგიონში, კერძოდ – ბორჯომში. ფესტივალი იყო ძალიან აქტიური, მრავალი სტუმრითა და განსხვავებული გემოებით. 15-მდე მონაწილე გვყავდა კვების მიმართულებით – მთლიანად სამცხე-ჯავახეთიდან. ასევე იყვნენ ადგილობრივი მეწარმეები, რომლებიც ყიდდნენ განსაკუთრებულ ადგილობრივ პროდუქტებს.
იცით, რომ სამცხე-ჯავახეთი ცნობილია თენილი ყველითა და მისი სხვადასხვა ნაირსახეობით. ეს განსხვავებული გემოები, რომლებიც სრულიად განასხვავებს ამ რეგიონის გასტრონომიას დანარჩენი საქართველოსგან, წარმოდგენილი იყო ძალიან მრავალფეროვნად ორდღიანი ფესტივალის განმავლობაში.
წელს ამ რეგიონით დასრულდა გემო ფესტივალის ე.წ. ტურნე.“
მისი თქმით, ფესტივალმა უამრავი ადგილობრივი და საერთაშორისო სტუმარი მოიზიდა და ადგილობრივ მოსახლეობას დამატებითი ეკონომიკური სარგებელიც მოუტანა.

„ამ ფესტივალმა ძალიან ბევრი მოგზაური გაახარა – როგორც ადგილობრივი, ისე საერთაშორისო. და რაც ყველაზე მთავარია, ბევრ ადგილობრივ მოსახლეს შეუქმნა შემოსავლის წყარო. რეგიონში შეიქმნა მნიშვნელოვანი ეკონომიკური აქტივობა ტურისტების ვიზიტის შედეგად.
იცით, რომ ერთ-ერთი მთავარი მიზანი ამ პროექტის არის მეწარმეობისა და გასტრონომიის განვითარება და, შესაბამისად, გასტრო-ტურიზმის ხელშეწყობა. ვფიქრობთ, რომ ამ ყველაფერს პროექტმა წარმატებით გაართვა თავი,“ - განაცხადა მაია ომიაძემ.
გემო ფესტი 2026 წლიდან კვლავ დაბრუნდება და ქართულ გასტრონომიას ახალი გემოებით გააცოცხლებს.

„როგორც ყოველთვის, დიდი კონკურენციაა გემო ფესტივალზე - ანუ, რომელი რეგიონი გახდება მისი მასპინძელი.
მომავალ წელს გემო ფესტი კვლავ დაბრუნდება. არის ტრადიციული ადგილები, მაგრამ ჩვენი მიზანია მთელი საქართველო მოვიაროთ და ყველა რეგიონს ვეწვიოთ - რათა მათი სამზარეულო ხელახლა აღმოვაჩინოთ და ახალი სიცოცხლე შევძინოთ. შესაბამისად, გემო ფესტი მომავალ წელს ახალი რეგიონებით აუცილებლად დაბრუნდება,“ – აცხადებს მაია ომიაძე.