Galt & Taggart - ი თვის ეკონომიკურ მიმოხილვას აქვეყნებს.  მიმოხილვაში აღნიშნულია, რომ საერთაშორისო სავალუტო ფონდის 2025 წლის ოქტომბრის მსოფლიო ეკონომიკური პერსპექტივის თანახმად, საქართველოს ეკონომიკა 2026 წელს 5.3%-ით გაიზრდება, რაც რეგიონში ერთ-ერთი ყველაზე სწრაფი ტემპი და მაღალი მაჩვენებელია.

საქართველოს ეკონომიკა 2025 წლის სექტემბერში წლიურად 6.4%-ით გაიზარდა, აგვისტოში დაფიქსირებული 6.6%-იანი ზრდის შემდეგ. ჯამურად, რეალური მშპ 2025 წლის 9 თვეში წლიურად 7.7%-ით გაიზარდა. სექტემბერში ზრდა ძირითადად განპირობებული იყო შემდეგი დარგები: დამამუშავებელი მრეწველობა, ტრანსპორტი და დასაწყობება, ინფორმაცია და კომუნიკაცია, პროფესიული, სამეცნიერო და ტექნიკური საქმიანობები. Galt & Taggart - ის პროგნოზით რეალური მშპ-ს ზრდა 2025 წელს 7.5%, ხოლო 2026 წელს 6.0% იქნება.

2025 წლის ტურიზმიდან შემოსავლების პროგნოზს $4.5 მილიარდიდან $4.6 მილიარდამდე აუმჯობესებს, ხოლო 2026 წელს მოელის რომ აღნიშნული მაჩვენებელი $4.9 მილიარდს გაუტოლდება.

ცნობისთვის, სებ-ის მიერ გამოქვეყნებული მონაცემების თანახმად, 2025 წლის III კვარტალში საქართველომ მოგზაურობიდან 1,666.8 მილიონი აშშ დოლარის შემოსავალი მიიღო, რაც წინა წლის ანალოგიურ პერიოდთან შედარებით, 6.6%-ით მეტია. ხოლო ჯამურად, მიმდინარე წლის სამ კვარტალში აღნიშნულმა მაჩვენებელმა 3,637.8 მილიონი აშშ დოლარი შეადგინა (წლიური ზრდა 5.1%). 

საერთაშორისო მოგზაურობიდან მიღებულ შემოსავალში 2025 წლის III კვარტალში ევროკავშირის ქვეყნების წილი 14.3%-ით განისაზღვრა და 238.2 მილიონ აშშ დოლარს გაუტოლდა - ზრდა წინა წლის ანალოგიურ მაჩვენებელთან შედარებით 13.3%-ია. 

სტატისტიკის მიხედვით, მაღალი ზრდის ტემპით გამოირჩევა აზერბაიჯანიდან და ისრაელიდან მიღებული შემოსავლები, შესაბამისი 36.3% და 28%-იანი წლიური ზრდის ტემპებით.

კლების ტენდენციით ხასიათდება რუსეთიდან შემოსავლები - 2025 წლის III კვარტალში რუსეთიდან საქართველოში მოგზაურობით მიღებული შემოსავლები 14.3%-ით შემცირდა.