2026 წლის სტრატეგიის გაზიარება დაგვეხმარება, რომ შესაბამისი მიმართულებით დავიგეგმოთ ბაზრებზე , - ასე გამოეხმაურა „კა ჯგუფის" დამფუძნებელი ირაკლი ჭიღლაძე. მისი თქმით, 2025 წელს განსაკუთრებით კარგი სტატისტიკა ჰქონდა „კა ჯგუფს" თბილისში.

„აღნიშნული შეხვედრა ძალიან საინტერესო იყო. საინტერესო ინფორმაცია გაგვიზიარეს 2025 წლის შესახებ და ასევე 2026 წლის გეგმებთან დაკავშირებით. ჩვენი სასტუმროების სტატისტიკა, რომ შევადაროთ, აბსოლუტურად თანხვედრაში მოდის. 2026 წლის სტრატეგიის გაზიარება ჩვენ, როგორც კერძო სექტორს, დაგვეხმარება, რომ შესაბამისი მიმართულებით დავიგეგმოთ ბაზრებზე. განსაკუთრებით კარგი სტატისტიკა გვქონდა თბილისში - მაღალი დატვირთულობა აღინიშნებოდა. შესაბამისად, მომავალ წელს უფრო ოპტიმისტურად ვუყურებთ. ასევე ძალიან კარგი სტატისტიკა გვქონდა მეზობელი და იმ ქვეყნებიდან, საიდანაც არის პირდაპირი ფრენები. 2026 წელს ველოდებით ზრდას ამ მიმართულებით", - აცხადებს ირაკლი ჭიღლაძე.

ეკონომიკის მინისტრის მოადგილემ და ტურიზმის ეროვნული ადმინისტრაციის ხელმძღვანელმა ბიზნეს ასოციაციის წევრებსა და ტურიზმის სექტორის წარმომადგენლებს ადმინისტრაციის 2026 წლის პროექტები და გეგმები გააცნეს. სხვადასხვა ბიზნესისა და ტურიზმის სექტორის წარმომადგენლები ტურიზმის ეროვნული ადმინისტრაციის მიმდინარე პროექტებს, მარკეტინგულ კამპანიებსა და დაგეგმილ აქტივობებს გაეცნენ.

შეხვედრაზე განიხილეს ტურიზმის სფეროში მიმდინარე ტენდენციები. მაია ომიაძემ განსაკუთრებული ყურადღება დაუთმო ტურისტული ბაზრების დივერსიფიკაციას, მაღალშემოსავლიანი ტურისტული ნაკადის მოზიდვასა და საქმიანი ტურიზმის (MICE) მიმართულების გაძლიერებას. ამ კუთხით, ტურიზმის ეროვნული ადმინისტრაცია კომბინირებულ მარკეტინგულ კამპანიებს ატარებსმიზნობრივ ტურისტულ ბაზრებზე. მათ შორის: ევროკავშირსა და დიდ ბრიტანეთში, ჩინეთში, ინდოეთში, ასევე სპარსეთის ყურის ქვეყნებში.

აღნიშნული ტენდენცია 2026 წელს არა მხოლოდ გაგრძელდება, არამედ მოხდება ტურისტული შეთავაზებებისა და პროდუქტების განვითარების ახალი შესაძლებლობების იდენტიფიცირება, ახალი ტურისტული ადგილების განვითარება, ასევე გაფართოვდება კერძო სექტორის გაძლიერების მხარდამჭერი პროგრამები და სხვა.

შეხვედრაზე ასევე დაანონსდა ის, რომ საქართველო 2026 წელს აზიის ერთ-ერთი უმსხვილესი ტურისტული გამოფენის ITB შანხაის ოფიციალური მასპინძელი ქვეყანა იქნება. შეხვედრაზე განსაკუთრებულად გაესვა ხაზი საჯარო და კერძო სექტორის თანამშრომლობის კიდევ უფრო მეტად გაღრმავების მნიშვნელობას ტურიზმის განვითარებაში. შეხვედრის დასასრულს, ბიზნესის წარმომადგენლებმა ეკონომიკის სამინისტროსა და ტურიზმის ადმინისტრაციის დარგის განვითარების შესახებ საკუთარი მოსაზრებები გაუზიარეს.