საქართველოში Eagle Hills-ის საინვესტიციო პროექტი ემსახურება ჩვენი ქვეყნის ტურისტული სექტორის ხარისხობრივ გაუმჯობესებას, - აცხადებს პარლამენტის ეკონომიკური პოლიტიკის კომიტეტის თავმჯდომარე შოთა ბერეკაშვილი, რომელიც დღეს „იმედის დილაში“, რუბრიკა Business Insider Georgia-ს სტუმარი იყო. დეპუტატის განმარტებით, ტურისტული სექტორის ხარისხობრივი გაუმჯობესება კი ნიშნავს საქართველოს მოქალაქეებისთვის მეტ შემოსავალს.
„ჩვენ არ უნდა დაგვავიწყდეს, რომ ტურისტულ სექტორში პირდაპირ თუ არაპირდაპირ დაახლოებით 250 ათასი ადამიანია დასაქმებული - ეს მსოფლიო ბანკის ციფრებია. თუ ჩვენ შევძლებთ შემოსავლების 2,5-ჯერ გაზრდას, ამ ადამიანებისთვისაც გაიზრდება შემოსავლები და ფაქტობრივად აღნიშნული საინვესტიციო პროექტი ემსახურება ჩვენი ქვეყნის ტურისტული სექტორის ხარისხობრივ გაუმჯობესებას, რაც თავის მხრივ ნიშნავს ჩვენი ქვეყნის მოქალაქეების შემოსავლების ზრდას.
პროექტში დიდი მნიშვნელობა აქვს კომერციულ ნაწილს: მაღალი კლასის სასტუმროების მშენებლობას, ბიზნესცენტრების მშენებლობას და სავაჭრო ცენტრების მშენებლობას. მაღალი დონის სასტუმროების მშენებლობა პროექტში ნიშნავს მაღალშემოსავლიანი ტურისტების მოზიდვას, A კლასის ბიზნესცენტრების მშენებლობა ნიშნავს მსხვილი კორპორაციების ოფისების გაჩენას, ხოლო მაღალი დონის სავაჭრო ცენტრები ნიშნავს მაღალი კატეგორიის ბრენდების შემოსვლას. ეს ყველაფერი გამოიხატება იმაში, რომ მაღალი დონის სერვისებს შესთავაზებს საქართველო ვიზიტორებს“, - აღნიშნა შოთა ბერეკაშვილმა.