დღეს განსაკუთრებით პრობლემური შეიძლება იყოს ჯანდაცვის სექტორში ფარმაცევტული და სამედიცინო ჰოლდინგების ერთობლიობა, - ამის შესახებ სადაზღვევო კომპანია Global Benefits Georgia-ს და “ჯეო ჰოსპიტალსის“ სამეთვალყურეო საბჭოების თავმჯდომარემ ნინა კობახიძემ განაცხადა, რომელიც ეკონომიკური ფორუმის მე-19 დისკუსიას ესწრებოდა. 

„პირდაპირი შეხება მაქვს ორივე მიმართულებასთან: დაზღვევა, ჯანდაცვის სექტორი, პრაქტიკულად ორივე მხარეს ვარ. ჩვენ ვიმუშავეთ ამასთან დაკავშირებით, იყო კონკურენციის სააგენტოს სერიოზული დასკვნა. დღეს განსაკუთრებით პრობლემური შეიძლება იყოს ჯანდაცვის სექტორში ფარმაცევტული და სამედიცინო ჰოლდინგების ერთობლიობა. რაზეც ალბათ უნდა ერთობლივად ვიმუშაოთ, რადგან დაზღვევა აზღვევს ხარჯების, დანახარჯების ეფექტურობას და ყველაზე ნაკლებად პრობლემური შეიძლება იყოს ინტერესთა კონფლიქტში. 

ჯანდაცვის სექტორში განსაკუთრებით პრობლემაა საბანკო კონკურენცია. მაგალითისთვის, სადაზღვევო და ბანკი - ბანკი ითხოვს დაზღვევას და ხდება მომხმარებელზე სადაზღვევო პროდუქტების „იძულებით“ შეძენა, განსაკუთრებით კრედიტებთან მიმართებაში. გვქონდა დაპირება, თუ საბანკო კონცენტრაცია შემცირდება, მაშინ ფარმაცევტული კომპანიები გავლენ ამ მიმართულებიდან და ეს საკითხი შეიძლება გაცოცხლდეს იმ კონკურენციის დასკვნის საფუძველზე თუ მივაღწიეთ იდეალურ კონკურენციის ბაზარს.

დღეს 18 სადაზღვევო კომპანია ვართ ბაზარზე. რეალურად ჯანდაცვის სფეროში ვოპერირებთ 5 კომპანია და ალბათ სტატისტიკა აჩვენებს იმას, რომ პირიქით ჩვენ უფრო კონცენტრირებულები ვართ იმაზე რომ ნაკლები მედიკამენტი დაინიშნოს, ბრუნვა იყოს შემცირებული, ვიდრე რა თქმა უნდა ფარმაცევტული და სამედიცინო სფერო“, - განაცხადა ნინა კობახიძემ.