Ajara Glamping • აჭარა გლემფინგი გაფართოვდა. ტურისტული ობიექტი თუ აქამდე 2 გლემფისგან შედგებოდა, დღეს უკვე 5 ობიექტს აერთიანებს. როგორც Business Insider Georgia-სთან Ajara Glamping-ის თანადამფუძნებელმა ირაკლი თავართქილაძემ განაცხადა, ახალი, 3 ობიექტი განსხვავებული კონცეფციისა.

„3 ახალი ობიექტი დავამატეთ, რომლებიც არსებული ობიექტებისგან განსხვავებულია. ჯამში ჩვენს ხუთივე ობიექტში 20 სტუმრის მიღებაა შესაძლებელია. ახლები ძველებისგან იმით განსხვავდება, რომ ტრადიციული გლემფი არ არის, უფრო ხის მასალაა გამოყენებული და სამივეს აქვს საკუთარი აუზი. შესაბამისად ფასებიც განსხვავებულია და ახალ ობიექტებში ღამისთევა დაახლოებით 40-%-ით ძვირი ღირს“, - აცხადებს ირაკლი თავართქილაძე.

აღნიშნული გაფართოებისთვის Ajara Glamping-მა 0,5 მლნ ლარზე მეტი ინვესტიცია განახორციელა.

Ajara Glamping-ის თანადამფუძნებლის თქმით, ამ დროისათვის ჯავშნები ძირითადად ადგილობრივი სტუმრებიდან შემოდის. ტურისტული ობიექტის მაგალითზე, მაღალი სეზონი ივნისიდან იწყება და სექტემბრის შუა რიცხვებამდე გრძელდება.

ირაკლი თავართქილაძის პროგნოზით, მიმდინარე ცხელ სეზონზე ობიექტის საშუალო დატვირთულობა 70%-მდე იქნება.

გარდა ღამისთევისა Ajara Glamping-ი თავის სტუმრებს სხვადასხვა სახის ტურებსაც სთავაზობს.

„გვაქვს კვადრო ტურები. ასევე გვაქვს საფეხმავლო ტურები. აღნიშნული სერვისებით კი ძირითადად უცხოელი სტუმრები სარგებლობენ“, - აცხადებს ირაკლი თავართქილაძე. მისივე განმარტებით, Ajara Glamping-ის უცხოელი სტუმრების უმეტესობა ევროპის ქვეყნებიდან არიან.

Ajara Glamping-ის მაგალითზე ადგილობრივი ტურისტების ღამისთევების საშუალო მაჩვენებელი 1-2 ღამეა, ხოლო უცხოელების - 3-4 ღამე.

ტურისტულ ობიექტში ამ დრომდე გასული წლის ფასებს ინარჩუნებენ და ორი ადამიანისთვის Ajara Glamping-ში ღამისთევის ღირებულება 150-ლარიდან 250 ლარამდეა.

Ajara Glamping-ი ბაზარზე 2019 წლიდან ოპერირებს. Ajara Glamping-ის კოტეჯები მდებარეობს ქედაში, სოფელ კოკოტაურში, ზღვის დონიდან 550 მეტრზე. Ajara Glamping-ი წარმოადგენს განტვირთვის შესანიშნავ საშუალებას.
თამამად შეიძლება ითქვას, რომ აქ წლის ყოველი დრო ულამაზესია. კარვიდან აჭარის ულამაზესი ბუნება იშლება. კოტეჯი აღჭურვილია ყველა საჭირო ინვენტარით.