„აჭარა ტექსტილე“ საქართველოს ერთ-ერთი ყველაზე მსხვილი და წარმატებული საექსპორტო საწარმოა, რომელიც სამკერვალო ინდუსტრიაში ოპერირებს. კომპანია 2008 წელს დაარსდა და მას შემდეგ მნიშვნელოვან როლს ასრულებს ქვეყნის ეკონომიკაში. როგორც Business Insider Georgia-სთან „აჭარა ტექსტილის“ დირექტორმა გია ლომინაძე განაცხადა, კომპანია მხოლოდ საერთაშორისო ბრენდებს ემსახურება.

„ჩვენ თითქმის ყველა ძირითად საერთაშორისო ბრენდს ვემსახურებით. მათ შორისაა Nike, Adidas, Puma, Lotto, New Balance. ჩვენს მიერ შექმნილი პროდუქციის ძირითადი ნაწილი თურქეთში გადის და იქიდან ხდება მიწოდება უშუალოდ ბრენდზე. ეს იმიტომ, რომ ლოჯისტიკის თვალსაზრისით უფრო სწრაფად ხორციელდება, ვიდრე ჩვენი პორტიდან გაგზავნა. თუმცა არის შემთხვევები, როდესაც ფოთის პორტიდან პროდუქცია პირდაპირ მომხმარებელთან იგზავნება“, - განმარტავს გია ლომინაძე.

„აჭარა ტექსტილეს“ დირექტორის თქმით, კომპანიისთვის გამოწვევას წარმოადგენს კვალიფიციური კადრების დეფიციტი.

„კადრების დეფიციტის პრობლემა ჩვენთანაც, რა თქმა უნდა, დგას, მაგრამ ეტაპობრივად მცირე მატებები მაინც შევძელით. დღეის მდგომარეობით, დაახლოებით 5 500 თანამშრომელი გვყავს დასაქმებული, რომლებიც ქვეყნის მასშტაბით „აჭარა ტექსტილეს“ ოთხ საწარმოში არიან გადანაწილებულები“, - აცხადებს დირექტორი.

აღსანიშნავია, რომ საწარმოები მდებარეობს ბათუმში, ქობულეთში, ფოთსა და რუსთავში.

„იმ ფონზე, რომ თანამშრომელთა რაოდენობა გავზარდეთ, ბოლო ერთი წლის განმავლობაში დაახლოებით 800 ადამიანი დავამატეთ, რაც პირდაპირ აისახება ჩვენს 2026 წლის წარმოებაზე. შესაბამისად, ჩვენს მიერ წარმოებული პროდუქციის რაოდენობა გაიზრდება“, - აღნიშნავს გია ლომინაძე.

როგორც ცნობილია, კომპანიის მთავარი საქმიანობა მსოფლიოში ცნობილი სპორტული ბრენდებისთვის სამოსის წარმოებაა. „აჭარა ტექსტილეს“ მიერ საქართველოში დამზადებული პროდუქცია სრულად გადის ექსპორტზე და ხშირად ხდება მსოფლიო დონის სპორტსმენებისა და საფეხბურთო ნაკრებების ეკიპირების ნაწილი.

ეკონომიკური თვალსაზრისით, „აჭარა ტექსტილე“ საქართველოს ერთ-ერთი უმსხვილესი ექსპორტიორია, რაც დადებითად აისახება ქვეყნის სავაჭრო ბალანსზე. გარდა ეკონომიკური სარგებლისა, კომპანია მნიშვნელოვან როლს თამაშობს რეგიონულ განვითარებაში, რადგან ქმნის სტაბილურ სამუშაო ადგილებს აჭარისა და სამეგრელოს რეგიონებში.