2025 წელმა, გამოწვევებიდან გამომდინარე, მაინც ვთვლით, რომ წარმატებით ჩაიარა. იქიდან გამომდინარე, რომ ზრდა დაფიქსირდა როგორც საერთაშორისო ვიზიტორებში, ისე ტურისტული ვიზიტების რაოდენობის ჭრილში, – ამის შესახებ Business Insider Georgia-სთან 2025 წლის ტურიზმის სტატისტიკის შეფასებისას საქართველოს ტურიზმის ასოციაციის პრეზიდენტი ნატა კვაჭანტირაძე აცხადებს. მისი განმარტებით, სტატისტიკური მაჩვენებლებით შემოდინების დიდი წილი კულტურულ ტურიზმზე მოდის, თუმცა საკმაოდ აქტიური იყო MICE და სათავგადასავლო ტურიზმიც.

„ეს ძალიან მნიშვნელოვანია ზოგადად ბიზნესის კეთილდღეობისთვის, რადგან ძლიერი ბიზნესი ნიშნავს ძლიერ შესაძლებლობებს ქვეყნისთვის და ძლიერ ეკონომიკას. თავისთავად ძალიან მისასალმებელია, რომ ამ სტატისტიკურ მონაცემებში მნიშვნელოვანი წილი სწორედ კერძო სექტორის წარმომადგენლებს აქვთ. რა თქმა უნდა, ამ რაოდენობრივ მაჩვენებელში სხვადასხვა ტიპის ვიზიტები განხორციელდა - ტურისტული და სხვა. თავისთავად მნიშვნელოვანია ის, რომ სტატისტიკურ მაჩვენებლებში ყოველთვის ლიდერობს კულტურული ტურიზმით შემოსული სტუმრების რაოდენობა. თუმცა ასევე მნიშვნელოვანია როგორც MICE-მიმართულებები, ასევე სათავგადასავლო მიმართულებები - ზოგადად კურორტებზე ვიზიტები, და თავისთავად ამ ყველაფერმა გადააბალანსა ის რაოდენობა, რომელიც საბოლოოდ მივიღეთ“, - აცხადებს ნატა კვაჭანტირაძე.

ტურიზმის ასოციაციის ხელმძღვანელის თქმით, ნებისმიერი მარკეტინგული კამპანია და აქტივობა, რომელიც იგეგმება წლის განმავლობაში როგორც საჯარო სექტორის მხრიდან, ასევე კერძო სექტორის ჩართულობით, ნიშნავს, რომ ეს არის გრძელვადიან პერსპექტივაზე გათვლილი აქტივობა, რომელმაც შედეგი შესაძლოა მყისიერადაც მოგვცეს.

„თუმცა ის მაინც გრძელვადიან პერსპექტივას მოიაზრებს და თავისთავად 2025 წელს გაწეული ნებისმიერი საპრომოციო აქტივობა ნიშნავს იმას, რომ წელს გაცილებით უკეთესი შედეგები უნდა მივიღოთ ტურისტული ვიზიტების ჭრილში - როგორც ხარისხობრივ მაჩვენებლებში, ქვეყნების დამატების ნაწილში, ასევე რაოდენობრივ მაჩვენებელში“, – განმარტავს ნატა კვაჭანტირაძე.

ტურიზმის ეროვნული ადმინისტრაციის ინფორმაციით, საქართველოში 2025 წელს ტურისტული ვიზიტების რეკორდული მაჩვენებელი დაფიქსირდა და ისტორიულ მაქსიმუმს 5,521,866 ვიზიტს მიაღწია, ზრდა 2024 წელთან შედარებით +8.4%-ით მეტია.

გასულ წელს საქართველოში 7,803,239 საერთაშორისო მოგზაურის ვიზიტი შედგა, რაც 2024 წელთან შედარებით +5.9%-ით მეტია.

2025 წელს ევროკავშირის ქვეყნებიდან და დიდი ბრიტანეთიდან ვიზიტების რეკორდული მაჩვენებელი დაფიქსირდა და 499,890 ვიზიტი შეადგინა, რაც 2024 წელთან შედარებით +14%-ით გაზრდილია.

აღსანიშნავია, რომ გასულ წელს რეკორდულად მაღალი ვიზიტები დაფიქსირდა გაერთიანებული სამეფოდან (+39.1%; +12,646 ვიზიტი); საბერძნეთიდან (+28.2%; +7,765 ვიზიტი); საფრანგეთიდან (+17.4%; +4,917 ვიზიტი); იტალიიდან (+39.4%; +7,840 ვიზიტი); ესპანეთიდან (+48.6%; +7,167 ვიზიტი).

ევროკავშირისა და დიდი ბრიტანეთის გარდა ზრდა ფიქსირდება სხვა მიზნობრივი ტურისტულები ბაზრებიდან. 2025 წელს სპარსეთის ყურის ქვეყნებიდან 145,513 ვიზიტი განხორციელდა (ზრდა +3.4%; +4,774 ვიზიტი), მათ შორის ვიზიტების მაღალი ზრდა ფიქსირდება საუდის არაბეთიდან, (+9.1%; +8,042 ვიზიტი).

2025 წელს ვიზიტების განსაკუთრებული ზრდა ფიქსირდება შემდეგი ქვეყნებიდან: ისრაელი (+91,444 ვიზიტი; +29.4%); აზერბაიჯანი (+72,793 ვიზიტი; +33.2%;); ჩინეთი (+39,312 ვიზიტი; +44.4%).

2025 წელს საერთაშორისო ტურისტული ვიზიტებით გამორჩეული იყო მე-4 კვარტალი. გასული წლის სექტემბერი-დეკემბრის პერიოდში საერთაშორისო ტურისტული ვიზიტების რეკორდული ზრდა დაფიქირდა და ისტორიული მაქსიმუმი 1,214,772 ვიზიტი შეადგინა, ზრდა 2024 წლის ანალოგიურ პერიოდთან შედარებით +10.5%-ია.

რაც შეეხება საერთაშორისო მოგზაურთა ვიზიტებს, გასული წლის სექტემბერი-დეკემბრის პერიოდში, საქართველოში 1,693,484 საერთაშორისო მოგზაურის ვიზიტი შედგა, ზრდა 2024 წლის მე-4 კვარტალთან შედარებით +7.6%-ია.