2024 წელთან შედარებით, 2025 წელს უფრო კარგი მდგომარეობა იყო და ძალიან დიდი იმედი მაქვს, რომ 2026 წელი უფრო კარგი იქნება, – ამის შესახებ Business Insider Georgia-სთან 2025 წლის ტურიზმის სტატისტიკის შეფასებისას Bristol Hotel & Spa Bakuriani-ს გაყიდვების მენეჯერმა, ანი ბერუაშვილმა განაცხადა. მისი თქმით, სასტუმროს მაგალითზე, წლის დასაწყისში ჯავშნების კუთხით სიმცირე შეინიშნებოდა, თუმცა აპრილიდან საკმაოდ დიდი რაოდენობით ჯავშნები დაიწყო.

„მინდა აღვნიშნო, რომ 2025 წელი დაიწყო ისე, რომ წინასწარი ჯავშნები, რაც გვქონდა ხოლმე სასტუმროში - ვგულისხმობ სერიულ ჯავშნებს, რომელიც გვაქვს წლის დასაწყისში, თებერვალ-მარტში - წელს წინასწარი ჯავშნები არ გვქონდა.

სერიული ჯავშნები, რაც უნდა წამოსულიყო, საბოლოო ჯამში დადასტურებული არაფერი იყო, რამაც გარკვეულ მომენტში ძალიან შემაშინა. იმიტომ, რომ წინა წლებთან შედარებით ყოველთვის ისე იყო, რომ მარტში უკვე მაისიდან მოყოლებული ოქტომბრამდე ჯავშნები სულ გვქონდა. სერიოზული ჯავშნები იყო ხოლმე ჩინეთიდან, კორეიდან და ძალიან აქტიურად ვმუშაობდით. წელს, რატომღაც, თებერვალსა და მარტში ეს რომ არ შეინიშნებოდა, შევშინდით, მაგრამ საბოლოო ჯამში, აპრილიდან რომ დაიწყო მოთხოვნების გამოგზავნა, ძალიან კარგად წამოვიდა. მართალია, ვადასტურებ, რომ 2024 წელთან შედარებით უფრო კარგი მდგომარეობა იყო 2025 წელს და ძალიან დიდი იმედი მაქვს, რომ 2026-ში უფრო კარგი იქნება. რაოდენობრივი ზრდა მართლაც გვქონდა - ნომრები აღარ გვქონდა თავისუფალი და ვეღარ ვატევდით.

ზაფხულის მაგალითს ავიღებ, ჩვენი ბაკურიანის მაგალითიდან გამოვალ, რადგან მაინც სეზონური ვარ: ივნისიდან გავიხსენით და სექტემბრის დასაწყისამდე ძალიან კარგად ვიმუშავეთ. ივნისში ცოტა მოიკოჭლებდა ჯავშნები, მაგრამ ივლისი, აგვისტო და სექტემბრის დასაწყისი სრულად შევსებული ვიყავით. ადგილი არ გვქონდა, რამდენჯერმე ოვერბუქინგიც კი გვქონდა.

გვყავდა მხოლოდ უცხოელი ტურისტები. ქართველები ზაფხულში ბაკურიანის მიმართულებით არ გვყავდა. რაც შეეხება 2025 წლის დასაწყისს, უფრო დიდი წილი ქართველები იყვნენ, თუმცა 2026 წლის დასაწყისში ქართველები ძალიან ცოტანი იყვნენ. ქართველებზე მეტი იყო Booking-ის ჯავშნები, რაც ნამდვილად ძალიან მნიშვნელოვანია ჩვენთვის - სტუმრები თვითონ ჯავშნიან, თვითონ ირჩევენ სასტუმროს და თვითონ მოდიან ჩვენამდე. ამ ეტაპზეც რეალურად უმეტესი წილი Booking-დან შემოსული ჯავშნები მყავს, რაც პირადად ჩემთვის ძალიან სასიხარულოა“, – აცხადებს ანი ბერუაშვილი.

Bristol Hotel & Spa Bakuriani-ს გაყიდვების მენეჯერის თქმით, სასტუმროს მენეჯმენტს 2026 წელზე უფრო მაღალი მაჩვენებლების მოლოდინი აქვს.

„2026 წლის მოლოდინებს რაც შეეხება, ძალიან პოზიტიურად ვარ განწყობილი. ზაფხულის დაგეგმარება უკვე დავიწყე და წინასწარი ჯავშნებიც უკვე არის, რაც ძალიან მახარებს. უფრო მეტს ველოდები, ვიდრე იყო 2025 წელს, რადგან წინა წლის ამ პერიოდში ზაფხულზე მოთხოვნები არ იყო, ახლა უკვე დაწყებულია“, – აცხადებს Bristol Hotel & Spa Bakuriani-ს გაყიდვების მენეჯერი.