ძალიან კარგია, რომ ბევრ ქართველს ეძლევა შესაძლებლობა საკუთარი სტარტაპ კომპანა წარმოაჩინოს სან-ფრანცისკოში, - ამის შესახებ დეპუტატმა ვაკო თურნავამ საქართველოს ფარგლებს გარეთ პირველი ტექნოლოგიური ჰაბის დაგეგმილ გახსნასთან დაკავშირებით Business Insider Georgia-სთან საუბრისას განაცხადა. დეპუტატის თქმით, სან-ფრანცისკო არის ერთგვარი ტექნოლოგიური მექა, სადაც იკრიბებიან მსოფლიოს საუკეთესო ტვინები.

„პირველ რიგში სან ფრანცისკოში საქართველოს ფარგლებს გარეთ პირველი ტექნოლოგიური ჰაბი ამოქმედდება არის მისასალმებელი. ძალიან კარგია იმიტომ, რომ ბევრ ქართველს ექნება შესაძლებლობა, რომ თავიანთი სტარტაპ კომპანიები სან-ფრანცისკოში წარმოაჩინონ. სან-ფრანცისკო არის ერთგვარი ტექნოლოგიური მექა, სადაც იკრიბებიან მსოფლიოს საუკეთესო ტვინები ყველა მიმართულებით და ასევე, ინვესტორებიც. ეს ინვესტორები ეძებენ საუკეთესო სტარტაპებს, რომელიც თეორიულად გახდება უნიკორნი. ამისათვის, ყოველწლიურად ჩააქვთ რამდენიმე ასობით მილიონი დოლარი და ხარჯავენ იმ მიზნით, რომ თუ ერთმაც გაამართლა, ეს უკვე ნიშნავს რომ რამდენიმე უნიკორნს შექმნიან, ანუ მილიარდიან კომპანიას გააკეთებენ.

ჩვენი ქვეყნისთვის, ეს სიახლე არის მნიშვნელოვანი, რაც შეუწყობს ხელს ჩვენი სტარტაპერების წარმოჩენას და შექმნის შესაძლებლობას, რომ ჩვენი სტარტაპები უფრო მეტად განვითარდნენ და მოიზიდონ უცხოური კაპიტალი და ცოდნა. მე ჩემს თავზე მაქვს გამოცდილი, ვყოფილვარ იქ და ძალიან საინტერესოა. ამავდროულად ძალიან რთულია. ჩვენი ქვეყნისთვის და ჩვენი სტარტაპ ეკოსისტემისთვის ეს არის ძალიან წინ გადადგმული ნაბიჯი“, - აღნიშნა ვაკო თურნავამ. 

დეპუტატის თქმით, აღნიშნული გადაწყვეტილება ნიშნავს იმას, რომ საქართველო კიდევ ერთხელ მოინიშნა საერთაშორისო რუკაზე. 

აღსანიშნავია, რომ დღეს ცნობილი გახდა, აშშ-ში, ქალაქ სან ფრანცისკოში საქართველოს ფარგლებს გარეთ პირველი ტექნოლოგიური ჰაბი გაიხსნება, რომლის მეშვეობით ქართული სტარტაპ კომპანიები უფრო მარტივად შეძლებენ უცხოეთის ბაზრებზე გასვლასა და საერთაშორისო ინვესტორებთან წვდომას გლობალური ტექნოლოგიებისა და ინოვაციების ცენტრში, ე.წ. სილიკონ ველიზე. ტექნოლოგიური ჰაბის მეშვეობით შესაძლებელი იქნება საქართველოს ინოვაციების ეკოსისტემით გლობალური ტექნოლოგიური კომპანიების, უცხოური ვენჩურული ფონდებისა და ენჯელ - ინვესტორთა ქსელების დაინტერესება და ქვეყანაში შესაბამისი ინვესტიციების მოზიდვა.

ტექნოლოგიური ჰაბი, რომელსაც ეკონომიკისა და მდგრადი განვითარების სამინისტროს  ინოვაციებისა და ტექნოლოგიების სააგენტო საგარეო საქმეთა სამინისტროს ხელშეწყობით გახსნის,  სან ფრანცისკოში საქართველოს გენერალური საკონსულოს ბაზაზე ამოქმედდება. საკონსულო სან ფრანცისკოში 2020 წლიდან ფუნქციონირებს და მნიშვნელოვან როლს ასრულებს გლობალური ტექნოლოგიებისა და ინოვაციების ცენტრში - სილიკონ ველიზე საქართველოს ინოვაციების ეკოსისტემის წარმოჩენასა და ქართული სტარტაპების საქმიანობის ხელშეწყობაში. ჰაბის მეშვეობით საქართველო შეძლებს საერთაშორისო არენაზე უკეთ მოახდინოს განვითარებული ინოვაციური სტარტაპ ეკოსისტემის მქონე ქვეყნის პოზიციონირება. აღსანიშნავია, რომ საქართველო პირველი ქვეყანა იქნება რეგიონში, რომელიც სილიკონის ველზე ტექნოლოგიურ ჰაბს გახსნის.

ტექნოლოგიური ჰაბის საქმიანობა მიმართული იქნება ქართული სტარტაპების “ნეთვორქინგის” გაძლიერებაზე პოტენციურ ინვესტორებთან და სხვა ტექნოლოგიურ სტარტაპებთან, რაც გულისხმობს დემო დღეებს საერთაშორისო ინვესტორებისთვის, B2B შეხვედრებს პოტენციურ პარტნიორებთან, კლიენტებთან და ინვესტორებთან და პრეზენტაციებს საქართველოს ინოვაციების ეკოსისტემის შესახებ. გარდა ამისა, ასევე მოხდება ქართული სტარტაპების მხარდაჭერა ბიზნესის მიმართულებით, რაც გულისხმობს იურიდიულ და ბიზნეს კონსულტაციებს აშშ ბაზარზე შესვლისთვის, ოფისის სივრცით სარგებლობას ქართული სტარტაპებისთვის და ბიზნეს კონტაქტების ბაზის შექმნას და გაზიარებას.

სან ფრანცისკოში ტექნოლოგიური ჰაბის გახსნის მიზნით საქართველოს ეკონომიკისა და მდგრადი განვითარებისა და საგარეო საქმეთა სამინისტროებს შორის მემორანდუმი გაფორმდება. შედეგად, ორი სამთავრობო უწყება გააძლიერებს თანამშრომლობას საქართველოს ინოვაციური ეკოსისტემისა და საინფორმაციო ტექნოლოგიების განვითარების და ინვესტიციებისა და ინოვაციების ხელშემწყობი ინიციატივების განხორციელების მიმართულებით.

აღსანიშნავია, რომ დღეის მონაცემებით, საქართველოს ინოვაციების და ტექნოლოგიების სააგენტოს თანადაფინანსების გრანტების პროგრამის ფარგლებში 279 სტარტაპია დაფინანსებული, რომელთა შორის ახალგაზრდების წილი 43 პროცენტია. მათი საქმიანობის შედეგად შეიქმნა 4000-მდე ახალი სამუშაო ადგილი. დაფინანსებულმა სტარტაპებმა 545 მილიონი ლარის კერძო ფინანსური სარგებელი მოიპოვეს, ხოლო სააგენტოს დაარსებიდან დღემდე საგრანტო პროგრამებით სტარტაპებისთვის გაცემული თანხა 43.5 მილიონ ლარს შეადგენს.