საქართველოს ეკონომიკისა და მდგრადი განვითარების მინისტრის მოადგილემ ირაკლი ნადარეიშვილმა და ინოვაციების და ტექნოლოგიების სააგენტოს თავმჯდომარემ ავთანდილ კასრაძემ ქუთაისის ტექნოლოგიური ჰაბის სარემონტო-სარეაბილიტაციო სამუშაოები დაათვალიერეს. როგორც ავთანდილ კასრაძემ აღნიშნა, სარეაბილიტაციო, სარეკონსტრუქციო და სარემონტო სამუშაოები გრაფიკის მიხედვით მიმდინარეობს, როგორც საინჟინრო კომუნიკაციების, ასევე მოპირკეთების ნაწილში.

„თითქმის დასრულებულია გარე პერიმეტრის მოწყობა, დამონტაჟებულია განათება, რომელიც შენობას კიდევ უფრო თვალწარმტაც იერს შესძენს, შიდა სარემონტო სამუშაოებიც აქტიურ ფაზაშია. დიდი პასუხისმგებლობით ვემზადებით, რომ ეს უნიკალური სივრცე უახლოეს მომავალში გახდეს ხელმისაწვდომი საქართველოს მოსახლეობისთვის.“ - განაცხადა GITA - ს თავმჯდომარემ.

ავთანდილ კასრაძემ ქუთაისის ტექნოლოგიური ჰაბის მნიშვნელობასა და დანიშნულებაზეც ისაუბრა.

“გადაჭარბების გარეშე შემიძლია გითხრათ, რომ ქუთაისში, პარლამენტის ყოფილ შენობაში, სამხრეთ კავკასიაში უნიკალური ტექნოლოგიური ჰაბი იქმნება. ეს იქნება მულტიფუნქციური ცენტრი, რომელიც გააერთიანებს მსოფლიოში ერთ-ერთ უნიკალურ ინტერაქციულ-ტექნოლოგიურ მუზეუმს, ტექნოლოგიურ პარკს, სხვადასხვა ტიპის ლაბორატორიებს, ინოვაციურ და მაღალტექნოლოგიურ სასწავლო ცენტრს, რომელიც უზრუნველყოფს, როგორც სკოლის მოსწავლეების, ისე ნებისმიერი ასაკის ადამიანის მომზადებას საერთაშორისოდ აღიარებულ, პრესტიჟულ პროფესიულ მიმართულებებში. ჰაბში განთავსებული იქნება ასევე ხელოვნური ინტელექტის ცენტრი, რომელიც უდიდეს წვლილს შეიტანს ჩვენი ქვეყნის ციფრული ტრანსფორმაციის პროცესში, ეკონომიკისა და ქართული ბიზნესის კიდევ უფრო სწრაფ განვითარებაში.”- აღნიშნა ინოვაციების სააგენტოს თავმჯდომარემ.

აღსანიშნავია, რომ სამეცნიერო და ტექნოლოგიური მუზეუმისთვის დასრულდა ინტერაქტიული ექსპონატების მოწოდება. მონტაჟი მუზეუმის სივრცის რეკონსტრუქციის დასრულების შემდეგ იგეგმება.

პარალელურად, პროექტის განვითარების პროცესში ,ეტაპობრივად, ხდება ჰაბისთვის განკუთვნილი ავეჯის, აუდიო-მედია ტექნიკის, სხვადასხვა ტექნოლოგიური ლაბორატორიების დანადგარებისა და მოწყობილობების, ინსტრუმენტების მოწოდება. სამრეწველო ინოვაციებისა (FabLab) და 3D პრინტერების ლაბორატორია, ელექტრონიკის, რობოტიკის, დრონების, STEAM, IoT, ვირტუალური რეალობის სტუდია და სხვა ექსპერიმენტული ლაბორატორიები სტუდენტებისა და სტარტაპებისთვის, მრავალმხრივი ექსპერიმენტების ჩატარებისა და ინოვაციური და ტექნოლოგიური პროტოტიპების შექმნის შესაძლებლობას იძლევა.

ქუთაისის ტექნოლოგიურ ჰაბში განთავსდება ტექნოლოგიური პარკი, სხვადასხვა მიმართულების ტექნოლოგიური ლაბორატორიები, co-working და მრავალფუნქციური საკონფერენციო სივრცე, რომელიც გათვლილია 400 ვიზიტორზე, ინტერაქტიულ- სამეცნიერო და ტექნოლოგიური მუზეუმი, IT და ტექნოლოგიური კომპანიების ოფისები და TUMO-ს კრეატიული ტექნოლოგიების საერთაშორისო ცენტრი, რომელიც გააერთიანებს 11 მიმართულებას.

დასრულების ეტაპზეა შენობის ფიბრო-ბეტონის სახურავზე ამიერკავკასიაში ყველაზე მასშტაბური მუდმივი მედია განათების ინსტალაციის მოწყობა 3D projection mapping მეთოდით, რომელთან ინტერაქციაც შესაძლებელი იქნება სპეციალურად შექმნილი software-ის მეშვეობით.

ქუთაისის ტექნოლოგიური ჰაბი მიზნად ისახავს ინოვაციების, განათლებისა და ტექნოლოგიური მეწარმეობის ხელშეწყობას, თანამედროვე ინფრასტრუქტურის შექმნასა და რეგიონში მაღალი, დამატებითი ღირებულების მქონე საქმიანობების განვითარებას. ქუთაისში, საქართველოს პარლამენტის ყოფილ შენობაში განთავსებული ტექნოლოგიური ჰაბი იქნება რეგიონში ყველაზე მასშტაბური ინოვაციებისა და ახალი ტექნოლოგიების მიზიდულობის ცენტრი.