ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს ორგანიზებით, თბილისის ტექნოპარკში, სტარტაპებთან შეხვედრა - ScaleUP from Georgia გაიმართა, რომლის ფარგლებშიც მონაწილეებს შესაძლებლობა ჰქონდათ ხელმძღვანელი პირებისგან საერთაშორისო გამოფენებისა და პლატფორმების შესახებ მიეღოთ ინფრომაცია.

როგორც GITA - ს თავმჯდომარემ ავთანდილ კასრაძემ შეხვედრაზე აღნიშნა, საქართველოს ინოვაციების და ტექნოლოგიების სააგენტო სისტემურად უჭერს მხარს ინოვაციების ეკოსისტემის განვითარებას, სადაც ქართულ სტარტაპებს აქვთ წვდომა გლობალურ ცოდნაზე, პარტნიორებსა და ბაზრებზე.

“ ScaleUP from Georgia სწორედ ამ მიზანს ემსახურება — დავეხმაროთ მეწარმეებს სწორად გაიგონ საერთაშორისო შესაძლებლობები, მოემზადონ კონკურენციისთვის და სახელმწიფოს მხარდაჭერით უფრო სწრაფად გახდნენ გლობალური მოთამაშეები. ასეთი შეხვედრები გვაძლევს შესაძლებლობას არა მხოლოდ გავუზიაროთ მათ ინფორმაცია, არამედ მოვისმინოთ სტარტაპების რეალური საჭიროებები და მათზე მორგებული პოლიტიკა შევქმნათ. ჩვენი პრიორიტეტია ქართული ინოვაციური ბიზნესის გლობალური ინტეგრაცია და მთავარი ამოცანა, საქართველო ვაქციოთ რეგიონულ ჰაბად ინოვაციებისა და ტექნოლოგიური მეწარმეობისთვის.” - განაცხადა ავთანდილ კასრაძემ.

შეხვედრაზე საუბარი შეეხო გლობალურ ტექნოლოგიურ ტენდენციებსა და სტარტაპებს შორის კონკურენტუნარიანობის შენარჩუნებას სწრაფად ცვალებად გლობალურ გარემოში. ღონისძიების სტუმრებმა მოისმინეს ასევე პრეზენტაცია ქართველი სტარტაპებისთვის ხელმისაწვდომ საერთაშორისო შესაძლებლობებზე, მათ შორის, GITA-ს მხარდაჭერით მიმდინარე პროგრამებსა და ტექნოლოგიურ ღონისძიებებზე. ასევე გაიმართა დიალოგი სტარტაპების საჭიროებების შესახებ.