ქუთაისის ტექნოლოგიური ჰაბი შინაარსობრივად უკვე სრულად მზადაა, თუმცა გახსნა შენობის ინფრასტრუქტურული ხარვეზების გამო შეფერხდა და მისი ამოქმედება სავარაუდოდ გაზაფხულის ბოლოს იგეგმება. ამის შესახებ განცხადება ტელეკომპანია „მაესტროს“ ეთერში გადაცემა Business Insider Georgia-ში სტუმრობისას საქართველოს ინოვაციებისა და ტექნოლოგიების სააგენტოს (GITA) თავმჯდომარემ, ავთანდილ კასრაძემ ისაუბრა.

მისი თქმით, ჰაბი რეგიონში ერთ-ერთ ყველაზე მასშტაბურ ტექნოლოგიურ სივრცედ ჩამოყალიბდება, სადაც განთავსდება ინტერაქტიული მუზეუმი, თანამედროვე ლაბორატორიები და საგანმანათლებლო პროგრამები, რაც ახალგაზრდებში ტექნოლოგიების მიმართ ინტერესის ზრდასა და ახალი თაობის განვითარებას შეუწყობს ხელს.

„ქუთაისის ტექნოლოგიური ჰაბის მიმართულებით - შინაარსობრივ ნაწილში ყველაფერი უკვე მზად არის იმისთვის, რომ ხვალვე გავხსნათ ქუთაისის ტექნოლოგიური ჰაბი. პრობლემა არის თვითონ შენობის ნაწილში.

შენობა საკმაოდ რთული ნაგებობაა და ჩვენ ვცდილობთ აღმოვფხვრათ ყველა ის ხარვეზი, რომელიც მას მშენებლობამდე ჰქონდა, რათა საქართველოს მოსახლეობას სრულფასოვანი და კომფორტული სივრცე შევთავაზოთ.

აღსანიშნავია, რომ შენობის დაახლოებით ორი მესამედი განკუთვნილია ახალგაზრდებისთვის, ბავშვებისთვის და ზოგადად მომავალი თაობისთვის, რათა მათ უკეთ შეიმეცნონ ტექნოლოგიური პროცესები. შესაბამისად, ჩვენი მიზანია მათ დავახვედროთ საუკეთესო გარემო - სათანადო კონდიცირებითა და ჰაერის სისტემებით, რაც აქამდე მუდმივ პრობლემას წარმოადგენდა.

ამ მიმართულებით, ვვარაუდობთ, რომ გაზაფხულის ბოლოს უკვე გვექნება შესაძლებლობა, ობიექტი გავხსნათ.

აქ იქნება წარმოდგენილი ინტერაქციული და ტექნოლოგიური სამხრეთ კავკასიაში ყველაზე დიდი მუზეუმი, რაც შესაძლებლობას აძლევს რომ საქართველოს მოსახლეობას შეუყვარდეს ტექნოლოგიური მიმართულება - შეიმეცნოს, შეეხოს, თვითონ გააკეთოს სხვადასხვა ტიპის მაქინაციები, რითაც ისინი დაინახავენ თუ ტექნოლოგიური პროცესი როგორი მარტივია, როგორ შეიძლება ამ პროცესის ნაწილი იყო. ასევე მსოფლიო დონის კრეატიული მიმართულებების სკოლა შეიქმნება, რომელიც 11 მიმართულებით საქართველოს სკოლის მოსწავლეებს მისცემს ცოდნა-განათლებას, დაწყებული ხელოვნური ინტელექტიდან გაგრძელებული მუსიკით და ანიმაციებით და ვიდეოგრაფიკით და ასე შემდეგ. ეს მხოლოდ სკოლის მოსწავლეებისთვის არის - ექსკლუზიურად მათთვის და ბევრი ერთობლიობაში ძალიან საინტერესო პროცესი. ყველაზე მაღალი დონის ლაბორატორიები იქ იქნება წარმოდგენილი, როგორც მაგალითად მეტალის 3D პრინტერი, ასევე რობოტი ტექნიკის მიმართულება, გაფართოებული რეალობა, ვირტუალური რეალობა და ყველა ეს შესაძლებლობა იქნება საქართველოს მოსახლეობისთვის, რომ არა მარტო ტელევიზორში ვუყუროთ ან YouTube-ზე ვუყუროთ ტექნოლოგიურ პროცესს, არამედ შევიდეთ და ჩვენ თვითონ შევქმნათ ის იდეები, რომელიც საქართველოს მოქალაქეებს უხვად აქვთ“, - აცხადებს ავთანდილ კასრაძე.