ComCom-ის მედიალაბი ათასწლეულის ინოვაციის კონკურსის ფინალისტებს პრაქტიკულ სემინარებს ჩაუტარებს
კომუნიკაციების კომისია და ათასწლეულის ინოვაციის კონკურსი (MIA) პარტნიორობას იწყებენ. კონკურსი 2014 წელს, აშშ-ის საელჩოს მხარდაჭერით დაფუძნდა და მეცნიერების, ტექნოლოგიების, ინჟინერიის და მათემატიკის (STEM) მიმართულებით მოსწავლეების დაინტერესების გაზრდას ისახავს მიზნად. კონკურსი ყოველ წელს ტარდება და სულ სამი ეტაპისგან შედგება. წელს ფინალურ ეტაპზე გადასულ გუნდებს კომუნიკაციების კომისიის მედიალაბი პროექტების დახვეწაში დაეხმარება.
კერძოდ, ათასწლეულის ინოვაციის კონკურსის ფინალისტებს, მედიალაბი გაუწევს მენტორობას პროტოტიპის შექმნასა და ტესტირების საკითხებში, ასევე, ჟიურის წინაშე წარსადგენი პრეზენტაციის მომზადებაში. საგულისხმოა, რომ მედიალაბის მენტორები კონკურსში მონაწილე გუნდებს ინდივიდუალურად დაეხმარებიან და მათთვის სასურველ საკითხებზე კონსულტაციას გაუწევენ.
MIA-ს კონკურსის ფარგლებში, 13-დან 17 წლამდე მოსწავლეებს შეუძლიათ 2-4 მოსწავლისგან შემდგარი გუნდების ჩამოყალიბება და პროექტების წარდგენა შემდეგ კატეგორიებში: კოსმოსი და ავიაცია; კიბერტექნოლოგიები და უსაფრთხოება; გარემოს დაცვა, ენერგეტიკა და კლიმატის ცვლილება; ჯანდაცვა და კვება; გამოყენებითი ტექნოლოგიები და აპლიკაციები; რობოტექნიკა.
კონკურსს ათასწლეულის ფონდი ახორციელებს. კონკურსში პირველ ადგილზე გასული გუნდი აშშ-ში, NASA-ს კოსმოსურ ცენტრს ესტუმრება და გუნდის წევრები NASA-ს საზაფხულო უნივერსიტეტში ჩაირიცხებიან. მეორე ადგილის მფლობელები სტენფორდის უნივერსიტეტში, რობოტექნიკის საზაფხულო პროგრამისთვის გაემგზავრებიან, ხოლო მესამე ადგილის მფლობელები შვეიცარიაში, ბირთვული კვლევების ევროპულ ცენტრს საგანმანათლებლო ვიზიტის ფარგლებში ესტუმრებიან.
კონკურსის ფინალურ ეტაპზე ComCom-ის მედიალაბის ჩართულობა მნიშვნელოვნად დაეხმარება ახალგაზრდებს დახვეწონ პროექტები და განივითარონ პრაქტიკული უნარები. აღნიშნული თანამშრომლობა კი კომუნიკაციების კომისიისთვის იქნება ახალი შესაძლებლობა, ხელი შეუწყოს STEM განათლების პოპულარიზაციას ქვეყანაში.
დღის ტოპ 10 სიახლე
სხვა სიახლეები
27.08.2025.13:20
საქართველოს ინოვაციების და ტექნოლოგიების სააგენტოს ორგანიზებით, კასპის ტექნოპარკში, 6-7 სექტემბერს, ჰაკათონი Energo Hack 2025 გაიმართება. ჰაკათონის მიზანია საქართველოს მასშტაბით ენერგეტიკის სექტორში პრობლემების/გამოწვევების შესახებ მოკვლევა, შემდეგ კი მათი გადაწყვეტის მიზნით, ინოვაციური მეთოდებისა და ტექნოლოგიების გამოყენება და კონკრეტული პროტოტიპების შექმნა. Energo Hack 2025 მონაწილეობა შეუძლიათ მიიღონ ენერგეტიკის დარგის მწარმოებელ კომპანიებს, ენერგეტიკის დარგით დაინტერესებულ მეწარმეებს, სტარტაპებს და სტუდენტებს, პროტოტიპირებით, ინჟინერიით (განსაკუთრებით ენერგო/ელექტრო), პროგრამირებით, დიზაინითა და ტექნოლოგიური მეწარმეობით დაინტერესებულ პირებს.
ჰაკათონის ფორმატი რამდენიმე ფაზად იყოფა და მოიცავს ონლაინ ტრენინგს, მონაწილეებისთვის დავალებების ონლაინ რეჟიმში მიცემას, თეორიულ ნაწილს მსოფლიოში არსებულ ინოვაციებზე ენერგეტიკის სექტორში, მენტორინგ სესიებს, პროტოტიპირების პროცესს, Pitch Deck-ის მომზადებასა და დემო დღეს.
ჰაკათონი მიზნად ისახავს პროექტში მონაწილე კომპანიებისა და ორგანიზაციების დაკავშირებას ინოვაციურ და ტექნოლოგიურ იდეებზე მომუშავე ადამიანებთან და მათ შორის ახალი საქმიანი ურთიერთობის ჩამოყალიბების სტიმულირებას; კომერციალიზაციის მქონე ინოვაციური/ტექნოლოგიური სტარტაპ იდეებისა და პროტოტიპების შექმნას; რეგიონებში მცხოვრებ დაინტერესებულ ადამიანებში ინოვაციური აზროვნების, უნარების განვითარებას; რეგიონებში მცხოვრები ახალგაზრდების ჩართულობის ზრდას საქართველოს ინოვაციურ და სტარტაპ ეკოსისტემაში.
სარეგისტრაციო ბმული:
http://apps.mygita.ge/zs/2jCl3T
პროექტი დაფინანსენულია საქართველოს ინოვაციების და ტექნოლოგიების სააგენტოს მიერ.
ჰაკათონის მხარდამჭერი - სემეკი (საქართველოს ენერგეტიკისა და წყალმომარაგების მარეგულირებელი ეროვნული კომისია);
ჰაკათონის გენერალური სპონსორი - სემეკის მიერ დაფუძნებული ენერგეტიკის სასწავლო ცენტრი;
ჰაკათონის პარტნიორი ორგანიზაციები - სსე (საქართველოს სახელმწიფო ელექტროსისტემები), GRPC (საქართველოს განახლებადი ენერგიის კომპანია), ლურჯი ოკეანე.