25 ადგილზე 500 აპლიკაცია - რამ განაპირობა Lineate Dev School-ის კურსზე მზარდი მოთხვნა

ტექნოლოგიები

Self.HR - ქართული ტექ კომპანია, რომელმაც HR პროცესების მართვის ახალი, ციფრული სტანდარტი შექმნა

18.08.2025.14:00

Self.HR ქართული ტექნოლოგიური კომპანიაა, რომელიც 2021 წლიდან ქმნის ინოვაციურ, ციფრულ პლატფორმას HR პროცესების ავტომატიზაციისა და გამარტივებისთვის. მეტი ინფორმაციისთვის, Business Insider Georgia კომპანიის თანადამფუძნებელს, ნინო ფეიქრიშვილს ესაუბრა.

როგორია კომპანიის საქმიანობის სპეციფიკა, როდის დაიწყეთ საქმიანობა და რას სთავაზობთ მომხმარებლებს?

“Self.HR ქართული ტექნოლოგიური კომპანიაა, რომელიც 2021 წლიდან ქმნის ინოვაციურ, ციფრულ პლატფორმას HR პროცესების ავტომატიზაციისა და გამარტივებისთვის.

Self.HR სისტემა პარტნიორ კომპანიებს შესაძლებლობას აძლევს, ერთი სივრციდან მართონ სრული HR პროცესი - თანამშრომლის შერჩევიდან და აყვანიდან მის offboarding-მდე და გაიმარტივონ ადამიანური რესურსების მართვა.
ჩვენი კვლევები პარტნიორებთან აჩვენებს, რომ Self.HR სისტემის გამოყენება რუტინულ ადმინისტრაციულ დავალებებზე დახარჯულ დროს 60%-ით, ხოლო ხარჯებს 30%-ით ამცირებს.

გვახარებს ის ფაქტი, რომ დაფუძნებიდან 4 წელიწადში Self.HR საქართველოში ყველაზე მსხვილ SaaS მოდელის ტექნოლოგიურ კომპანიად იქცა და ინოვაციური მიდგომებით სრულად შეცვალა ორგანიზაციების ხედვა პროცესების გაციფრულების მიმართ.
ვამაყობთ იმითაც, რომ ჩვენი პარტნიორი კომპანიები უმსხვილესი საერთაშორისო პლატფორმებიდან გადმოვიდნენ სრულიად ქართულ HR სისტემაზე, რაც ნიშნავს იმას, საქართველოშიც შესაძლებელია შეიქმნას საერთაშორისო სტანდარტების, კონკურენტუნარიანი პროდუქტი.

დღეს ჩვენი პლატფორმით 1200-ზე მეტი ქართული და საერთაშორისო კომპანია მართავს HR პროცესებს, ვებ და მობილური აპლიკაციებით კი 120,000-ზე მეტი ადამიანი ყოველდღიურად სარგებლობს.”

როგორ აფასებთ მოთხოვნას ზოგადი თვალსაზრისით?

“Self.HR რეალურად ქართული ბაზრის მოთხოვნაზე საპასუხოდ შევქმენით. ციფრულ HR პლატფორმაზე მოთხოვნა ნამდვილად მაღალი იყო, თუმცა იმ დროისთვის არსებული უცხოური და ადგილობრივი სისტემების გამოყენება საკმაოდ მსხვილ წინასწარ ინვესტიციას მოითხოვდა, რაც განსაკუთრებით რთული იყო მცირე და საშუალო ბიზნესებისთვის.

სწორედ ამიტომ ავირჩიეთ SaaS ბიზნეს მოდელი და HR ციფრული ტრანსფორმაცია ხელმისაწვდომი გავხადეთ ყველასთვის: როგორც მცირე, ასევე, საშუალო და მსხვილი ბიზნესისთვის. თუმცა დასაწყისში საკმაოდ დიდი ძალისხმევა დაგვჭირდა ორგანიზაციებისთვის იმის დასამტკიცებლად, რომ ნამდვილად შესაძლებელია დიდი წინასწარი ინვესტიციის გარეშე ისარგებლონ სრულყოფილი HR სისტემით და ერთი სივრციდან მართონ სრული HR პროცესი — თანამშრომლის აყვანიდან მის offboarding-მდე.

ძალიან გვახარებს ის ფაქტი რომ დღეს, გარდა მსხვილი ორგანიზაციებისა, ხშირად მოგვმართავენ ისეთი კომპანიებიც, რომლებიც ახლა იწყებენ საქმიანობას და სურთ თავიდანვე მარტივად, სწრაფად და ციფრულად მართონ ადამიანური რესურსი და შექმნან თანამედროვე, თანამშრომლებზე ორიენტირებული ორგანიზაციული კულტურა.

რას მიიჩნევთ კომპანიის კონკურენტულ უპირატესობად?

“ვფიქრობ, მთავარი მიზეზი, რატომაც ირჩევენ კომპანიები Self.HR-ს, სისტემის All-in-One პრინციპია. რაც გულისხმობს იმას, რომ პლატფორმა მოიცავს HR პროცესების მართვის საჭირო ყველა მოდულს.
შესაბამისად, Self.HR სისტემის ადმინისტრატორს ერთ სივრცეში აქვს თავმოყრილი ყველა ხელსაწყო, რაც ეხმარება, დაზოგოს დრო და უფრო ორგანიზებული და მარტივი გახადოს მუშაობის პროცესი.

ჩვენი კომპანიის ერთ-ერთ მთავარ კონკურენტულ უპირატესობად იქცა პროდუქტის ხელმისაწვდომობაც, ანუ SaaS ბიზნესი მოდელი. გარდა იმისა, რომ SaaS მოდელმა მომსახურება ფინანსურად ხელმისაწვდომი გახადა, ასევე უზრუნველყო სისტემის სწრაფად დანერგვის და მუდმივად განახლებული სერვისის მიღების შესაძლებლობა, რაც ბევრად უმარტივებს ორგანიზაციებს HR ციფრულ ტრანსფორმაციას.

Self.HR-ის კიდევ ერთი მთავარი ღირებულება და მათ შორის უპირატესობაც, ინფორმაციული უსაფრთხოების საერთაშორისო სტანდარტებით დაცვაა.
2023 წელს Self.HR-ში ინფორმაციული უსაფრთხოების საერთაშორისო სტანდარტი დავნერგეთ და ISO/IEC 27001 სერტიფიკატი მივიღეთ.
წელს კომპანიაში დავნერგეთ ISO27017, ISO27018 სტანდარტები, რაც უზრუნველყოფს Cloud სერვისებთან დაკავშირებული უსაფრთხოების პროცესების კიდევ უფრო მაღალ დონეზე მართვას. აგვისტოს ბოლოსთვის კი ვემზადებით TÜV Rheinland-ის აუდიტის პროცესისთვის.
დღეს Self.HR სისტემა ერთადერთი ქართული HR პლატფორმაა ბაზარზე, რომელიც ინფორმაციული უსაფრთხოების ევროპული სტანდარტების სრული დაცვით იქმნება და ფლობს ISO/IEC 27001, 27017, 27018 სერტიფიკატებს.

და ბოლოს, ჩვენი კომპანიის წარმატება განაპირობა საუკეთესო სამომხმარებლო გამოცდილებამ, რომელსაც Self.HR-ის გუნდი ქმნის. დღეს ეს ადამიანები დგანან ყველაზე მნიშვნელოვანი ცვლილებებისა და განვითარების უკან და ზრუნავენ იმაზე, რომ ყოველი წამი, რომელსაც მომხმარებლები Self.HR-თან ინტერაქციას უთმობენ მათთვის საუკეთესო გამოცდილება იყოს.”

როგორია კომპანიის სამომავლო გეგმები?

“2024 ჩვენთვის მნიშვნელოვანი წელი იყო. პირველად გავცდით ქვეყნის ფარგლებს და უზბეკეთის ბაზარზე შევედით. აქვე განვათავსეთ სერვერული ინფრასტრუქტურა და უკვე ვემსახურებით რამდენიმე უზბეკურ კომპანიას.

2025 წლისთვის სწორედ ცენტრალურ აზიაზე გავაკეთებთ ძირითად ფოკუსს. გეგმაში გვაქვს, კიდევ უფრო კარგად გავაცნოთ ჩვენი პროდუქტი უზბეკურ და ყაზახურ ორგანიზაციებს და უფრო მეტი საერთაშორისო პარტნიორი შევიძინოთ.

პარალელურად, ვაგრძელებთ Self.HR სისტემის განვითარებას. წლის მთავარი პროექტი არის AI-ის ინტეგრაცია სისტემის ყველა მოდულში.

გარდა ამისა, ვმუშაობთ 2 ახალ პროდუქტზე, რომლებზეც ინფორმაციას ჩვენს მომხმარებლებს სულ მალე გავუზიარებთ.”

ცნობისთვის, დამატებითი ინფორმაციისთვის დაინტერესებულ პირებს შეუძლიათ კომპანიის საიტს ესტუმრონ : http://www.self.hr/