KovZy - ის პლატფორმით უკვე 300-მდე რესტორანი სარგებლობს
ონლაინ გაყიდვების პირველი და ერთადერთი პლატფორმა - სტარტაპ ბიზნესი KovZy ადგილობრივ ბაზარზე უფრო და უფრო მოთხოვნადი ხდება.
თითქმის 2 წელია, რაც კომპანია ბაზარზეა და მისი მომსახურებით უკვე 300-მდე რესტორანი სარგებლობს.
ინოვაციური პლატფორმა KovZy ალექსანდრე ცინცაძემ და სანდრო დარსაველიძემ დააფუძნეს.
როგორც სანდრო დარსაველიძე Business Insider Georgia- თან ამბობს, მათ შექმნეს პირდაპირი გაყიდვების არხი, რაც რესტორნებს აძლევს შესაძლებლობას, მიიღონ ონლაინ გადახდები და მომხმარებლებს დროულად მიაწოდონ შეკვეთები.
„KovZy არის ელექტრონული კომერციის მწარმოებელი, ტექნოლოგიის მიმწოდებელი პლატფორმა კვების ობიექტებში. საქართველოში სრულიად ინოვაციური სერვისია, მსოფლიოში არის რამდენიმე კონკურენტი, ყველა მათგანი ახლა იწყებს განვითარებას. გლობალური ბაზრებისთვისაც სიახლეა, ამიტომ კონკურენტებთან შეჯიბრი თანაბარ პირობებში გვიწევს.
თითქმის 2 წელია, რაც საქართველოს ბაზარზე ვოპერირებთ და დღესდღეობით 300 -მდე რესტორანია რეგისტრირებული ჩვენს პლატფორმაზე და სარგებლობენ ჩვენი სერვისით“, - ამბობს სანდრო დარსაველიძე.
KovZy-ს კონცეფცია მარტივია: ნებისმიერ კვების ობიექტს - რესტორანს, კაფეს, საცხობს, სწრაფი კვების ობიექტს და სხვა, ვისაც სურვილი აქვს, რომ ჰქონდეს საკუთარი პერსონალური ვებ-გვერდი, რეგისტრირდებიან კომპანიის პლატფორმაზე და რეგისტრაციიდან დაახლოებით 5 წუთში მათი ვებ-გვერდი უკვე მზადაა.
„შემდეგი ეტაპია კონტენტის აკრეფა - კონკრეტული ობიექტის კერძების ფოტოები, მენიუ, აღწერილობა და ფასები. როდესაც კონტენტი აიტვირთება, ვებ-გვერდი უკვე მზად არის. შემდეგ უკვე ერთვება გადახდების ინტეგრაცია, რომ მომხმარებლებმა შეძლონ მომსახურების მიღება და კვების პროდუქტების შეძენა.
3 დღეში რესტორანს შეუძლია საკუთარი ვებ-გვერდიდან დაიწყოს გაყიდვები. რაც შეეხება მიტანის პროცესს, ამის დალაგებაშიც ვეხმარებით კვების ობიექტებს პარტნიორი კომპანიების მეშვეობით. ვაკავშირებთ მათ საკურიერო კომპანიების წარმომადგენლებთან და საბოლოდ მხარეები თავად რიგდებიან პირობებზე და უკვე გაყიდული პროდუქტების ადგილზე მიტანაში ეხმარებიან“, - განმარტავს Business Insider Georgia- თან სანდრო დარსაველიძე.
რაც შეეხება მომსახურების საფასურს, ვებგვერდის გამართვა საწყის ეტაპზე უფასოა.
1 თვის შემდეგ ფიქსირებული საკომისიო 99 ლარია, რასაც გაყიდვებიდან 1 % ემატება.
KovZy-ს სამომავლო გეგმაშია მომსახურების ექსპორტიც. ტექნიკურად აბსოლუტურად გამართული პლატფორმა უკვე გლობალური გამოწვევებისთვისაც მზადა არის. პირველი ქვეყანა აზერბაიჯანია, სადაც KovZy-ის ინოვაციური სერვისი დაინერგება.
დღის ტოპ 10 სიახლე
სხვა სიახლეები
სიახლე „პლანტველისგან“ - ბიოსერტიფიცირებული, გამომშრალი მარწყვის ფანტელი
30.03.2026.16:00
მარწყვის წარმოებაში ბიო სერტიფიკატის მფლობელმა კომპანიამ „პლანტველმა“ მომხმარებელს სასარგებლო წასახემსებელი - მარწყვის ფანტელი შესთავაზა. ამის შესახებ Business Insider Georgia-ს კომპანიის დამფუძნებელმა, მანანა ანჯაფარიძემ განუცხადა.
„ჩვენს მეურნეობასთან არის გერმანული საშრობი, თანამედროვე მაღალი ხარისხის დანადგარებითა და კარგი ინფრასტრუქტურით. გადავწყვიტეთ, მარწყვი გამოგვეშრო, სატესტოდ პირველად შარშან ვცადეთ. ტესტირების პროცესი ძალიან წარმატებული აღმოჩნდა: გავიარეთ ყველა კომპონენტი, გამოვავლინეთ ყველა რისკ-ფაქტორი და დავადგინეთ, სად რა იყო საჭირო. ამის შემდეგ შევქმენით სრულფასოვანი პროდუქტი, მოვახდინეთ მისი ბრენდირება და გამოვუშვით ბაზარზე. ეს არის ჩვენი ბიო სერტიფიცირებული, გერმანულ საშრობში გამომშრალი მარწყვი, ყოველგვარი დანამტის გარეშე, ფანტელის ფორმით. იგი არის სასიამოვნო და სასარგებლო წასახემსებელი, ასევე იდეალურად გამოიყენება ფაფებში, იოგურტებში და კონდიტერიაში.
სამომავლოდ, გეგმაში გვაქვს ფანტელის მასშტაბური წარმოება “, - აცხადებს მანანა ანჯაფარიძე.
კომპანიამ ოფიციალურად დაარეგისტრირა სანერგე, რაც წლის ბოლოდან ნერგის რეალიზაციის შესაძლებლობას იძლევა.
„ჩვენ ოფიციალურად დავარეგისტრირეთ სანერგე. წლების განმავლობაში თავად ვზრდიდით ბიო ნერგს მარწყვის მისაღებად, იტალიელი კონსულტანტის დახმარებით. ზოგადად, მსოფლიო მასშტაბით პრობლემაა ბიო ნერგის მიღება, ამიტომ ჩვენი ნერგი ჩვენს გამოცდილებაზე დაფუძნებით მზადდებოდა. წლების განმავლობაში დაგროვილმა პრაქტიკამ გვაჩვენა, რომ ჩვენი ნერგი ძალიან მაღალი ხარისხისაა და ფერმერებისთვის საჭირო ყველა კომპონენტს აკმაყოფილებს, რაც მეურნეობის გაშენებისთვის მნიშვნელოვანია.
სანერგეს რეგისტრაცია მოგვცემს შესაძლებლობას, რომ სამომავლოდ ნერგის რეალიზაციაც მოვახდინოთ. წლევანდელ ნერგს, რომელსაც გამოვიყვანთ, უკვე იქნება სერტიფიცირებული სანერგედან. ჰექტარზე საჭიროა 50 000 ნერგი, ჩვენ კი 2 ჰექტარი გვაქვს. ნერგის გამოცვლა ხდება წელიწადში ერთხელ ან ორ წელიწადში ერთხელ, და ამ პროცესს აქამდე მხოლოდ ჩვენთვის ვახდენდით. წლის ბოლოდან კი ჩვენი ხარისხიანი და სერტიფიცირებული ნერგი სხვა მეურნეობებისთვისაც ხელმისაწვდომი იქნება “, აღნიშნავს კომპანიის დამფუძნებელი.
ცნობისთვის, “პლანტველის“ მეურნეობა მცხეთის მუნიციპალიტეტში, სოფელ მისაქციელში მდებარეობს.
ქართული პროდუქცია Anuga 2023-ზე: 23 კომპანია წარადგენს სასმელებსა და საკვებ პროდუქტებს გლობალურ გამოფენაზე
04.11.2023.00:00
ექსკლუზიურად SOLO მომხმარებლებსთვის 25%-იანი ფასდაკლება Digital Bus-ის აკადემიის ნებისმიერ კურსზე
20.08.2023.00:00
