საქართველოს 20-წლამდე ჯუდოკათა ნაკრების წევრი, თორნიკე გიგაური (66 კგ.), ახალგაზრდებში მსოფლიო ჩემპიონი გახდა. პერუს დედაქალაქ ლიმაში გამართულ ტურნირზე, სადაც ახალგაზრდა ჯუდოკები იღებენ მონაწილეობას, ქართველმა მებრძოლმა შესანიშნავი პერფორმანსი შემოგვთავაზა და ოქროს მედალს დაეუფლა.

ფინალურ შეხვედრაში, გიგაური ნეიტრალური დროშით მოასპარეზე აბხულახ პარშიევს დაუპირისპირდა და იპონით დაამარცხა. ბრძოლის დასრულებამდე ერთი წუთით ადრე, პარშიევი ვაზარით იგებდა, თუმცა გიგაურის შესანიშნავ გდებას ვერაფერი დაუპირისპირა.

ჯუდოს საერთაშორისო ფედერაციას (IJF) ქართველი ტალანტის მიმართ საქებარი სიტყვები არ დაუშურებია: “ფინალურ შეხვედრაში ერთმანეთს ორი “ანდერდოგი” დაუპირისპირდა. მათ დაამტკიცეს, რომ მსოფლიო დონეზე ყველაფერი შესაძლებელია.გიგაურმა ქართული ჯუდოკასთვის დამახასიათებელი სიმტკიცე და ფეთქებადობა შემოგვთავაზა”.

გიგაურის გამძლეობა და უტეხობა უთუოდ აღსანიშნავი დეტალია - გიგაურმა მედლის მოპოვებამდე, დიდი გზა გაიარა: დაამარცხა ყაზახი, ლიეტუველი და უზბეკი მეტოქეები, შემდეგ კი ორ ურთულეს ბრძოლაში გაიმარჯვა. ახლა უკვე მსოფლიო ჩემპიონის ტიტულის მფლობელი ჯუდოკა, როგორც ფინალურ, ასევე ნახევარფინალურ შეხვედრაში მარცხდებოდა, თუმცა ორივე შემთხვევაში, ტატამიდან გამარჯვებული გამოვიდა.

ნახევარფინალში, გიგაური აზერბაიჯანელ ნიზამი იმრანოვს დაუპირისპირდა და მაშინ, როდესაც ვაზარითა და 2 იუკოთი აგებდა, მეტოქეს იპონი გაუკეთა. თითქმის ანალოგიური რამ მოხდა ფინალშიც, სადაც პარშიევს ანგარიშზე ვაზარი და იუკო ჰქონდა, თუმცა გიგაურმა ისიც ბეჭებზე გააკრა და ლიმაში საქართველოს ჰიმნი გააჟღერა.

ერთად ვუგულშემატკივროთ ქართველ სპორტსმენებს. საქართველოს ბანკი ეროვნული ოლიმპიური ნაკრების მთავარი სპონსორია.