ეთერ ლიპარტელიანი | ერთადერთი ქართველი ქალი ჯუდოკა რეიტინგის სათავეში
ერთად ვუგულშემატკივროთ ქართველ სპორტსმენებს. საქართველოს ბანკი ეროვნული ოლიმპიური ნაკრების მთავარი სპონსორია.
ჯუდო ის სპორტია, ქართველ ქომაგს დიდი გამარჯვებებით რომ ანებივრებს. ყოველი ტურნირის წინ, გვაქვს საფუძვლიანი მოლოდინი, რომ რაღაც განსაკუთრებული უნდა მოხდეს. ასეცაა - ქართველი ჯუდოკები მსოფლიო ასპარეზზე ისტორიული წარმატებებითა და ინდივიდუალური საბრძოლო სტილით გამოირჩევიან და სპორტის ეს სახეობა ქართული კვალის გარეშე წარმოუდგენელია.
ასეთი მრავალფეროვანი და ტიტულოვანი გამოცდილების ფონზე, პირველად ხდება, რომ ჯუდოს მსოფლიო რეიტინგის სათავეში მყოფი ერთადერთი ქართველი მებრძოლი ქალია. ეთერ, იგივე ეთო ლიპარტელიანი - ასევე პირველი ქალი საქართველოდან, რომელმაც მსოფლიო რეიტინგში პირველი ადგილი დაიკავა. დღევანდელი რეიტინგით, მას 5431 ქულა აქვს და უახლოეს მდევარს, იაპონელ ტამაოკი მომოს 971 ქულით უსწრებს.
უნგრეთში გამართულ მსოფლიო ჩემპიონატზე ლიპარტელიანი (-57კგ.) ერთადერთი ქართველი იყო (როგორც ქალ, ასევე მამაკაც მებრძოლებს შორის), რომელმაც ყველა ბრძოლა გამარჯვებით დაასრულა. 9-დან 8 მეტოქე იპონით დაამარცხა, გახდა მსოფლიო ჩემპიონი და საქართველოს ტრიუმფში შერეულ პირველობაზეც უდიდესი როლი ითამაშა.
გაგახსენებთ, რომ შერეულ გუნდურ პირველობაზე, ჩვენი ნაკრები ოქროს მედლის მფლობელი პირველად გახდა და იაპონიის ჰეგემონია დაასრულა. მებრძოლები ამომავალი მზის ქვეყნიდან პირველობას ზედიზედ 7 ტურნირის განმავლობაში არ თმობდნენ.
მსოფლიო ჩემპიონატის ვერცხლის პრიზიორი, გურამ თუშიშვილი (+100კგ.), რეიტინგში მე-2 პოზიციაზეა წარმოდგენილი, ბრინჯაოს მფლობელები - ტატო გრიგალაშვილი (-81 კგ.) და ლუკა მაისურაძე (-90კგ.) კი მე-4 ადგილს იკავებენ. ათეულის წევრები ასევე არიან:
• გიორგი სარდალაშვილი (-60კგ.) | მე-6 პოზიცია;
• ილია სულამანიძე (-100კგ.) | მე-10 პოზიცია;
• ლაშა ბექაური (-90კგ.) მე-10 პოზიცია.
ჯუდოს მოყვარულებს შეგახსენებთ, რომ ქართველ მებრძოლებს წინ ორი მნიშვნელოვანი ტურნირი ელოდებათ: ახალ წლამდე, აბუ დაბისა და ტოკიოს გრან სლემები გველოდება, რომლებიც, შესაბამისად, 28-30 ნოემბერს და 6-7 დეკემბერს გაიმართება. უცნობია ჩვენი შემადგენლობა, თუმცა დარწმუნებულები ვართ, რომ მალე, მსოფლიო რეიტინგის მოწინავე პოზიციებზე უფრო მეტ ქართველ ჯუდოკას ვიხილავთ.
საქართველოს ბანკი - ეროვნული ოლიმპიური ნაკრების მთავარი სპონსორი.
სხვა სიახლეები
ლაშა ბექაური აბუ-დაბის „გრანდ სლემის“ ჩემპიონია
30.11.2025.17:53
არაბთა გაერთიანებული საამიროების დედაქალაქ აბუ-დაბიში ძიუდოს „გრანდ სლემი“ მიმდინარეობს. ძიუდოისტმა ლაშა ბექაურმა (-90 კგ) ფინალში მოლდოველი მაჰილ ლატისევი დაამარცხა.
სპორტის სამინისტროს ინფორმაციით, ფინალურ შეხვედრამდე მან ნიდერლანდელი მარკუს ვან დეიკი, რუსი ეგორ ანდონი და სერბი ისლამ სოგენოვი დაამარცხა. ნახევარფინალში კი სამხრეთ კორეელ ჯომგჰუნ კიმს სძლია.
მიმდინარე ტურნირზე ეს საქართველოსთვის მეორე მედალია. გიორგი სარდალაშვილმა (-60 კგ) ბრინჯაოს მედალი მოიპოვა.
ქართველი ძიუდოისტები აბუ-დაბის „გრანდ სლემზე“ საქართველოს სპორტის სამინისტროს მხარდაჭერით იმყოფებიან.