საქართველოს ეროვნული ნაკრები მსოფლიო ჩემპიონატის საკვალიფიკაციო ეტაპის პირველ მატჩს თურქეთის წინააღმდეგ გამართავს. 

3 სექტემბერს, შეხვედრის მასპინძელ დინამო არენზე ჩვენი გუნდის მატჩისწინა ვარჯიში გაიმართა. ვარჯიშის დაწყებამდე, ოფიციალურ პრესკონფერენციაზე მედიის კითხვებს საქართველოს ნაკრების მთავარმა მწვრთნელმა, ვილი სანიოლმა და ჩვენი გუნდის კაპიტანმა, გურამ კაშიამ უპასუხეს. 

ვილი სანიოლი (ეროვნული ნაკრების მთავარი მწვრთნელი): "ევროპის ჩემპიონატისგან განსხვავებით, ახლა სხვა ტურნირზე ვართ. ორივე გუნდს განსხვავებული შემადგენლობა ჰყავს. თითოეულ შეხვედრას საკუთარი განსხვავებული ისტორია აქვს. ჩვენ ვშრომობთ, რომ ხვალ საქართველოს ლამაზი ისტორია ვაჩუქოთ. 

სანაკრებო პაუზისთვის გამოყოფილი დრო საკმარისი არასდროს არის. თუმცა, ეს არ არის ახალი პრობლემა. ძალიან ცოტა დრო გვაქვს მოსამზადებლად, თუმცა მსგავს მდგომარეობაში არიან სხვა გუნდებიც. ასე რომ, ამ მხრივ ყველა თანაბარ მდგომარეობაშია. ცოტა მეტი დრო რომ გვქონოდა, განსხვავებულ დეტალებზე ვიმუშავებდით. ტაქტიკაზე მუშაობა ყოველთვის რთულია, როდესაც მხოლოდ ერთი ან ორი დღე აქვს. როგორც ვთქვი, ასეთ გრაფიკს უკვე მივეჩვიე და ამის თაობაზე ბევრს არ ვფიქრობ. 

ხვიჩა კვარაცხელიას გარკვეული პრობლემები ჰქონდა სეზონის სტარტზე, თუმცა ახლა თავს კარგად გრძნობს. დარწმუნებული ვარ, ხვალ ძალიან კარგი თამაში ექნება. ის ჩვენი შეტევის ლიდერია და მნიშვნელოვანია, რომ ფორმაში იყოს".

გურამ კაშია (ეროვნული ნაკრების წევრი): "სანაკრებო შეკრებებზე დროში ყოველთვის შეზღუდულები ვართ. გუშინდელი ვარჯიში ძალიან ნაყოფიერი იყო. მნიშვნელოვან დეტალებზე ვიმუშავეთ და ეს თავდაჯერებას გვმატებს. მზადება ძალიან კარგად მიდის.

თურქეთთან ევროპის ჩემპიონატზე ჩატარებული მატში კარგად ვითამაშეთ. სამწუხაროა, რომ მაშინ სამი გოლი გავუშვით. ამას არ ვიმსახურებდით. ხვალინდელ შეხვედრაში უფრო მეტი გამოცდილებით, რწმენით და თავდაჯერებით ვითამაშებთ. ვეცდებით, რომ ქულების ჩვენს გულშემატკივართან ერთად ავიღოთ. 

ორი ძალიან მნიშვნელოვანი ფეხბურთელი დაგვაკლდება კიტეიშვილის და ჩაკვეტაძის სახით. მათ გარეშე გაგვჭირდება. დანაკლისი დიდია, მაგრამ იმედი მაქვს, ხვალინდელ შეხვედრაში მათი არყოფნა ძალიან არ დაგვეტყობა. 

გულშემატკივარს მოვუწოდებ, რომ ისევ ისე გვიგულშემატკივრონ, როგორც ამას აქამდე აკეთებდნენ. სამაგალითო გულშემატკივარი გვყავს და ყოველთვის მოწოდების სიმაღლეზე არიან. ვეცდებით, რომ საუკეთესო თამაში ვაჩვენოთ და გავახაროთ".