უცხოელი სტუდენტების მოზიდვა ეს შემდგომ უკვე პირდაპირ ეკონომიკურ სარგებელში ითარგმნება, - ამის შესახებ „იმედის დილაში“ რუბრიკა Business Insider Georgia-ში სტუმრობისას საქართველოს განათლების, მეცნიერებისა და ახალგაზრდობის მინისტრის მოადგილემ მაია კვიციანმა განაცხადა.

როგორც ცნობილია საქართველოს დელეგაცია ინდოეთში გამართულ საერთაშორისო საგანმანათლებლო გამოფენა APAIE 2025-ში იღებდა მონაწილეობას, რომელმაც წელს 70-მდე ქვეყანა და 2000-ზე მეტი დელეგატი გააერთიანა. საქართველოს დელეგაციას კი განათლების, მეცნიერებისა და ახალგაზრდობის მინისტრი ხელმძღვანელობდა. 

აღნიშნულ გამოფენაში მონაწილეობდნენ აგენტები, რომლებიც ეძებენ უნივერსიტეტებს სტუდენტებისთვის.

„როდესაც შენ ეძებენ გადასავლელად ქვეყანას, სადაც უნდა ისწავლო, შენთვის მნიშვნელოვანია არამხოლოდ საგანმანათლებლო გარემო, არამედ ქვეყნის უსაფრთხოების ნაწილი, ეკონომიკური მდგრადობა, გართობა. კულტურა იმიტომ, რომ იქ უნდა იცხოვრო შესაბამისად. ჩვენ ძალიან ვეცადეთ, რომ ეს გამოცდილება მაქსიმალურად მიგვეტანა და ამაზე ბევრი ვიფიქრეთ. ბოლოს გადავწყვიტეთ, რომ vr სათვალეები გამოგვეყენებინა ამისთვის, ე.წ ვირტუალური რეალობა. შემიძლია ვთქვა, რომ გამოვირჩეოდით ამით. მე მგონი ერთადერთები ვიყავით, ვისაც vr სათვალეები ჰქონდა გამოყენებული და საკმაოდ დიდი გამოხმაურებაც მოჰყვა.

ამაში სხვათა შორის ტურიზმის ეროვნული სააგენტო და ეკონომიკისა და მდგრადი განვითარების სამინისტრო დაგვეხმარა. მოგვამარაგეს ვიდეოებით, ჩვენ ასევე მოვამზადეთ უნივერსიტეტების ვიდეოებიც და იქ მოსულ ადამიანებს ჰქონდათ შესაძლებლობა ემოგზაურათ ვირტუალურად, როგორც ჩვენს ქვეყანაში, ასევე ზოგმა თხილამურებზეც ისრიალა სხვადასხვა კურორტებზე და ჰქონდათ შესაძლებლობა დაეთვალიერებინათ ჩვენი კამპუსები და სხვადასხვა უნივერსიტეტი.

ასევე გვქონდა კუთხე, სადაც დაგემოვნება შეეძლოთ ჩვენი ტრადიციული ტკბილეულის, რა თქმა უნდა ქართული ღვინის და ამასაც დიდი გამოხმაურება მოჰყვა. იყო შემთხვევები როდესაც ერთი და იგივე ადამიანი რამდენიმეჯერ ბრუნდებოდა ჩვენს დახლთან.

ყველანაირად ვეცადეთ, რომ მაქსიმალურად ქართული და გემრიელი გარემო შეგვექმნა იმისათვის, რომ მაქსიმალურად მეტი ინფორმაცია მიგვეწოდებინა დაინტერესებული ადამიანებისთვის და მნიშვნელოვანია, ასევე ისიც, რომ გამოიკვეთა თუ როგორ აღიქვამენ ჩვენს ქვეყანას. იმიტომ, რომ ჩვენ ხშირად გვითქვამს, რომ საგანმანათლებლო რეგიონული ჰაბი ვართ. ეს ხშირად გაჟღერებულა ჩვენი მხრიდან, თუმცა მისასალმებელია, რომ ის ქვეყნები ვინც იქ იყვნენ წარმოდგენილი, ასევე აღგვიქვამენ ჩვენ, როგორც საგანმანათლებლო ჰაბი“, - განაცხადა ბაია კვიციანმა.