„საქართველოს ფეხბურთის ფედერაცია მუშაობს მორიგ სტრატეგიაზე“, - ამის შესახებ საქართველოს ფეხბურთის ფედერაციის პრეზიდენტმა ლევან კობიაშვილმა ორდღიანი ვორქშოფის შემდეგ განაცხადა, რომელიც საქართველოს ფეხბურთის ფედერაციის ახალი სტრატეგიული განვითარების გეგმის შემუშავებას ეხებოდა.

„სტრატეგია, რომელიც გასულ ოთხ წელიწადში გვქონდა, რითიც საკმაოდ წარმატებით ვიმუშავეთ და ის, რომ ბოლო ოთხი-ხუთი წელია სხვადასხვა ნაკრებებით ევროპის ჩემპიონატებზე მივიღეთ მონაწილეობა, მათ შორის ის ზრდა, რაც ქვეყანაში გვაქვს ფეხბურთის განვითარების კუთხით: მასობრივი ფეხბურთი, ქალთა ფეხბურთი, ფუტსალი -  გასული სტრატეგიის ნაწილია.

თუმცა დღეს სხვა რეალობის წინაშე ვდგავართ ჩვენი ორგანიზაცია და შესაბამისად ვმუშაობთ ჩვენს მეგობრებთან UEFA GROW-ს ფარგლებში, ვახორციელებთ ახალი სტრატეგიის შემუშავებას. მომდევნო სტრატეგია მოიცავს 2026-2030 წლებს და შესაბამისად ძალიან საინტერესო შეხვედრები გვქონდა. ეს პროცესი გაგრძელდება, მომდევნო თვეებში, გვექნება მსგავსი შეხვედრები და შესაბამისად მივიღებთ იმ დოკუმენტს და იმ სამოქმედო გეგმას, რითიც ჩვენი ორგანიზაცია იხელმძღვანელებს.

ძალიან საინტერესო იყო, მთლიანად ჩვენი ორგანიზაციის თითქმის ყველა ხელმძღვანელი, დეპარტამენტი, თანამშრომელი ჩართული იყო ამ პროცესში, მათ შორის ჩვენ, როგორც მენეჯმენტის წარმომადგენლები. დღეს იყო პირველი შემთხვევა, როდესაც ჩართულები იყვნენ ჩვენი კლუბები. ძალიან გვიხარია, რომ ყველამ ძალიან პოზიტიურად მიიღო ეს ყველაფერი და მათთვისაც ერთგვარი სიახლეც არის და გამოწვევაცაა, რა თქმა უნდა, იმიტომ რომ საბოლოო ჯამში მათი აქტიურობა, მათი სწორი მუშაობა აისახება ზოგადად ქართულ ფეხბურთზე.

ძალიან გვიხარია ეს ყველაფერი. იმედი გვაქვს, რომ ასევე წარმატებით ვიმუშავებთ მომდევნო ოთხი წლის განმავლობაში, როგორც წარმატებითაც ჩვენ ვიმუშავეთ გასულ ოთხ წელიწადში“, - აღნიშნა ლევან კობიაშვილმა.