თბილისის ზოოპარკი მოსახლეობას წინასაახალწლოდ პიროტექნიკის გამოყენებისგან თავშეკავებას სთხოვს, რადგან ძლიერი ხმაური და განათებები ცხოველებში შიშს, სტრესსა და თვითდაზიანების რისკს იწვევს. როგორც Business Insider Georgia-სთან თბილისის ზოოპარკის საზოგადოებასთან ურთიერთობის მენეჯერი, მზია შარაშიძე აცხადებს, ასეთ დროს დიდი შანსია ცხოველების დაზიანების, რადგან მათ ეშინიათ და ვოლიერების კედლებს ეხეთქებიან.

„ჩვენ ყოველ წელს ზოოპარკის სახელით ვავრცელებთ განცხადებას და ვთხოვთ განსაკუთრებით იმ ადამიანებს, რომლებიც ზოოპარკის მიმდებარე ტერიტორიაზე ცხოვრობენ (გმირთა მოედნის მიმდებარე ტერიტორიები) და ასევე თბილისის ზღვაზე, ახალი ზოოპარკის მიმდებარედ (სადაც გადაყვანილია ცხოველების გარკვეული ნაწილი), რომ ზოოპარკის მიმართულებით მაინც ნაკლებად ისროლონ ფეიერვერკები და ზოგადად პიროტექნიკის გამოყენება შეამცირონ. იმიტომ, რომ ეს ხმაური და განათებები ძალიან სტრესულია ცხოველებისთვის. ისინი მძაფრად რეაგირებენ და ეშინიათ. იწყებენ ვოლიერებში სირბილს - ეხეთქებიან კედლებს და დიდია იმის ალბათობა, რომ ცხოველებმა ამ დროს თავი დაიზიანონ. ზოგადად, ჩვენ ამ დღისთვის წინასწარ ვემზადებით ხოლმე. დღის განმავლობაში ვეტექიმები იმ ცხოველებს, რომლებიც განსაკუთრებით ‘ნერვიულები’ არიან, აძლევენ დამამშვიდებელ პრეპარატებს, რათა შემდგომ ღამით, როცა სროლა დაიწყება, ნაკლებად დაისტრესონ.

ვისაც შინაური ცხოველი ჰყავს - მე ძაღლი მყავს - ყველას აქვს ის გამოცდილება, თუ როგორ რეაგირებს შინაური ცხოველიც კი, რომელიც ჩვენს ყოფით თემებს მიჩვეულია, ხმაურზე. მაგალითად, ჩემი ძაღლი, როდესაც ფოიერვერკებია, დივანის ქვეშ ძვრება და რამდენიმე საათი აღარ გამოდის. და როცა შინაურ ცხოველს ასეთი რეაქცია აქვს, რა თქმა უნდა, გაორმაგებულია გარეული ცხოველის რეაქცია, რომელსაც უშუალო კონტაქტი ადამიანებთან არ აქვს. მესმის, რთულია - ხალხს უხარია და უნდათ ამ სიხარულის გამოხატვა, მაგრამ თხოვნა იქნება, რომ თუ შეიძლება, ზოოპარკის მიმდებარე ტერიტორიაზე მცხოვრებლებმა თავი შეიკავონ პიროტექნიკის გამოყენებისგან,“ - აცხადებს მზია შარაშიძე.