მონეტარული პოლიტიკის განაკვეთის შემდგომი ცვლილება დამოკიდებული იქნება რისკების ანალიზსა და მასზე დაფუძნებით განახლებულ მაკროეკონომიკურ სცენარებზე - ნათქვამია ეროვნული ბანკის მონეტარული პოლიტიკის კომიტეტის გადაწყვეტილებაში, რომლის მიხედვითაც რეფინანსირების განაკვეთი უცვლელად 8 პროცენტზე ნარჩუნდება. 

მონეტარული პოლიტიკის კომიტეტი აღნიშნულ გადაწყვეტილებას გლობალურად არსებულ ეკონომიკურ გაურკვევლობას უკავშირებს, რომელმაც ინფლაციაზე როგორც ზრდის, ისე კლების  მიმართულებით მოქმედი რისკები გამოკვეთა. გლობალურად ეკონომიკური ფრაგმენტაციის ნიშნები  საქართველოში იმპორტირებული ინფლაციის ზრდის რისკებს წარმოშობს. ამასთან, დოლარის გლობალური ინდექსის (DXY) შესუსტება ლარის დოლართან მიმართებით პოზიციების გაუმჯობესებას იწვევს, ეს კი დოლარში დენომინირებული სესხების მომსახურების ტვირთს ამცირებს და ინფლაციურ წნეხს ამსუბუქებს. პარალელურად, გლობალური მოთხოვნის შემცირებისა და ნავთობის მიწოდების ზრდის მოლოდინების ფონზე, საერთაშორისო ბაზრებზე ნავთობის ფასები კლებულობს. აღნიშნულს, ლარის დოლართან მყარი პოზიციის შენარჩუნებასთან ერთად, დისინფლაციური ეფექტი აქვს.

აღსანიშნავია, რომ საქართველოში ადგილობრივი ეკონომიკური ფუნდამენტური ფაქტორები კვლავ ფასების სტაბილურობის ხელშემწყობია. ფასების სტაბილურობის შენარჩუნების პარალელურად კი კვლავ ძლიერია ეკონომიკური აქტივობა. კერძოდ, 2025 წლის პირველ კვარტალში რეალური მშპ-ის ზრდამ, საშუალოდ 9.3 პროცენტი შეადგინა.

სებ-ის ცენტრალური სცენარის მიხედვით, გლობალურად გაზრდილი გაურკვევლობის, ადგილობრივი ტენდენციებისა და ფინანსურ ბაზარზე არსებული მოლოდინების გათვალისწინებით 2025 წელს ინფლაცია დროებით გადააჭარბებს მიზნობრივ მაჩვენებელს და საშუალოვადიან პერიოდში 3 პროცენტის გარშემო დასტაბილურდება.

მაღალინფლაციური რისკების სცენარი მონეტარული პოლიტიკის განაკვეთის უფრო მაღალ ტრაექტორიას მოითხოვს და საერთაშორისო ბაზრებზე ბოლო დროს მომატებულ გაურკვევლობას, სატარიფო პოლიტიკისა და ეკონომიკური ფრაგმენტაციის დაჩქარებას უკავშირდება. აღნიშნული რისკების რეალიზაცია, თავის მხრივ, მიწოდების ჯაჭვებს შეაფერხებს და გლობალურად მაღალინფლაციურ გარემოს ჩამოაყალიბებს, რაც საქართველოზეც შესაბამისად აისახება.

რაც შეეხება დაბალინფლაციური რისკების სცენარს, ის მონეტარული პოლიტიკის განაკვეთის უფრო დაბალ ტრაექტორიას მოითხოვს, ვიდრე ცენტრალური სცენარი.  მისი რეალიზების შემთხვევაში გლობალურად გაზრდილმა გაურკვევლობამ და სატარიფო პოლიტიკამ, შესაძლოა, მსოფლიო მასშტაბით ვაჭრობის დივერსიფიკაციის პროცესი დააჩქაროს, რის შედეგადაც მოსალოდნელია მიწოდების ჯაჭვების გადაწყობა და რეგიონალიზაცია. ამ პროცესში კი საქართველოს, როგორც „შუა დერეფნის“ ქვეყნის, როლი დამატებით გაძლიერდება. ამასთან, აღნიშნული სცენარით აშშ დოლარი კვლავ გლობალურად შესუსტებული დარჩება და ამ ტენდენციების ფონზე გამყარებული ლარის გაცვლითი კურსი, იმპორტული ინფლაციის არხით, მთლიან ინფლაციაზე შემცირების მიმართულებით იმოქმედებს.

მონეტარული პოლიტიკის კომიტეტის შემდეგი სხდომა 2025 წლის 18 ივნისს ჩატარდება.