ადვოკატთა ასოციაცია პროფესიის გაძლიერებაზე მუშაობას აგრძელებს. როგორც ტელეკომპანია „მაესტროს“ ეთერში, გადაცემა Business Insider Georgia-ში სტუმრობისას, ადვოკატთა ასოციაციის თავმჯდომარემ, ირაკლი ყანდაშვილი განაცხადა, პრიორიტეტად რჩება ადვოკატებისთვის საქმიანობის სრულფასოვანი და სტანდარტების შესაბამისი განხორციელების პირობების შექმნა, რისთვისაც ასოციაცია აქტიურად თანამშრომლობს მართლმსაჯულების სისტემის ყველა რგოლთან და სახელმწიფო ინსტიტუციებთან.
„შემდეგი მიმართულება - ეს არის პრიორიტეტი ამ ოთხი წლის განმავლობაში, რაზეც ჩვენ ძალიან აქტიურად ვმუშაობთ: თითოეულ ადვოკატს შევუქმნათ მისი საადვოკატო საქმიანობის კომფორტულად განხორციელებისა და, მათ შორის, სრული სტანდარტების დაცვით რეალიზების საშუალება. ამ მიმართულებით ძალიან მნიშვნელოვანია ჩვენი პროფესიული გაერთიანების მჭიდრო თანამშრომლობა ქვეყანაში წარმოდგენილ ყველა ადმინისტრაციულ ორგანოსთან.
მე შემიძლია გითხრათ, რომ ამ 100 დღის განმავლობაში არაერთი შეხვედრა მქონდა. მართლმსაჯულების რგოლით დავიწყებ: როგორც უზენაესი სასამართლოს პირველ პირთან, ისე გენერალურ პროკურორთან, რადგან ჩვენ მართლმსაჯულების სამკუთხა ურთიერთობაში ვართ. მათ შორის, დღეს კიდევ ერთხელ ხელახლა დავაინიცირეთ ძალიან მნიშვნელოვანი ინიციატივა - ე.წ. ბენჩ-ბარი, როდესაც სასამართლო, სახელმწიფო ბრალდება და ადვოკატის პროფესია ერთად ვსხდებით და პრაქტიკას ვაზოგადებთ.
ეს არის ძალიან მნიშვნელოვანი პლატფორმა, რომელიც 2020 წელს შეიქმნა, თუმცა 2023 წლიდან აღარ ფუნქციონირებდა. დღეს ჩვენ მას ხელახალი ბიძგი მივეცით, რათა მსგავსი ფორმატები კვლავ შეიქმნას, რაც ძალიან მნიშვნელოვანია იმისთვის, რომ ადვოკატებს მართლმსაჯულებაში ჩართულობის ნაწილში ერთგვაროვან პრაქტიკასთან დაკავშირებით პრაქტიკის განზოგადებაზე წვდომა ჰქონდეთ და სახელმწიფო ბრალდებასა და სასამართლო ხელისუფლებასთან ერთად ამ მიდგომების ყოველდღიური გაცვლა ხდებოდეს.
მქონდა არაერთი შეხვედრა, მათ შორის სამთავრობო მიმართულებითაც, როგორც ქვეყნის პრემიერ-მინისტრთან. ძალიან მნიშვნელოვანია, რომ უშუალო კომუნიკაცია არსებობდეს ქვეყნის პირველ პირთან, რადგან ეს ერთ-ერთი ყველაზე მნიშვნელოვანი და ძალიან საჭირო პროფესიაა. რა თქმა უნდა, ის საჭიროებები, რაც ამ პროფესიას აქვს, ქვეყნის პირველმა პირმა უნდა იცოდეს, ისევე როგორც პარლამენტისა და სამინისტროების დონეზე. განსაკუთრებით აქტიურად ვარ პირადად ჩართული პენიტენციურ დაწესებულებებთან ურთიერთობაში.
იმიტომ, რომ ყოველდღიურად ჩვენი ადვოკატები შედიან ციხეში, ახორციელებენ დაცვის ქვეშ მყოფი პირების უფლებრივ უზრუნველყოფას და იქ შესაბამისი სამუშაო გარემო უნდა იყოს შექმნილი. მე ცალსახად შემიძლია ვთქვა, ნამდვილად ვერ ვიტყვი საპირისპიროს, რომ ბოლო სამი თვის განმავლობაში პენიტენციურ სისტემასთან ნამდვილად ვთანამშრომლობთ. იყო გამოწვევები, რა თქმა უნდა, გამოწვევები არის და იქნება, მაგრამ ეს გამოწვევები ნაბიჯ-ნაბიჯ სწორდება, რაც ადვოკატისთვის სწორ და გამართულ სამუშაო გარემოს ქმნის. ეს ჩემთვის ძალიან მნიშვნელოვანია, ისევე როგორც ძალიან მჭიდრო თანამშრომლობა მიგრაციის დეპარტამენტთან, სადაც ადვოკატებს ყოველდღიური შემხებლობა აქვთ დაცვის ქვეშ მყოფ პირებთან, ისევე როგორც სასამართლოებთან. ყველა პრობლემა ერთ დღეში არ გადაწყდება - ეს ძალიან კარგად უნდა ესმოდეს ყველას, განსაკუთრებით ადვოკატებს. მთავარი არის, რომ ვიცოდეთ, რა გვინდა, ვიცოდეთ, იმ მიზნამდე მისასვლელად რა გზაა გასავლელი და ყველა ერთად ვიყოთ ჩართული, ამ დარგისა და ამ პროფესიის განვითარებაში“, - აცხადებს ირაკლი ყანდაშვილი.