გივი მიქანაძემ აზერბაიჯანის რესპუბლიკის ელჩს უმასპინძლა
საქართველოს განათლების, მეცნიერებისა და ახალგაზრდობის მინისტრმა გივი მიქანაძემ აზერბაიჯანის რესპუბლიკის საგანგებო და სრულუფლებიან ელჩს, ფაიგ გულიევს უმასპინძლა.
მხარეებმა განათლების, მეცნიერებისა და ახალგაზრდობის სფეროებში საქართველო-აზერბაიჯანის თანამშრომლობის გაღრმავების გზებზე და ერთობლივი პროექტების განხორციელების საკითხებზე იმსჯელეს.
ხაზი გაესვა საქართველოსა და აზერბაიჯანის რესპუბლიკას შორის მრავალწლიანი სტრატეგიული პარტნიორობის მნიშვნელობას. როგორც გივი მიქანაძემ აღნიშნა, ამის კიდევ ერთი ნათელი დასტურია მინისტრის რანგში მისი პირველი ოფიციალური ვიზიტი, რომელიც მოიცავდა აზერბაიჯანის რესპუბლიკის მთავრობის წევრებთან ორმხრივ შეხვედრებს.
მხარეებმა ისაუბრეს სამუშაო ჯგუფის აღდგენის მნიშვნელობაზე, რომელიც საქართველოსა და აზერბაიჯანის რესპუბლიკის სამინისტროების წარმომადგენლებს გააერთიანებს. აღინიშნა, რომ მიმდინარე წლის აგვისტოდან ჯგუფი რიგ საკითხებზე, მათ შორის ეთნიკურად აზერბაიჯანელი საქართველოს მოქალაქეების ქართულ საზოგადოებაში სრულყოფილი ინტეგრაციის კუთხით გადასადგმელ ნაბიჯებზე, მუშაობას აქტიურად დაიწყებს.
განსაკუთრებული ყურადღება გამახვილდა ახალგაზრდული კავშირების გაძლიერების მიზნით განხორციელებულ და დაგეგმილ ინიციატივებზე. კერძოდ, საუბარი შეეხო აზერბაიჯანის რესპუბლიკაში ჩატარებულ ახალგაზრდულ კვირეულს, რომელშიც ქართველმა და აზერბაიჯანელმა სტუდენტებმა მიიღეს მონაწილეობა. მინისტრის თქმით, ამჯერად ახალგაზრდებს საქართველო ანაკლიის ბანაკში უმასპინძლებს.
თავის მხრივ, აზერბაიჯანის რესპუბლიკის ელჩმა მადლობა გადაუხადა მინისტრს ნაყოფიერი თანამშრომლობისთვის და ერთობლივი საგანმანათლებლო, სამეცნიერო და ახალგაზრდული პროექტების განხორციელებისთვის სრული მზადყოფნა დაუდასტურა.
სხვა სიახლეები
01.08.2025.16:34
კომუნიკაციების კომისიამ „ციფრული მხარდაჭერის პროგრამა" წარმატებით დაასრულა სენაკისა და ხონის მუნიციპალიტეტებში. ციფრული წიგნიერებისა და ინტერნეტის მიზნობრივად გამოყენების შესახებ სენაკში 46, ხოლო ხონში 39 სემინარი ჩატარდა, რომელთა ფარგლებშიც ჯამში 1200-ზე მეტი პირი გადამზადდა. შეხვედრების ფარგლებში ბენეფიციარებმა ციფრული წიგნიერებისა და ინტერნეტის უსაფრთხოდ გამოყენების შესახებ სრულიად უფასოდ აიმაღლეს ცნობიერება და გაეცნენ ისეთ მნიშვნელოვან საკითხებს, როგორებიცაა ინტერნეტში სასურველი ინფორმაციის მოძიება, Google-ის აპლიკაციებით სარგებლობა, სოციალური პლატფორმების მიზნობრივად გამოყენება და სხვა.
„ციფრული მხარდაჭერის პროგრამამ", რომელსაც კომუნიკაციების კომისია 2022 წლიდან საქართველოს რეგიონებში უწყვეტად ახორციელებს, უკვე 17 მუნიციპალიტეტის 247 სოფელი და დასახლებული პუნქტი მოიცვა. პროგრამის ფარგლებში კი 9000-მდე ბენეფიციარია გადამზადებული.
შეგახსენებთ, რომ „ციფრული მხარდაჭერის პროგრამა" პროექტ Log-in Georgia-ს შემადგენელი ნაწილია, რომელიც ინტერნეტიზაციის სახელმწიფო პროგრამის მხარდასაჭერად ტარდება. Log-in Georgia საქართველოს 500,000-მდე სოფლად მცხოვრებისთვის მაღალხარისხიანი ინტერნეტის მიწოდების შესაძლებლობის შექმნასა და ციფრული სერვისების სასარგებლო გამოყენების ხელშეწყობას ისახავს მიზნად. პროექტი მსოფლიო ბანკისა და ევროპის საინვესტიციო ბანკის თანადაფინანსებით ხორციელდება.