ჯანსაღი ცხოვრების წესის ხელშეწყობასთან ერთად, ქვეყანაში იზრდება მოთხოვნა სპორტულ ინფრასტრუქტურაზეც. სწორედ ეს ტენდენცია გახდა ახალი ფონდის დაარსების მთავარი მოტივაცია.

„სპორტული ინფრასტრუქტურის განვითარება და ჯანსაღი ცხოვრების წესის ხელშეწყობის ფონდის“ - ასე ჰქვია ახლად დაფუძნებულ ფონდს, რომელმაც უკვე გააერთიანა სპორტსმენები, ბიზნესმენები და სხვადასხვა სფეროს წარმომადგენლები.

როგორც გადაცემა „იმედის დილაში“ რუბრიკა Business Insider Georgia-ში სტუმრობისას სპორტული ინფრასტრუქტურის და ჯანსაღი ცხოვრების წესის ხელშეწყობის ფონდის დირექტორმა ირაკლი მხეიძემ განაცხადა, ფონდის შექმნის ინიციატორები იყვნენ ქართველი ბიზნესმენები: ლაშა კვაჭაძე, ბეჟან სამხარაძე და დავით უგრელიძე. 

„მადლობა მათ კიდევ ერთხელ ამ კეთილი წამოწყებისთვის. ახლა კი ფონდის შექმნის მოტივაციაზე: ეს გახლავთ ბოლო წლებში ჯანსაღი ცხოვრების წესის ზრდასთან ერთად გაზრდილი მოთხოვნა სპორტულ ინფრასტრუქტურაზე. ასევე ხაზგასასმელია ჩვენი სპორტსმენების ბოლო დროინდელი შთამბეჭდავი წარმატებები საერთაშორისო ასპარეზზე, რაც გახდა დიდი მოტივაცია. ამაში ჩართული იყო ახალგაზრდა თაობა და მოქცეულ იყო ჯანსაღი ცხოვრების წესისკენ, დაკავებულიყვნენ სხვადასხვა სპორტული აქტივობებით. რაც დამეთანხმებით საჭიროებს მუდმივ განვითარებას და მეტ მხარდაჭერას. ასევე აღსანიშნავია სახელმწიფოს მხრიდან დიდი მხარდაჭერა, ზოგადად სპორტის და ჩვენი სპორტსმენების მიმართ. მაგალითად ბატონო პრემიერის მიერ დაანონსებული 2 მლრდ-იანი პროგრამა სპორტული ინფრასტრუქტურის განახლებისთვის, რაც გულისხმობს მრავალფუნქციური კომპლექსების, მეტი სპორტული სივრცის და ძალიან მასშტაბური 70 ათას კაცზე გათვლილი საერთაშორისო სტანდარტების სტადიონის მშენებლობას ქალაქ თბილისში, სადაც იგეგმება რომ უმასპინძლებს უეფას ჩემპიონთა ლიგის ფინალს. ვთანხმდებით რაოდენ დიდი მოვლენაა ეს ჩვენი ქვეყნისთვის, სწორედ ეს ყველაფერი გახდა ჩვენთვის მოტივაცია დაგვეწესებინა და შეგვექმნა სრულიად გამჭვირვალე პლატფორმა, რომელიც გააერთიანებს ქართული სპორტის პროგრესში ჩართულ ყველა დაინტერესებულ პირებს“, - აღნიშნა ირაკლი მხეიძემ.