უმაღლესი განათლების რეფორმის ფარგლებში მთავრობამ საკანონმდებლო ცვლილებების ძირითადი ეტაპი უკვე დაასრულა და პროცესი მისაღები გამოცდების ფაზაზე გადავიდა. როგორც ტელეკომპანია „მაესტროს“ ეთერში გადაცემა Business Insider Georgia-ში სტუმრობისას  საქართველოს განათლების, მეცნიერებისა და ახალგაზრდობის მინისტრის მოადგილემ ზვიად გაბისონიამ განაცხადა, რეფორმა მოიცავს სპეციალობების კვოტირებასა და სასწავლო მოდელის ცვლილებას - 4+2 სისტემიდან 3+1+1 მოდელზე გადასვლას.

„საქმე ის გახლავთ, რომ ძირითადი მიმართულებები აბსოლუტურად გეგმის მიხედვით მიდის. თქვენ იცით, რომ ჩვენ დაწყებული შემოდგომიდან, როცა პრემიერმა გააკეთა განცხადება და შესაბამისად წარვადგინეთ მთავარი კონცეფცია, პარლამენტში გვქონდა ორი პაკეტის წარდგენა - ერთი საშემოდგომო სესიაზე და მეორე საგაზაფხულო სესიაზე დაჩქარებული წესით, რითიც ძირითადი პაკეტი უზრუნველვყავით იმ მიმართულებით, რაც წელს გვჭირდებოდა ამ ნაწილში. ყველაზე მნიშვნელოვანი აქ იყო კვოტირების საკითხი. გახსოვთ, რომ მთავრობაზე იყო დელეგირება, რომ მოეხდინა გარკვეული ტიპის პროფესიების მიმართულებით და პროგრამების მიხედვით დადარება და შესაბამისად განესაზღვრა კვოტირების ნაწილში. ასევე ჩვენმა სამინისტრომ დამატებით იმუშავა საგამონაკლისო წესებზე. ჩვენი მოდელის მიხედვით ჩვენ გადავდივართ 4+2-დან 3+1+1 მოდელზე. შესაბამისად დადარდა და მოხდა გარკვეული ტიპის ცვლილებები - სად შეიძლებოდა და სად იყო აუცილებლობა, მაგალითად საინჟინრო, მედიცინის და ასე შემდეგ - არა სამწლიანი, არამედ ოთხწლიანი ან ზოგჯერ ხუთწლიანი მიმართულებები. მაგისტრატურის ნაწილში ძალიან ცოტა პროგრამა დარჩა ორწლიან ნაწილში, დანარჩენი გადავიდა ერთწლიანზე, ანუ 1+1 მოდელზე. ამ ეტაპისთვის უნდა გითხრათ, რომ ძირითადი საკანონმდებლო მიმართულებები უკვე დასრულებული გვაქვს - ვგულისხმობ ძირითად ორ ფაზას. ახლა გადასული ვართ მისაღები გამოცდების საწყის ფაზაში. პროგრამები უკვე გაკეთებულია, ანკეტა-კითხვარები გაკეთებულია უნივერსიტეტების მიერ და შესაბამისად შემდეგ ფაზაზე გადავდივართ“, - აღნიშნა გაბისონიამ.