კომუნიკაციების კომისიის ორგანიზებით, მას შემდეგ, რაც გასულ წელს საქართველო ევროპის აუდიოვიზუალური ობსერვატორიის (EAO) აღმასრულებელი საბჭოს 2024 წლის თავმჯდომარე გახდა, თბილისში EAO-ს სამუშაო შეხვედრა - „ბაზრის კონკურენტუნარიანობა - გავლენა ინდუსტრიასა და მცირე ქვეყნების მარეგულირებლებზე" გაიმართა. შეხვედრა მისასალმებელი სიტყვით კომუნიკაციების კომისიის წევრმა და EAO-ს აღმასრულებელ საბჭოში საქართველოს წარმომადგენელმა, ივანე მახარაძემ გახსნა და საქართველოში არსებული აუდიოვიზუალური სექტორის მდგომარეობა და სექტორის ძირითადი მოთამაშეების როლი შეაფასა. აუდიტორიას სიტყვით ასევე მიმართა ევროპის აუდიოვიზუალური ობსერვატორიის აღმასრულებელმა დირექტორმა, სიუზან ნიკოლჩევმა, რომელმაც შეხვედრის მნიშვნელობაზე გაამახვილა ყურადღება.

შეხვედრის გახსნის შემდეგ, ობსერვატორიის ბაზრის ინფორმაციის დეპარტამენტის ხელმძღვანელმა, ჟილ ფონტენმა, აუდიტორიას აუდიოვიზუალური ბაზრის ძირითადი ტენდენციები, კონტენტის წარმოებაზე არსებული გავლენები, ასევე, ბაზრის მოთამაშეების რეაგირების მაგალითები და ამ პროცესში, ხელოვნური ინტელექტის როლი გააცნო. შემდეგი პრეზენტაციით ობსერვატორიის იურიდიული დეპარტამენტის უფროსის მოადგილე, სოფი ვალე წარსდგა, რომელმაც აუდიოვიზუალური მედია სერვისების დირექტივის დანერგვის თაობაზე, ასევე, ბაზრის კონკურენტუნარიანობის ხელშეწყობის სტანდარტსა და ამ კუთხით, ევროკავშირის არაწევრ ქვეყნებში არსებულ მდგომარეობაზე გაამახვილა ყურადღება.

ღონისძიების ფარგლებში ასევე გაიმართა პანელური დისკუსია, რომელსაც მოდერაცია ComCom-ის იურიდიული დეპარტამენტის სამართლებრივი უზრუნველყოფის ჯგუფის უფროსმა, ლევან მაისურაძემ გაუწია. პანელში მონაწილეობა მიიღეს საქართველოს საზოგადოებრივი მაუწყებლის დირექტორის მოადგილემ, გიორგი გვიმრაძემ, Cavea+-ის თანადამფუძნებელმა, ოთარ ბუბაშვილმა, შვეიცარიის მედიის ორგანოს (BAKOM) კვლევითი გუნდის ლიდერმა, სემუელ შტუდერმა, ნორვეგიის მედიის ორგანოს (NMA) გენერალურმა დირექტორმა, მარი ველსანდმა და პოლონეთის მაუწყებლობის საბჭოს (KRRiT) დირექტორის მოვალეობის შემსრულებელმა, ევა მურავსკა-ნაიმიეცმა. პანელური დისკუსია დაეთმო მედიის ციფრულ პლატფორმებზე გადასვლის პროცესს და მის გავლენას როგორც მაუწყებლობის სარედაქციო პოლიტიკაზე, ასევე მარეგულირებლებელი ორგანოების საქმიანობაზე. ამასთან, მომხსენებლებმა მონეტიზაციის ახალ შესაძლებლობებსა და საკუთარ გამოცდილებებზე იმსჯელეს.

შეხვედრის მონაწილეებს სემუელ შტუდერმა წარუდგინა პრეზენტაცია „მცირე ბაზრების რეალობა", რომლის ფარგლებშიც მცირე ქვეყნების აუდიოვიზუალური ბაზრების მდგომარეობა და გამოწვევები მიმოიხილა. პრეზენტაციის დასრულების შემდგომ კი, მომხსენებლებმა მარეგულირებლებისა და კანონმდებლების დილემაზე იმსჯელეს და განიხილეს, თუ როგორაა შესაძლებელი ტრადიციული და ციფრული მედიის თანასწორ პირობებში არსებობა, მიუხედავად მნიშვნელოვანი განსხვავებებისა. დისკუსია ასევე დაეთმო საქართველოში არსებული მდგომარეობის მიმოხილვასაც, სადაც საუბარი შეეხებოდა დიდ და მცირე აუდიოვიზუალური კონტენტის შემქმენელებს შორის არსებულ კონკურენციის გამოწვევებს. პანელის დასასრულს, მონაწილეებმა როგორც გლობალურ, ისე მცირე ქვეყნების ჭრილში, ტრადიციული მედია საშულაბების მიერ სოციალური პლატფორმების გამოყენებაზეც იმსჯელეს და მარეგულირებელი ორგანოების ჩართულობის საჭიროებები შეაფასეს.

შეგახსენებთ, რომ ევროპის აუდიოვიზუალური ობსერვატორია არის ორგანიზაცია, რომელიც ევროპის საბჭოს ქოლგის ქვეშ 1992 წლიდან ფუნქციონირებს და ევროპაში ფილმის, მაუწყებლობის და აუდიოვიზუალური ინდუსტრიის სფეროში არსებული ფაქტებისა და მონაცემების ანალიზს ახორციელებს. ამჟამად ორგანიზაციას 41 წევრი ჰყავს. საქართველო ობსერვატორიის წევრი 2016 წელს გახდა და ორგანიზაციაში ქვეყანას საქართველოს კომუნიკაციების ეროვნული კომისია წარმოადგენს. აღსანიშნავია, რომ ყოველი წლის ივნისში, ობსერვატორიის აღმასრულებელი საბჭოს მიმდინარე წლის თავმჯდომარე ქვეყანა, სხვადასხვა აქტუალური თემის შესახებ მედია კონფერენციას მართავს.