ComCom-მა კომპლექსური კვლევის მეორე ეტაპის ფარგლებში, ევროკავშირის ექსპერტებთან ერთად,  ოპერატორებთან სამუშაო შეხვედრები გამართა. კვლევის ეს ეტაპი სატელეკომუნიკაციო ინფრასტრუქტურასთან დაშვების ბაზრის სიღრმისეულ შესწავლას და კორპორატიული ფიქსირებული ინტერნეტ მომსახურებების საცალო ბაზრის ანალიზს ემსახურება. შეხვედრები, სადაც „მაგთიკომის“, „სილქნეტის“, „ახალი ქსელების“, „სქაიტელის“, ასევე, მცირე და საშუალო ოპერატორების და მობილური ვირტუალური ქსელის ოპერატორების (MVNO) ასოციაციის წარმომადგენლები იღებდნენ მონაწილეობას, ბაზარზე არსებული მდგომარეობისა და გამოწვევების შესასწავლად, დეტალური ინფორმაციის შეგროვებას ისახავდა მიზნად. საგულისხმოა, რომ შეხვედრა ასევე დაეთმო კომპლექსური კვლევის პირველი ეტაპის ფარგლებში, ComCom-ის მიერ „მაგთიკომისთვის“ დაკისრებული ვალდებულებების მონიტორინგის საკითხებს.

სატელეკომუნიკაციო ინფრასტრუქტურასთან დაშვების ბაზარი, კომპლექსური კვლევის პირველ ეტაპზე, პოტენციურად რეგულირებას დაქვემდებარებადად იქნა მიჩნეული, შესაბამისად, შეხვედრები აღნიშნული ბაზრის მდგომარეობის ანალიზის მიზნით, ოპერატორებთან სიღრმისეულ ინტერვიუებს მოიცავდა. მიღებულ დეტალურ ინფორმაციაზე დაყრდნობით, კომუნიკაციების კომისია, ევროკავშირის ექსპერტებთან ერთად შეაფასებს ბაზარზე მნიშვნელოვანი საბაზრო ძალაუფლების მქონე პირის არსებობას და ასეთის გამოვლენის შემთხვევაში, ევროპული პრაქტიკის მიხედვით, განსაზღვრავს მარეგულირებელ ჩარჩოს.

კომპლექსური კვლევის მეორე ეტაპზე ასევე დაგეგმილია შეხვედრები იმ იურიდიულ პირ აბონენტებთან, რომელთაც განსაკუთრებულად მაღალი ხარისხის ინტერნეტ შეთავაზებების მოთხოვნა აქვთ, რათა შეფასდეს მათ მიერ მიღებული კორპორატიული მომსახურებები, კერძოდ - თუ რომელი პაკეტებია ყველაზე მოთხოვნადი; რა ფაქტორები არსებობს მომსახურებების შერჩევისას და სირთულეები, რომელსაც აწყდებიან პროვაიდერზე არჩევანის გაკეთებისას. 

„მაგთიკომთან“ შეხვედრის ფარგლებში, ComCom-ის წარმომადგენლებმა და კვლევის ექსპერტთა ჯგუფმა, ოპერატორის წარმომადგენლებს გაუზიარეს სატარიფო ვალდებულებების მონიტორინგის მიზნით შემუშავებული მარჟის შეკუმშვის ტესტის მეთოდოლოგიის წინასწარი ვერსია და განიხილეს ძირითადი მიდგომები, მეთოდოლოგიის გამოქვეყნების ეტაპები და მისი მნიშვნელობა ბაზრის გამჭვირვალობისა და კონკურენტუნარიანობის გაუმჯობესებისთვის. ტესტის მიზანს წარმოადგენს იმის შეფასება, უზრუნველყოფს თუ არა „მაგთიკომი“, როგორც მნიშვნელოვანი ძალაუფლების მქონე ოპერატორი, სამართლიან პირობებს მობილურ და ფიქსირებულ ქსელზე დაშვების მსურველებისთვის. გარდა ამისა, ოპერატორთან გამართული სამუშაო შეხვედრა დაეთმო კომპანიის მიერ გამოქვეყნებული მოწვევის ოფერტების განხილვას. ComCom-მა, ექსპერტების დახმარებით, „მაგთიკომს“ ოფერტებთან დაკავშირებული შინაარსობრივი შენიშვნები გააცნო, რათა მნიშვნელოვანი ძალაუფლების მქონე ოპერატორის მიერ შეთავაზებული პროცედურული, კომერციული თუ ტექნიკური პირობები, დაშვების მსურველთათვის გამჭვირვალე და არადისკრიმინაციული ყოფილიყო.

შეგახსენებთ, რომ კომპლექსური კვლევის პირველი ეტაპი 2024 წელს დასრულდა, რომლის შედეგადაც დადგინდა, რომ როგორც ფიქსირებული, ასევე მობილური კომუნიკაციების ბაზარი იყო არაკონკურენტული და განიცდიდა სტაგნაციას, ხოლო ორივე ბაზარზე „მაგთიკომი“ მნიშვნელოვანი ძალაუფლების მქონე ოპერატორი იყო, რის გამოც ComCom-მა მას სხვა კომპანიების ქსელზე დაშვების ვალდებულებები განუსაზღვრა. 

კომუნიკაციების კომისიამ 2022 წელს ევროკავშირის დაფინანსებითა და ევროკავშირსა და საქართველოს შორის ასოცირების შესახებ შეთანხმების განხორციელების დახმარების („AA Facility“) ფარგლებში, ევროკავშირის ექსპერტებთან ერთად დაიწყო მუშაობა საქართველოს სატელეკომუნიკაციო ბაზრის კომპლექსური კვლევის პროექტზე, რომელიც ტელეკომ ბაზარზე კონკურენციის ხელშეწყობას,  მომხმარებლებისთვის მრავალფეროვანი, ხარისხიანი თუ ხელმისაწვდომი მომსახურებების უზრუნველყოფასა და ასოცირების შეთანხმებით ნაკისრი ვალდებულებების მიხედვით, საქართველოს მარეგულირებელი ჩარჩოს ევროპულთან დაახლოებას ემსახურება. საგულისხმოა, რომ კვლევა ევროკავშირში მოქმედ სატელეკომუნიკაციო ბაზრის ანალიზის მიდგომებთან სრულ შესაბამისობაშია და ევროპულ საუკეთესო პრაქტიკას ეყრდნობა.