ბიზნეს სექტორის მხრიდან გამოითქვა სრული მზაობა პროცესებში მონაწილეობის, - ამის შესახებ გადაცემა  „იმედის დილაში“ რუბრიკა Business Insider Georgia-ში სტუმრობისას განათლებისა და მეცნიერების მინისტრმა გივი მიქანაძემ განაცხადა. მისი თქმით, ბიზნეს სექტორს სჭირდება ხარისხზე ორიენტირებული განათლებით მიღებული პროფესიონალები.

„ძალიან მნიშვნელოვანია როდესაც ეკონომიკურ წინსვლაზე ვსაუბრობთ ნებისმიერი ფუნდამენტი რა თქმა უნდა ხარისხიანი განათლებაა და  ამ კუთხით განათლების, მეცნიერებისა და ახალგაზრდობის სამინისტროს განსაკუთრებით 2025 წელს ძალიან ბევრი აქვს სათქმელი. მოგეხსენებათ, რომ დაანონსდა 2 უმნიშვნელოვანესი რეფორმა. ერთი ეს არის უმაღლესი განათლების რეფორმის კონცეფცია, რომელიც ოქტომბერში პრემიერმა კომისიის 9 თვიანი მუშაობის შემდეგ საზოგადოებას წარუდგინა და ამის შემდეგ, ორი თვის განმავლობაში მოხდა ამ დოკუმენტის საჯარო განხილვები. მათ შორის ბიზნეს სექტორთან და ბიზნეს სექტორის მხრიდან გამოითქვა სრული მზაობა პროცესებში მონაწილეობის. რამე თუ ბიზნეს სექტორს სჭირდება ხარისხზე ორიენტირებული განათლებით მიღებული პროფესიონალები იმისთვის, რომ მათ გარკვეული პროფესიების მიხედვით არ სჭირდებოდეთ უცხოეთიდან ძვირად ღირებული კადრების ჩამოყვანა და პირდაპირი ორიენტირი იყოს ჩვენს მოქალაქეებზე, რომ ისინი დასაქმდნენ და ჰქონდეთ ღირსეული ანაზღაურება და ამისთვის ჩვენ მივცეთ შესაბამისი განათლება. დეკემბრის დასაწყისში ჩვენ ასევე დავაანონსეთ ზოგადი განათლების კონცეფციის დოკუმენტი, რომლის განხილვები მთელი თვის განმავლობაში მიმდინარეობდა, გუშინ ფაქტობრივად დასკვნითი შეხვედრა გვქონდა. ჩვენ მომავალ კვირას სავარაუდოდ მთავრობას შეჯერებულ დოკუმენტს წარვუდგენთ დასამტკიცებლად, რაც გვაძლევს იმის საფუძველს, რომ დავიწყოთ ფართომასშტაბიანი სასკოლო რეფორმა. აუცილებელია და ვერ შეიძლება ვსაუბრობდეთ უმაღლესი განათლების რეფორმაზე თუ არ გაქვს საუბარი სასკოლო რეფორმაზე, თუ არ გაქვს საუბარი პროფესიულ მიმართულებაზე.

ასევე, 2 კონკრეტულ ფაქტორს გამოვყოფდი 2025 წელთან მიმართებაში. ერთი ეს არის უპრეცედენტო და ისტორიული გადაწყვეტილება, რომელიც მმართველი გუნდის პოლიტიკურმა საბჭომ მიიღო და რაშიც პირდაპირ ჩართული იყო პარტიის საპატიო თავმჯდომარე და პრემიერ-მინისტრი, რომელთა ძალიან დიდი ძალისხმევითაც საქართველომ მიიღო გადაწყვეტილება იმის თაობაზე, რომ ყველა სახელმწიფო უნივერსიტეტში 2026 წლის სექტემბრიდან ჩარიცხული სტუდენტები ამიერიდან უფასოდ ისწავლიან. მთელი ციკლი დაწყებული სკოლიდან დასრულებული უმაღლესით დღეს გვაქვს უფასო განათლების მოცემულობაში. რაც არის მართლაც ისტორიული გადაწყვეტილება, იმიტომ, რომ ნებისმიერ მოქალაქეს თავისი ცოდნის, შრომის და უნარებიდან გამომდინარე უკვე შეუძლია, რომ გადასახადის გარეშე მიიღოს განათლება. და მეორე მნიშვნელოვანი ფაქტორი ეს არის ქართული ენის, სახელმწიფო ენის გაძლიერება. ის მიზანმიმართული კამპანია, რომელიც წინა ხელისუფლების პირობებში მიმდინარეობდა ქართული ენის საწინააღმდეგოდ, მის საპირწონედ მივიღეთ ძალიან მნიშვნელოვანი გადაწყვეტილებები, რომლის მიხედვითაც შევიდა ცვლილებები კანონმდებლობაში და დავამტკიცეთ კონკრეტული წესი და ყველა უმაღლეს სასწავლებელში ქართულ სექტორზე, ფაკულტეტზე მიმდინარე სასწავლო წლიდან უკვე დავაბრუნეთ სავალდებულო წესით, საბაკალავრო დონეზე ქართული ენის სწავლება. თუმცა ამ კუთხით მრავალი ნაბიჯი იდგმება იმისთვის, რომ გაძლიერდეს სახელმწიფო ენის ცნობიერება ჩვენს მოქალაქეებში“, - განაცხადა გივი მიქანაძემ.