თბილისის მერი კახა კალაძე თანამოქალაქეებს ახალ წელს ულოცავს.

მისი თქმით, ახალი წელი ყველაზე კეთილი დღესასწაულია - თანადგომის, მხარდაჭერის, უმწეოთა დახმარების, ერთმანეთის მიმართ სითბოსა და სიყვარულის გამოხატვის დღე.

„მოგესალმებით, ქალბატონებო და ბატონებო! მივესალმები თბილისს, სრულიად საქართველოს, მივესალმები საზღვრებს გარეთ მცხოვრებ ჩვენს თანამემამულეებს, დიდებს, პატარებს, ყველას. გილოცავთ ახალ წელს. დამეთანხმებით ალბათ, რომ ახალი წლის დადგომა ყოველთვის განსაკუთრებულ ემოციებს უკავშირდება. ეს არის დღესასწაული, რომელიც ერთ მუშტად კრავს და აერთიანებს მთელ მსოფლიოს საერთო მიზნებითა და სურვილებით - იყოს მშვიდობა დედამიწაზე და მეტი სიყვარული ადამიანების გულებში.

ახალი წელი ყველაზე კეთილი დღესასწაულია - თანადგომის, მხარდაჭერის, უმწეოთა დახმარების, ერთმანეთის მიმართ სითბოსა და სიყვარულის გამოხატვის დღე. ამ დღეს სამყარო გაცილებით კეთილი ხდება. ვისურვოთ, რომ ეს განწყობა არა მხოლოდ საახალწლო დღეებში, მთელი წელი იგრძნობოდეს ჩვენს ქალაქში და მთელ ქვეყანაში. დაე, იყოს 2026 წელი სავსე სიკეთით, სიყვარულით!

მეგობრებო, 2025 წელს თან ახლდა უამრავი გამოწვევა და სირთულე, მაგრამ იყო მნიშვნელოვანი გამარჯვებები, რამაც მოგვცა წინსვლისა და განვითარების შესაძლებლობა და დღეს შეგვიძლია, თამამად ვთქვათ, რომ საქართველომ ისეთი ნაბიჯები გადადგა წინ, უკან ვერასოდეს დაგვხევენ.

ამდენად, მინდა, მადლიერება გამოვხატო გასული წლის მიმართ; განსაკუთრებული მადლობა ვუთხრა ადამიანებს, ვინც გვენდო, გვერდით დაგვიდგა, გაგვაძლიერა და ყველას დაანახა, რამხელა ძალა აქვს ქვეყნის სიყვარულით გაერთიანებული ხალხის ნებას.

არ არსებობს სამშობლოს წარმატებასა და გამარჯვებაზე დიდი დღესასწაული, რადგან სამშობლო ერთია და ერთადერთი. ამ საზეიმო წუთებსაც კი თან ახლავს უდიდესი პასუხისმგებლობა ქვეყნის მომავლის და მისი ხვალინდელი დღის წინაშე.

ახალი წლის მიჯნაზე ვისურვოთ მშვიდობა და სტაბილურობა, მეტი სიკეთე და ურთიერთპატივისცემა, ზრუნვაზე დაფუძნებული საზოგადოება, განვითარება და კეთილდღეობა, ეკონომიკურად ძლიერი ოჯახები…

მჯერა, თბილისი მუდამ იქნება „სიკეთით სავსე ქალაქი“. იქ, სადაც სიკეთე გვაერთიანებს, შენდება მომავალი!!!

გილოცავთ ახალი წლის დადგომას!

ბედნიერი იყოს 2026 წელი ჩვენი ქვეყნისთვის და ჩვენი ოჯახებისთვის!“, - აღნიშნავს იგი.