თბილისის საკრებულოს სხდომაზე, დედაქალაქის 2026 წლის ბიუჯეტის გაზრდაზე საკრებულოს უმრავლესობის წევრმა და დიდუბის მაჟორიტარმა გივი ჩხარტიშვილმა განცხადება გააკეთა. როგორც გივი ჩხარტიშვილმა აღნიშნა, ბიუჯეტის ასეთი მნიშვნელოვანი ზრდა თბილისისთვის უფრო მეტი პროექტის განხორციელებას ნიშნავს. 

„ძალიან მნიშვნელოვანი და ისტორიული მომენტია. დედაქალაქის საკრებულოში თბილისის ბიუჯეტი ისტორიულ მაქსიმუმზეა - 2 მილიარდ 506 მილიონ ლარზე მეტი, რაც დაზუსტებულ ბიუჯეტზე 296 მილიონით მეტია. თბილისის ბიუჯეტის ზრდა ნიშნავს ჩვენი ქალაქისთვის უფრო მეტი სასიკეთო, ინფრასტრუქტურული, ჯანდაცვისა და სოციალური, რეკრეაციული, თუ სხვა პროექტების განხორციელების შესაძლებლობას, რაც ჩვენს თანაქალაქელებს შეუქმნის მეტად კომფორტულ გარემოს და ხელსაყრელ პირობებს“- განაცხადა გივი ჩხარტიშვილმა. 

საკრებულოს უმრავლესობის წევრი გამოეხმაურა ასევე პრემიერ-მინისტრის ინიციატივას ფასების კლებასთან დაკავშირებით. მისი თქმით, ეს ინიციატივა მოქალაქეების ყოველდღიურობის გაუმჯობესებას ისახავს მიზნად. 

„მინდა, გამოვეხმაურო პრემიერ-მინისტრის ინიციატივას სურსათზე, მედიკამენტებსა და საწვავზე ფასების კლებასთან დაკავშირებით, რაც ასევე ჩვენი მოქალაქეების ყოველდღიურობის გაუმჯობესებას ისახავს მიზნად. შექმნილი სამთავრობო კომისიის მუშაობის პროცესში, რომელიც ძალიან ეფექტურად და კოორდინირებულად მუშაობს სხვადასხვა უწყებასთან და ბიზნესთან, გამოიკვეთა დადებითი დინამიკა. მინდა მადლობა გადავუხადო ჩვენს გუნდს ამ ინიციატივისთვის, რადგან ეს ყველაფერი ჩვენი თანამოქალაქეების საკეთილდღეოდ კეთდება, რაც მათ ყოველდღიურ ყოფაზე დადებითად აისახება“- განაცხადა გივი ჩხარტიშვილმა.