საპროცედურო საკითხთა და წესების კომიტეტმა პარლამენტის ახალი რეგლამენტის პროექტი, თანმდევ პროექტებთან ერთად, მესამე მოსმენით განიხილა და მხარი დაუჭირა.

მესამე მოსმენით განხილვამდე, პარლამენტის თავმჯდომარე შალვა პაპუაშვილმა, პოლიტიკურ ჯგუფ „ხალხის ძალასთან" კონსულტაციებისა და პოზიციების შეჯერების შედეგად, კომიტეტის წევრებს მეორე მოსმენით რეგლამენტის პროექტის 149-ე მუხლი წარუდგინა, რომელიც ინტერპელაციას ეხება.

როგორც შალვა პაპუაშვილმა აღნიშნა, დღეს არსებული თვეში ერთი ინტერპელაციის ნაცვლად, ყოველ სასესიო კვირაში ინტერპელაციისთვის გამოყოფილი იქნება ორი დღე  თუკი კითხვები იარსებებს.

ინტერპელაციის დღე იქნება ოთხშაბათი და ხუთშაბათი,  ფიქსირებული დროით - 12:00-დან 15:00 საათამდე. პროცედურის თანახმად, სასესიო კვირის წინა ოთხშაბათის 12 საათამდე ინტერპელაციით კითხვის მიმართვის უფლების მქონე სუბიექტი, ფრაქცია ან შვიდკაციანი ჯგუფი, პარლამენტის თავმჯდომარეს უგზავნის კითხვებს.  პარლამენტის თავმჯდომარე ამ შეკითხვებს იმავე დღის ბოლომდე აჯგუფებს, უგზავნის შესაბამის ადრესატებს და იწვევს მათ პარლამენტში კითხვებზე პასუხის გასაცემად.

პარლამენტის ბიურო, პლენარული სხდომების დღის წესრიგის განსაზღვრისას, გაითვალისწინებს შესაბამისი პირის ინტერპელაციით მოსვლას. თუ ადრესატი ბევრი იქნება, ბიუროს შეეძლება ინტერპელაცია გადაანაწილოს სხვადასხვა დღეზე, ასევე შეამციროს პროცედურით გათვალისწინებული დროები, რომ მოაქციოს სამსაათიან რეგლამენტში.

„შეკითხვებზე პასუხის გაცემის და დაზუსტებების შემდეგ, შესაბამის სუბიექტებს შეუძლიათ ორ-ორი ზეპირი კითხვა, ასე ვთქვათ, სპონტანური კითხვაც დაუსვან ადრესატს. ამის შემდეგ გათვალისწინებულია 15-წუთიანი შესვენება, რომელზეც ადრესატს შეუძლია უარი თქვას, თუკი მას არ სჭირდება რაიმე დამატებითი ინფორმაცია. ადრესატს კითხვებზე პასუხის გასაცემად 10 წუთი აქვს, რომელიც ასევე  შეიძლება გაგრძელდეს სხდომის თავმჯდომარის გადაწყვეტილებით. პასუხების შემდეგ, ფრაქციებს, უფრაქციო  წევრებს შესაძლებლობა აქვთ ხუთწუთიანი რეგლამენტით გამოვიდნენ და შეაჯამონ კითხვა-პასუხის პროცედურა მათი პოლიტიკური გადმოსახედიდან და ბოლოს, ადრესატსაც აქვს ხუთი წუთი შემაჯამებელი გამოსვლისთვის", - განაცხადა პარლამენტის თავმჯდომარემ.

როგორც შალვა პაპუაშვილმა აღნიშნა, ინტერპელაციის ახალი წესის შემოღებით, აბსოლუტურად სხვა ინტერაქციას შეიძენს ინტერპელაცია, ვიდრე აქამდე იყო.  მისივე თქმით, იარსებებს შეზღუდვა, რომლის თანახმად, ერთი და იგივე ადრესატი თვეში მხოლოდ ერთხელ შეიძლება დაიბარონ პარლამენტში ინტერპელაციაზე.

რეგლამენტის პროექტით, ყოველი თვის პლენარული სხდომების კვირის ბოლო ოთხშაბათს შესაძლებელი იქნება ჩატარდეს პრემიერ-მინისტრის ინტერპელაცია.

პარლამენტის თავმჯდომარემ, ასევე, ისაუბრა რეგლამენტის პროექტში შეტანილ რამდენიმე ცვლილებაზე, რომელიც  საპარლამენტო ჯილდოებსა და პარლამენტის სტრუქტურას შეეხება.