საქართველოს პარლამენტის თავმჯდომარე შალვა პაპუაშვილი  თურქმენეთის მეჯლისის საქართველოსთან მეგობრობის ჯგუფის წარმომადგენლებს შეხვდა.

შეხვედრაზე ხაზი გაესვა საქართველოსა და თურქმენეთს შორის ტრადიციულად მეგობრულ ურთიერთობებს, რომლებიც უკანასკნელ პერიოდში წარმატებით ვითარდება.

აღინიშნა მაღალი დონის ვიზიტების პოზიტიური დინამიკა. კერძოდ, ყურადღება გამახვილდა შალვა პაპუაშვილის ნაყოფიერ ოფიციალურ ვიზიტზე თურქმენეთში, რომელიც გასულ წელს განხორციელდა.

შალვა პაპუაშვილმა ხაზგასმით აღნიშნა თურქმენეთის ტრადიციული, მშვიდობაზე ორიენტირებული პოლიტიკა, რომელიც განსაკუთრებით მნიშვნელოვანია თანამედროვე მსოფლიოში არსებული გეოპოლიტიკური ძვრების ფონზე.

ასევე, ხაზი გაესვა თურქმენეთის ნეიტრალიტეტის გამოცხადების 30-ე წლისთავს. შალვა პაპუაშვილის თქმით, საქართველომ გამოხატა თურქმენეთის აღნიშნული სტატუსისადმი მხარდაჭერა გაერო-ს გენერალური ასამბლეის მიერ მიღებული  რეზოლუციის „თურქმენეთის მუდმივი ნეიტრალიტეტი" თანასპონსორობის ინიციატივით. 

შეხვედრაზე ისაუბრეს საპარლამენტო კავშირების შემდგომ განვითარებაზე, მათ შორის, მეგობრობის ჯგუფებს, სექტორულ კომიტეტებსა და საკანონმდებლო ორგანოების ადმინისტრაციების შორის. თურქმენეთის მხარემ, აგრეთვე, ხაზი გაუსვა ქალ დეპუტატთა და ახალგაზრდა დეპუტატებს შორის კავშირების გაძლიერების სურვილს.

მხარეებმა, ასევე, განიხილეს ორ ქვეყანას შორის ეკონომიკური თანამშრომლობა, კულტურული და საგანმანათლებლო კავშირები.

თურქმენეთის მხარემ კიდევ ერთხელ დაადასტურა საქართველოს სუვერენიტეტისა და ტერიტორიული მთლიანობისადმი მტკიცე მხარდაჭერა.