საშუალება გვაქვს, რომ იმ სექტორებში, სადაც დეფიციტი არის შრომითი რესურსის, გვქონდეს სისტემურად შრომითი რესურსის შემოყვანის საშუალება და სადაც ჭარბი არის მიწოდება, იქ დაცული იყოს შრომითი ბაზარი. ეს ნიშნავს, რომ ადგილობრივ შრომით რესურსს ჰქონდეს უპირატესობა იმიტომ, რომ ზედმეტი კონკურენცია არ გვჭირდება, - განაცხადა პარლამენტის ეკონომიკური პოლიტიკის კომიტეტის თავმჯდომარემ შოთა ბერეკაშვილმა, „შრომითი მიგრაციის შესახებ კანონში“ შესულ ცვლილებებზე საუბრისას. 

მისი თქმით, საბოლოო მიზანია, რომ იმ სექტორებისთვის, სადაც ადგილობრივი შრომითი რესურსის დეფიციტია მოხდეს კადრების გადამზადება. 

„საბოლოო ჯამში მნიშვნელობა აქვს ასეთ სისტემურ მიდგომას იმიტომ, რომ ჩვენ ზუსტად გვეცოდინება დეფიციტური მიმართულებები. შევეცდებით, რომ ამ მიმართულებებზე გადავამზადოთ საკუთარი შრომითი რესურსი და საბოლოო ჯამში, გრძელვადიან პერსპექტივაში გვინდა, რომ საკუთარი შრომითი რესურსით ჩავანაცვლოთ ის დეფიციტური სამუშაო ადგილები“, - განაცხადა შოთა ბერეკაშვილმა. 

დასაქმების ხელშეწყობის სახელმწიფო სააგენტომ, ბიზნესის, დამსაქმებელთა და საბანკო ასოციაციებს, „შრომითი მიგრაციის შესახებ კანონში“ შესული ცვლილებები გააცნო, რომელიც პირველი მარტიდან ამოქმედდება.

ცვლილების მიხედვით, უცხო ქვეყნის მოქალაქეს კანონიერად დასაქმებისთვის, მათ შორის დისტანციურად, „შრომითი საქმიანობის უფლების“ მოპოვება დასჭირდება. უცხოელთათვის „შრომითი საქმიანობის უფლების“ ნებართვებს „დასაქმების ხელშეწყობის სახელმწიფო სააგენტო“ გასცემს და ნებართვის მიღება ფასიანია.

რაც შეეხება თვითდასაქმებულ უცხოელს, სამუშაო უფლება გაიცემა კონკრეტული სფეროს, სექტორისა და სამეწარმეო საქმიანობის მითითებით. უცხო ქვეყნის მოქალაქეებისთვის, სამუშაო ნებართვა არ გაიცემა გიდების, ტაქსისა და საკურიერო მომსახურებების გაწევაზე.