საქართველოს ვიცე-პრემიერმა, საგარეო საქმეთა მინისტრმა მაკა ბოჭორიშვილმა შეხვედრა გამართა ეუთო-ს მოქმედ თავმჯდომარესთან, შვეიცარიის კონფედერაციის ვიცე-პრეზიდენტთან, საგარეო საქმეთა ფედერალური დეპარტამენტის ხელმძღვანელთან, იგნასიო კასისთან, რომელიც პირველი ოფიციალური ვიზიტით საქართველოს ეწვია.

შეხვედრაზე მხარეებმა განიხილეს ეუთო-ს ფარგლებში თანამშრომლობის აქტუალური საკითხები, საქართველოსა და შვეიცარიას შორის ორმხრივი ურთიერთობები და მათი შემდგომი გაღრმავების შესაძლებლობები. ყურადღება ასევე გამახვილდა რეგიონსა და მსოფლიოში არსებულ ვითარებასა და უსაფრთხოების გამოწვევებზე.

მაკა ბოჭორიშვილმა მადლობა გადაუხადა შვეიცარიის მხარეს, როგორც ეუთო-ს თავმჯდომარე ქვეყანას, ორგანიზაციის ფარგლებში საქართველოს სუვერენიტეტისა და ტერიტორიული მთლიანობის მხარდაჭერისთვის. ხაზი გაესვა ჟენევის საერთაშორისო მოლაპარაკებების და მასში საერთაშორისო პარტნიორების ჩართულობის მნიშვნელობას, მათ შორის, ეუთო-ს თანათავმჯდომარეობას. აღსანიშნავია, რომ შვეიცარიის საგარეო საქმეთა ფედერალური დეპარტამენტის ხელმძღვანელი ეწვევა საოკუპაციო ხაზს და ადგილზე გაეცნობა არსებულ ვითარებას.

შეხვედრაზე მხარეებმა ასევე ისაუბრეს ეუთო-ს ფარგლებში ეკონომიკურ განზომილებაზე, როგორც უსაფრთხოების ერთ-ერთ მნიშვნელოვან კომპონენტზე და საქართველოს როლზე დაკავშირებადობის თვალსაზრისით.

საუბარი ასევე შეეხო საქართველოს მიერ 2027 წელს ეუთო-ს თავმჯდომარეობის კანდიდატურის წარდგენას.

შეხვედრის დასასრულს, მხარეებმა დაადასტურეს მზადყოფნა ეუთო-ს ფარგლებში თანამშრომლობის შემდგომი გაძლიერებისთვის.