ყველას ვულოცავ დღევანდელ დღეს და ვუსურვებ მშვიდობიან, სტაბილურ და ძლიერ საქართველოში ცხოვრებას, - განაცხადა საქართველოს საგარეო საქმეთა მინისტრმა მაკა ბოჭორიშვილმა. 

საგარეო საქმეთა მინისტრის თქმით, 26 მაისი ჩვენი ქვეყნის თანამედროვე ისტორიისთვის ყველაზე მნიშვნელოვანი, ემოციური დღეა.

„დღეს ჩვენ ვცხოვრობთ დამოუკიდებელ საქართველოში, თუმცა ბრძოლა დამოუკიდებლობისთვის, სუვერენიტეტისთვის, ეს არის ყოველდღიური საქმე, რაც ჩვენი ვალია, თითოეული ქართველის, იმისთვის, რომ ის, რაც არის ჩვენი ქვეყნის მონაპოვარი, შევძლოთ, რომ დავიცვათ, გვქონდეს მშვიდობა, სტაბილურობა და ვიცხოვროთ ისეთ საქართველოში, როგორზეც უოცნებიათ ჩვენს წინაპრებს, ვოცნებობთ ჩვენ და გვინდა, რომ იყოს ჩვენი შვილებისთვის“, - განაცხადა მაკა ბოჭორიშვილმა.

როგორც დიპლომატიური უწყების ხელმძღვანელმა აღნიშნა, პარტნიორებისგან ბევრი მილოცვა მიიღო საქართველომ. 

„საკმაოდ ბევრი მოლოცვა მივიღეთ, ეს პროცესი გრძელდება. დღეს არის ჩვენი ქვეყნის დამოუკიდებლობის დღე და რა თქმა უნდა, ჩვენი პარტნიორები, მეგობრები გვილოცავენ. ამისთვის რა თქმა უნდა, ჩვენ მადლობელი ვართ, რომ ეს დღე გაზიარებულია მათ მიერ“,-აღნიშნა საგარეო საქმეთა მინისტრმა.

მაკა ბოჭორიშვილმა საგარეო საქმეთა სამინისტროს მიერ დაგეგმილ და უკვე განხორციელებულ ღონისძიებებზე ისაუბრა და აღნიშნა, რომ მნიშვნელოვანია, საქართველოს ფარგლებს გარეთ სათანადოდ აღინიშნოს საქართველოს დამოუკიდებლობის დღე. მან კულტურის მინისტრს თანამშრომლობისთვის მადლობა გადაუხადა. 

„საქართველოში საგარეო საქმეთა სამინისტრო დღეს მცხეთაში უმასპინძლებს სტუმრებს. ორგანიზებული იქნება სხვადასხვა ტიპის გასართობი ღონისძიებები, განსაკუთრებით ბავშვებისთვის. რა თქმა უნდა, გვექნება გარკვეული შესაძლებლობა, რომ ჩვენი დიასპორის წარმომადგენლებსაც დავუთმოთ დრო. გვეყოლებიან დიასპორის წარმომადგენლები, რომლებიც შეასრულებენ სიმღერებს. რა თქმა უნდა, ჩვენთვის მნიშვნელოვანია, რომ საქართველოს ფარგლებს გარეთ სათანადოდ აღინიშნოს საქართველოს დამოუკიდებლობის დღე. საზღვარგარეთ საქართველოს ყველა საელჩო, ყველა დიპლომატი ზეიმობს ამ დღეს და ძალიან ბევრი აქტივობა არის დაგეგმილი, განსაკუთრებით ქართული კულტურის წარმოჩენის თვალსაზრისით. ამისთვის მადლობა მინდა გადავუხადო კულტურის სამინისტროს, კულტურის მინისტრს თანამშრომლობისთვის. ამ პერიოდისთვის არაერთი საინტერესო ღონისძიება დაიგეგმა. ჩვენს მეგობრებს, პარტნიორებს ექნებათ შესაძლებლობა ამ დღესთან დაკავშირებით ეზიარონ ქართულ კულტურას“, - განაცხადა მაკა ბოჭორიშვილმა.