თბილისის საკრებულოს სხდომაზე ფრაქცია „ქართული ოცნება - დემოკრატიული საქართველოს“ თავმჯდომარემ, ოთარ გრიგოლიამ, მოახლოებულ ადგილობრივ თვითმმართველობის არჩევნებთან დაკავშირებით განცხადება გააკეთა. მან „ქართული ოცნების“ კანდიდატებს წარმატება უსურვა და ოპოზიციის განცხადებებს გამოეხმაურა. 

„მინდა ყველა კანდიდატს წარმატება ვუსურვო. აღვნიშნავ, რომ საარჩევნო პერიოდი თავისი შინაარსით ძალიან მშვიდია. თურმე მაშინაა შესაძლებელი მშვიდი საარჩევნო პროცესის წარმართვა,  როდესაც „ნაციონალური მოძრაობა“ არ მონაწილეობს არჩევნებში. 

თუმცა მინდა გამოვეხმაურო ალეკო ელისაშვილის განცხადებას, რომელმაც თქვა, რომ თუკი „ლელო“ მოიგებს არჩევნებს, გააჩერებენ მუნიციპალიტეტის მუშაობას და ის აიძულებს მერიის თანამშრომლებს, რომ გაიფიცონ. ასეთი აბსურდი, რაც პოლიტიკურ ცხოვრებაში ვარ, არ გამიგია. მათ, სამწუხაროდ, კარიკატურიზებული პოლიტიკა აირჩიეს.  ჩვენ კი სხვა გზა გვაქვს, ჩვენი საქმე არის შენება და განვითარება. 

კიდევ ერთხელ მინდა წარმატებები ვუსურვო „ქართულ ოცნებას“. დარწმუნებული ვარ, ადგილობრივი თვითმმართველობის არჩევნებში გავიმარჯვებთ.  ყველა იმ რადიკალურ ჯგუფს, რომლებიც 4 ოქტომბერზე ამყარებენ იმედებს, მინდა ვუთხრა, რომ 4 ოქტომბერი არის თარიღი, რომელიც ლევან ხაბეიშვილმა, „ნაციონალურმა მოძრაობამ“ კეზერაშვილთან ერთად დაგეგმეს,  მოიფიქრეს და ყველა, ვინც ამ თარიღზე აკეთებს სწორებას, ცხადად და ერთმნიშვნელოვნად არის „ნაციონალური მოძრაობის“ თანამოაზრე, მისი თანაპარტიელი და რადიკალური დღის წესრიგის ნაწილი. ვისაც არ უნდა, რომ „ნაციონალური მოძრაობის“ გაგრძელებად იწოდებოდეს, ამ პროცესში მონაწილეობა არ უნდა მიიღოს“,  -  განაცხადა ოთარ გრიგოლიამ.