იურიდიულ საკითხთა კომიტეტმა პირველი მოსმენით, დაჩქარებული წესით განიხილა და მხარი დაუჭირა „შრომითი მიგრაციის შესახებ“ კანონში შესატან ცვლილებას.

კანონპროექტის თანახმად: შემუშავდება და დაინერგება უცხოელის დასაქმებისთვის სპეციალური სამუშაო უფლების გაცემის მექანიზმი; შემუშავდება აღნიშნული სამუშაო უფლების გაცემის კრიტერიუმები; დარეგულირდება საქართველოში უცხოელი ფიზიკური პირების შრომითი/სამეწარმეო საქმიანობა (ისეთი შემთხვევები, როდესაც არ გვაქვს კლასიკური დასაქმება); შემუშავდება კანონმდებლობით დადგენილი ნორმების აღსრულების ახალი მექანიზმები და განისაზღვრება მათი აღმასრულებელი უწყებები; გაიზრდება საჯარიმო სანქცია იმ დამსაქმებლებთან მიმართებაში, ვინც უცხოელს დაასაქმებს სპეციალური სამუშაო უფლების მოპოვების გარეშე; დაწესდება საჯარიმო სანქცია თითოეული შრომითი მიგრანტისთვის, რომელიც საქართველოში სპეციალური სამუშაო უფლების გარეშე ეწევა შრომით/სამეწარმეო საქმიანობას.

როგორც მომხსენებელმა, დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ შოთა ბერეკაშვილმა განაცხადა, ცვლილების მთავარი მიზანია დაცული იყოს ქვეყნის შრომითი ბაზარი, გახდეს ის უფრო კონკურენტუნარიანი და მაქსიმალურად შესაძლებელი იყოს შრომითი ბაზრის ეროვნულ ეკონომიკაში წარმატებული ინტეგრაცია.

მისივე თქმით, ცვლილებები 2026 წლის პირველი მარტს ამოქმედება, ვინაიდან ახალი რეგულაციების იმპლემენტაციისთვის შესაბამის სახელმწიფო უწყებებს სათანადო დრო უნდა მიეცეთ. 

შოთა ბერეკაშვილმა გაითვალისწინა იურიდიულ საკითხთა კომიტეტის თავმჯდომარის, არჩილ გორდულაძის შეთავაზება იმის თაობაზე, რომ მეორე მოსმენის დროს კანონპროექტში აისახოს: საფასურების, საინვესტიციო ბინადრობის ნებართვასთან და საქართველოში კანონიერი საფუძვლის გარეშე მყოფი უცხოელის გამოვლენასთან დაკავშირებული საკითხები.