აშშ-ს საელჩო განმარტავს, რომ საიმიგრაციო ვიზების დაპაუზება ტურისტულ ვიზებს არ ეხება
ამერის შეერთებული შტატების საელჩო საიმიგრაციო ვიზების შესახებ ინფორმაციას აქვეყნებს იმ ქვეყნის მოქალაქეებისთვის, რომლებიც საზოგადოებრივი სარგებლის გამოყენების მაღალ რისკს წარმოადგენენ.
უწყების ცნობით, პრეზიდენტმა ტრამპმა მკაფიოდ განაცხადა, რომ იმიგრანტები უნდა იყვნენ ფინანსურად თვითკმარნი და არ უნდა წარმოადგენდნენ ფინანსურ ტვირთს ამერიკელი გადასახადის გადამხდელებისთვის.
„სახელმწიფო დეპარტამენტი ახორციელებს ყველა პოლიტიკის, რეგულაციისა და სახელმძღვანელო დოკუმენტის სრულ გადახედვას, რათა უზრუნველყოს, რომ მაღალი რისკის მქონე ქვეყნებიდან ჩამოსული იმიგრანტები არ გამოიყენებენ სოციალურ დახმარებას შეერთებულ შტატებში და არ გახდებიან საჯარო ტვირთი.
2026 წლის 21 იანვრიდან სახელმწიფო დეპარტამენტი დროებით აჩერებს ყველა საიმიგრაციო ვიზის გაცემას შემდეგი ქვეყნების მოქალაქეებისთვის:
ავღანეთი, ალბანეთი, ალჟირი, ანტიგუა და ბარბუდა, სომხეთი, აზერბაიჯანი, ბაჰამის თანამეგობრობა, ბანგლადეში, ბარბადოსი, ბელარუსი, ბელიზი, ბუტანი, ბოსნია და ჰერცეგოვინა, ბრაზილია, მიანმარი, კამბოჯა, კამერუნი, კაბო ვერდე, კოლუმბია, კოტ დივუარი, კუბა, კონგოს რესპუბლიკა, დომინიკის თანამეგობრობა, ეგვიპტე, ერიტრეა, ეთიოპია, ფიჯი, გამბია, საქართველო, განა, გრენადა, გვატემალა, გვინეა, ჰაიტი, ირანი, ერაყი, იამაიკა, იორდანია, ყაზახეთი, კოსოვო, ქუვეითი, ყირგიზეთი, ლაოსი, ლიბანი, ლიბერია, ლიბია, მოლდოვა, მონღოლეთი, მონტენეგრო, მაროკო, ნეპალი, ნიკარაგუა, ნიგერია, ჩრდილოეთ მაკედონია, პაკისტანი, კონგოს დემოკრატიული რესპუბლიკა, რუსეთი, რუანდა, სენტ-კიტსი და ნევისი, სენტ-ლუსია, სენტ ვინსენტი და გრენადინები, სენეგალი, სიერა ლეონე, სომალი, სამხრეთ სუდანი, სუდანი, სირია, ტანზანია, ტაილანდი, ტოგო, ტუნისი, უგანდა, ურუგვაი, უზბეკეთი და იემენი“, - აღნიშნულია გავრცელებულ ინფორმაციაში.
აშშ-ის საელჩო ასევე აქვეყნებს ხშირად დასმულ შეკითხვებს და შესაბამის პასუხებს.
„ხშირად დასმული შეკითხვები:
რა ბედი ეწევა ჩემს საიმიგრაციო ვიზის გასაუბრების თარიღს?
საიმიგრაციო ვიზა აპლიკანტებს, რომლებიც ზემოთ აღნიშნული ქვეყნების მოქალაქეები არიან, შეუძლიათ განაცხადის წარდგენა და გასაუბრებაზე დასწრება. დეპარტამენტი გააგრძელებს გასაუბრების თარიღების ჩანიშვნას, თუმცა პაუზის პერიოდში ამ მოქალაქეებზე საიმიგრაციო ვიზები არ გაიცემა.
არსებობს თუ არა გამონაკლისები?
ორმაგი მოქალაქეობის მქონე პირებზე, რომლებიც განაცხადს წარადგენენ იმ ქვეყნის მოქმედი პასპორტით, რომელიც ზემოთ ჩამოთვლილ სიაში არ შედის, ეს პაუზა არ გავრცელდება.
ექნება თუ არა გავლენა ამ პაუზას ჩემს ამჟამად მოქმედ ვიზაზე?
არა. ამ მითითების ფარგლებში არც ერთი საიმიგრაციო ვიზა არ გაუქმებულა. შეერთებულ შტატებში შესვლასთან დაკავშირებული შეკითხვებით, გთხოვთ, მიმართოთ შიდა უსაფრთხოების დეპარტამენტს (DHS).
ეს პაუზა ვრცელდება თუ არა ტურისტულ ვიზებზე?
არა. ეს პაუზა ვრცელდება მხოლოდ საიმიგრაციო ვიზა აპლიკანტებზე. ტურისტული ვიზები არასაიმიგრაციო ვიზებია“, - განმარტავს საელჩო.
დღის ტოპ 10 სიახლე
სხვა სიახლეები
რევაზ სოხაძემ თბილისის საერთაშორისო საინვესტიციო ფორუმი გახსნა
18.02.2026.13:22
საქართველოს ინფრასტრუქტურის მინისტრმა, რევაზ სოხაძემ, ოფიციალურად გახსნა 2026 წლის თბილისის სტუმარმასპინძლობის საერთაშორისო საინვესტიციო ფორუმი (Hospitality Investment Forum Tbilisi 2026) და მონაწილეებს სიტყვით მიმართა.
ფორუმი წარმოადგენს პროფესიულ პლატფორმას, რომელიც მიზნად ისახავს სტუმარმასპინძლობის ინდუსტრიის განვითარებასა და საერთაშორისო საინვესტიციო თანამშრომლობის გაძლიერებას. ღონისძიება აერთიანებს სასტუმრო ოპერატორებს, საერთაშორისო ბრენდებს, დეველოპერებს, ინვესტორებს, საფინანსო ინსტიტუტებსა და საჯარო სექტორის წარმომადგენლებს. ისინი განიხილავენ საქართველოში და რეგიონში მიმდინარე და დაგეგმილ საინვესტიციო პროექტებს, ბაზრის გაფართოების შესაძლებლობებსა და კაპიტალის განთავსების პერსპექტივებს.
ფორუმის ფარგლებში იმართება პანელური დისკუსიები და პრეზენტაციები საქართველოს ტურიზმის საინვესტიციო პოტენციალზე, საერთაშორისო ინტერესის რეალურ ინვესტიციად გარდაქმნის მექანიზმებზე, პრემიუმ და ლუქს სეგმენტის განვითარებაზე, ასევე სექტორში არსებულ ბაზრის ტენდენციებსა და შეფასების ინსტრუმენტებზე.
მინისტრმა სიტყვით გამოსვლისას აღნიშნა, რომ სტუმარმასპინძლობის ინდუსტრია საქართველოს ეკონომიკის ერთ-ერთი ყველაზე დინამიკური სფეროა, რომელიც ქმნის სამუშაო ადგილებს, აძლიერებს რეგიონებს და ზრდის ქვეყნის საერთაშორისო კონკურენტუნარიანობას. მისი თქმით, სტუმარმასპინძლობა ქვეყნის იდენტობის ნაწილია და არა მხოლოდ ეკონომიკური სექტორი.
სოხაძის განცხადებით, ეკონომიკური ზრდისა და მდგრადი ტურიზმის მხარდასაჭერად, საქართველოს მთავრობა და ინფრასტრუქტურის სამინისტრო მასშტაბურ პროექტებს ახორციელებენ. ფართოვდება საერთაშორისო აეროპორტები, საგზაო პროექტების პარალელურად, აქცენტი კეთდება რეგიონების ურბანულ განახლებასა და ოთხსეზონიანი ინფრასტრუქტურის მოწყობაზე.განახლებული ლოკაციები და გამართული წყალმომარაგების სისტემები კერძო სექტორისთვის ახალ საინვესტიციო შესაძლებლობებს აჩენს.
რევაზ სოხაძემ ხაზი გაუსვა საქართველოს ამბიციას, ჩამოყალიბდეს რეგიონულ ჰაბად, სადაც ტურიზმი, სტუმარმასპინძლობა და თანამედროვე ინფრასტრუქტურა ერთიან სისტემად ვითარდება. მან ასევე ისაუბრა სახელმწიფოს როლზე, როგორც სანდო პარტნიორზე, რომელიც ქმნის გამჭვირვალე და პროგნოზირებად ბიზნესგარემოს, ამცირებს ბიუროკრატიულ ბარიერებს, ხელს უწყობს საჯარო–კერძო პარტნიორობებს და აქტიურად ავითარებს ინფრასტრუქტურას.
„საქართველო ქმნის ღია და პროგნოზირებად ბიზნესგარემოს, სადაც ინვესტიცია ნიშნავს არა მხოლოდ კომერციულ წარმატებას, არამედ წვლილს ქვეყნის განვითარებაში. დღეს არის სწორი დრო, რომ ერთად შევქმნათ ახალი ტურისტული მიმართულებები და საერთაშორისო დონის ინფრასტრუქტურა. დღეს არის სწორი დრო ინვესტირებისთვის, თანამშრომლობისთვის და განვითარებისთვის,“ — აღნიშნა სიტყვით გამოსვლისას მინისტრმა.
