4 ოქტომბერს დამარცხდა ბოროტება და გაიმარჯვა საქართველომ

პოლიტიკა

არჩევნებში გამარჯვება არა მხოლოდ კახი კალაძის და მისი გუნდის გამარჯვებაა, არამედ თბილისისა და თითოეული თბილისელის - ავთანდილ ცინცაძე

10.10.2025.17:29

„ადგილობრივი თვითმმართველობის არჩევნებში გამარჯვება მხოლოდ კახი კალაძის და მისი გუნდის გამარჯვება არ არის. ეს თბილისისა და თბილისელების გამარჯვებაა. სწორედ ამიტომ მინდა თითოეულ ამომრჩეველს მადლობა გადავუხადო და ეს გამარჯვება მივულოცო“, - განაცხადა საკრებულოს სხდომაზე სიტყვით გამოსვლისას დედაქალაქის წარმომადგენლობითი ორგანოს ეკონომიკური განვითარების, საინვესტიციო პოლიტიკისა და საერთაშორისო ურთიერთობების კომისიის თავმჯდომარემ, ავთანდილ ცინცაძემ.

„კახი კალაძეს, თითოეულ თქვენგანს, ყველა კანდიდატს გილოცავთ ამ გამარჯვებას. როგორც საბურთალოს რაიონის მაჟორიტარობის კანდიდატმა, მინდა განსაკუთრებული მადლობა საბურთალოს მცხოვრებლებს გადავუხადო“, - განაცხადა ავთანდილ ცინცაძემ და აღნიშნა, რომ წინასაარჩევნო კამპანიის დროს მიმდინარე შეხვედრებზე ამ რაიონში მოსახლეობის მხრიდან მხარდაჭერა ყოველთვის იგრძნობოდა.

„ვეცდები, ეს მხარდაჭერა ერთიათად დავუბრუნო თითოეულ მათგანს. დარწმუნებული ვარ, რომ ჩვენს თბილისელებთან ერთად მომავალი ოთხი წლის განმავლობაში ვიამაყებთ იმ წარმატებული პროექტებით, რომლებსაც კახი კალაძე და მისი გუნდი აუცილებლად განახორციელებს“, - დასძინა ავთანდილ ცინცაძემ.