იმ სამედიცინო დაწესებულებს, რომელთა რეანიმაციული და ქირურგიული განყოფილები სახანძრო უსაფრთხოების საკითხებზე ბოლოს დროს დაწესებულ სტანდარტებს ვერ აკმაყოფილებდნენ, საევაკუაციო გასასვლელების შესაბამისობაში მოყვანასთან დაკავშირებით გონივრული ვადა განუსაზღვრეს.  

როგორც Business Insider Georgia-სთან საუბრისას ჯანდაცვის ასოციაციის ხელმძღვანელმა ნინო კიკნაძემ განაცხადა, ასოციაციამ ჯანდაცვის სამინისტროსთან რეანიმაციული და ქირურგიული განყოფილებების სახანძრო უსაფრთხოების საკითხებზე აქტიურად იმუშავა და შედეგად კლინიკებს, რომლებშიც სხვა სტანდარტები შესაბამისობაშია, ამ კონკრეტული საკითხის გადასაჭრელად 1 წლიანი ვადა მიეცათ.  

„სამინისტრომ რეანიმაციისა და ქირურგიის განყოფილებების სტანდარტები განსაზღვრა, რომელიც სამედიცინო დაწესებულებებს უნდა დაეკმაყოფილებინათ და 6 თვის განმავლობაში უნდა მოეყვანათ სისრულეში. 30 აგვისტომდე მათ სამინისტროსთვის განცხადება უნდა წარედგინათ, რის შემდეგაც უნდა შემოწმებულიყო რამდენად აკმაყოფილებს ესა თუ ის სამედიცინო დაწესებულების რეანიმაციული და ქირურგიული განყოფილებები  ამ სტანდარტებს. 

სახანძრო უსაფრთხოებაზე გარკვეულ სამედიცინო დაწესებულებას ჰქონდათ პრობლემები იმ კუთხით, რომ შენობები არის ძველი დაპროექტებული, მაგალითად, 7 წლის უკან არსებული კანონის მოთხოვნებს სახანძრო უსაფრთხოების ნაწილში აკმაყოფილებდნენ თუმცა დღეს ზოგი კლინიკა ამ სტანდარტს ვერ პასუხობს,  თუმცა ეს იმას არ ნიშნავს, რომ იქ სახანძრო უსაფრთხოება არ არის დაცული. თუმცა ზოგს მოუწევდა შენობის დანგრევა, გადაკეთება რათა ეს ახალი სტანდარტები დაეკმაყოფილებინა. ამ მიმართულებით ძალიან აქტიურად ვითანამშრომლეთ ჯანდაცვის სამინისტროსთან და კლინიკებს ერთწლიანი ვადა მისცეს, რათა სახანძრო უსაფრთხოების ნორმები იყოს მოგვარებული და შესაბამისობაში მოყვანილი ახალ სტანდარტებთან“, - აღნიშნა ნინო კიკნაძემ.

ჯანდაცვის ასოციაციის ხელმძღვანელის თქმით, თუ კლინიკები ამ გონივრული ვადის გასვლის შემდეგაც ვერ დააკმაყოფილებენ სტანდარტებს, მაშინ სამედიცინო დაწესებულებებს რეანიმაციული და ქირურგიული განყოფილებების ფუნქციონირების უფლება არ ექნებათ

ნინო კიკნაძე ამბობს, რომ დღეს ამ მხრივ პრობლემები ბევრ კლინიკას აქვს. 

„საუბარია ​ბევრ და საკმაოდ დიდი კლინიკებზე. მაგალითად, რამდენიმე კლინიკა, რომელიც 5 წლის უკან აშენდა და მაშინდელ მოთხოვნებს აკმაყოფილებდა, დღეს უკვე პრობლემები აქვთ“, - აღნიშნა  ჯანდაცვის ასოციაციის ხელმძღვანელმა.  

2020 წლის საქართველოს მთავრობის N385 „სამედიცინო საქმიანობის ლიცენზიისა და სტაციონარული დაწესებულების ნებართვის გაცემის წესისა და პირობების შესახებ დებულებების დამტკიცების თაობაზე“ დადგენილებით, სტაციონარული დაწესებულების საერთო სანებართვო პირობები ითვალისწინებს  ნებართვის მაძიებლის/მფლობელის ვალდებულებას, საევაკუაციო გასასვლელების მდგომარეობისა და რაოდენობის დაკმაყოფილების შესახებ ჰქონდეს და წარადგინოს შესაბამისი ადმინისტრაციული  ორგანოს მიერ გაცემული დოკუმენტი.

შენობა-ნაგებობებთან დაკავშირებული სახანძრო უსაფრთხოების, მათ შორის საევაკუაციო გასასვლელის, დღეს მოქმედი მოთხოვნები დაწესდა 2015 წელს ტექნიკური რეგლამენტით. საგულისხმოა, რომ საქართველოში მოქმედ სტაციონართა დიდი ნაწილი, დაპროექტებულია და აშენებულია 2015 წლამდე, შესაბამისად აღნიშნული რეგლამენტის მიღებამდე, და საევაკუაციო გასასვლელების მდგომარეობისა და რაოდენობის შესახებ, საგანგებო სიტუაციების მართვის სამსახურის დღეს მოქმედი ახალი პრაქტიკის ჩამოყალიბებამდე; აღნიშნული მიზეზის გამო, საევაკუაციო გასასვლელების მდგომარეობისა და რაოდენობის დაკმაყოფილების შესახებ შესაბამისი ნორმების დამტკიცების შემდეგ, ბევრ სტაციონარულ დაწესებულებას შეექმნა პრობლემა.

ჯანდაცვის სამინისტროსთან და რეგულირების დეპარტამენტთან აქტიური თანამშრომლობით,  სამედიცინო დაწესებულებებს მიეცათ გონივრული ვადა, არსებული საევაკუაციო გასასვლელების შესაბამისობაში მოიყვანონ დღეს მოქმედ კანონმდებლობასთან.