რეგიონებში ფინანსური განათლების გავრცელების პროექტის ფარგლებში ფინედუს ტრენერთა მომზადების პირველი ეტაპი დასრულდა
საქართველოს ეროვნული ბანკის ფინანსური განათლების პლატფორმა „ფინედუმ“ რეგიონში მცხოვრები ტრენერების მომზადების პირველი ეტაპი წარმატებით დაასრულა.
2024 წლის 11-13 ნოემბერს სამცხე-ჯავახეთის, ქვემო ქართლის, შიდა ქართლის, კახეთის, იმერეთის, გურიის, სამეგრელოსა და რაჭა-ლეჩხუმის 18-მა წარმომადგენელმა სპეციალური ტრენერთა ტრენინგი გაიარა. მონაწილეები სამი დღის განმავლობაში გაეცნენ ტრენერისთვის საჭირო უნარ-ჩვევებს, სასწავლო პროცესის წარმართვის ტექნიკებსა და მეთოდოლოგიებს, ინტერაქციული ტრენინგის ფარგლებში, მონაწილეებმა ასევე მიიღეს ინფორმაცია ფინანსური განათლების კონკრეტული თემატიკის და მათი სასწავლო პროცესში ინტეგრირების შესახებ. პროექტის მომდევნო ეტაპზე პოტენციური ტრენერები ფინედუს მიერ ორგანიზებული საჩვენებელ ტრენინგებს ჩაატარებენ. ტრენინგების ხარისხის შეფასების შედეგად შეირჩევა ფინედუს 8 ტრენერი, რომლებიც საკუთარ რეგიონებში მცხოვრები მოსახლეობისთვის 2025 წლის განმავლობაში 80-მდე საგანმანათლებლო შეხვედრას ჩაატარებენ.
შერჩეული ტრენერების ფინანსური განათლების საკითხებში გადამზადება 2024 წლის დეკემბერში, ხოლო რეგიონებში მოსახლეობის ტრენინგების ჩატარება 2025 წლის ოქტომბრის ბოლოს დასრულდება.
ფინანსური განათლების გავრცელების მდგრადობის უზრუნველსაყოფად საქართველოს ეროვნული ბანკის ფინანსური განათლების პლატფორმა - "ფინედუ" მხარდამჭერ პარტნიორთან, სს "საქართველოს ბანკთან ერთად ფინანსური განათლების გამავრცელებელი ანაზღაურებადი ტრენერების შერჩევა-გადამზადების პროექტს სახელწოდებით "ფინედუს ტრენერი" ახორციელებს.
პროექტში მონაწილეობა რეგიონში მცხოვრებ ნებისმიერ სრულწლოვან პირს შეეძლო, რომელსაც ფორმალური ან არაფორმალური სწავლების გამოცდილება ჰქონდათ. სულ დაინტერესება 140-მა კანდიდატმა გამოთქვა, საიდანაც პირველ ეტაპზე 20-მდე მონაწილე გადავიდა. კანდიდატების შერჩევისას, სხვა კრიტერიუმებთან ერთად, უპირატესობა მიენიჭა საზღვრისპირა და მაღალმთიანი რეგიონის მაცხოვრებელ მონაწილეებს.
სხვა სიახლეები
08.10.2025.10:34
საქართველოს ეროვნულის ბანკის ვიცე-პრეზიდენტმა ნინო ჯელაძემ, სარაევოში OECD/INFE-ის მიერ ორგანიზებულ ფინანსური განათლების საერთაშორისო კონფერენციაში მიიღო მონაწილეობა.
წლევანდელი ღონისძიების მასპინძელი ქვეყანა ბოსნია და ჰერცოგოვინაა.
კონფერენციაში, რომლის სახელწოდებაა - „ფინანსური განათლების ტენდენციები და გამოწვევები“ - მონაწილეობდნენ სსფ-ის ნიდერლანდის ჯგუფის წევრი ქვეყნების რეგიონული ცენტრალური ბანკების პრეზიდენტები და ვიცე-პრეზიდენტები. მათ შორის, ხორვატიის ეროვნული ბანკის ვიცე-პრეზიდენტი ბოიან ფრასი, მაკედონიის რესპუბლიკის ეროვნული ბანკის პრეზიდენტი ტრაიკო სლავესკი, მოლდოვას ეროვნული ბანკის პრეზიდენტი ანკა დრაგუ და ბოსნია და ჰერცოგოვინას ცენტრალური ბაკის პრეზიდენტი ჯასმინა სელიმოვიჩი.
ეროვნული ბანკის ვიცე-პრეზიდენტმა კონფერენციის ფარგლებში გამართულ პანელურ დისკუსიაში - „ფინანსური განათლების მნიშვნელობა ძლიერი ეკონომიკური ზრდისთვის“ ვრცლად ისაუბრა ფინანსური განათლების მნიშვნელოვან როლზე მდგრადი და ინკლუზიური ეკონომიკური ზრდის მისაღწევად. ნინო ჯელაძემ პანელური დისკუსიის მონაწილეებს გაუზიარა ფინანსური განათლების სტრატეგიის განხორციელების ქართული გამოცდილება, რომელიც განსაკუთრებულ ყურადღებას ამახვილებს ქალებისა და მეწარმეების როლის გაძლიერებაზე ისეთი ინიციატივების საშუალებით, როგორიცა სებ-ის ფინანსური განთლების პლატფორმა Finedu და მიზნობრივი პროგრამები, მათ შორის, „Finedu ქალებისთვის“.
(ნინო ჯელაძე მოლდოვას და ბოსნია და ჰერცოგოვინას ცენტრალური ბაკნების პრეზიდენტებთან)
„ეროვნული ბანკის ძალისხმევით ქვეყანას 2016 წლიდან აქვს ფინანსური განათლების სტრატეგია, რომელიც 2023 წელს განახლდა და ქალების სეგმენტი ერთ-ერთ მთავარ მიმართულებად განისაზღვრა. ჩვენი გამოცდილება გვიჩვენებს, რომ ფინანსური განათლება ყველაზე დიდ შედეგს მაშინ იძლევა, როდესაც საჯარო და კერძო სექტორი ერთად მუშაობს. ამ თანამშრომლობით ფინანსური განათლება იქცევა არა მხოლოდ ცნობიერების ამაღლების, არამედ რეალური შესაძლებლობების გამაძლიერებელ ფაქტორად. ფინანსური განათლება რჩება ეროვნული ბანკის ერთ-ერთ პრიორიტეტულ მიმართულებად, ამიტომ ჩვენს ევროპელ კოლეგებთან ერთად გავაგრძელებთ მუშაობას ეფექტური და შედეგიანი აქტივობებისათვის, რაც ჩვენი ქვეყნის ფინანსური და ეკონომიკური მდგრადობის ერთ-ერთი წინაპირობაა“, - აღნიშნა მან.
კონფერენციის ფარგლებში ეროვნული ბანკის ფინანსური განათლების მიმართულების წარმომადგენლებმა მონაწილეობა მიიღეს სამუშაო შეხვედრებში და კოლეგებს საქართველოს გამოცდილება გაუზიარეს.
სებ-ის დელეგაციის შემადგენლობაში შედიოდნენ ეროვნული ბანკის საბჭოს წევრი თეიმურაზ ხომერიკი და სებ-ის ფინანსური განათლების და სტრატეგიული განვითარების დეპარტამენტის წარმომადგენლები.
საერთაშორისო კონფერენცია ნიდერლანდების სამეფოს ფინანსთა სამინისტროსა და ეკონომიკური განვითარებისა და თანამშრომლობის ორგანიზაციის ფინანსური განათლების საერთაშორისო ქსელის (OECD/INFE) ტექნიკური დახმარების პროექტის ფარგლებში, ბოსნია და ჰერცოგოვინას ეროვნული ბანკის თანაორგანიზებით გაიმართა.
აღსანიშნავია, რომ ტექნიკური დახმარების პროექტი საქართველოსთან ერთად, სამხრეთ-აღმოსავლეთ ევროპის 9 ქვეყანას აერთიანებს და რეგიონში ფინანსური განათლების ამაღლების ხელშეწყობას ისახავს მიზნად.