თბილისში იმართება სამედიცინო განათლების ორდღიანი საერთაშორისო კონფერენცია - “ECCES 2026”, რომლის გახსნაში მონაწილეობა მიიღეს განათლების, მეცნიერებისა და ახალგაზრდობის მინისტრმა გივი მიქანაძემ და ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა მიხეილ სარჯველაძემ.

გივი მიქანაძემ სიტყვით გამოსვლისას სამედიცინო განათლების ხარისხის უზრუნველყოფის მნიშვნელობაზე, ამ მიმართულებით საერთაშორისო თანამშრომლობის გაძლიერების აუცილებლობასა და საქართველოში სამედიცინო განათლების განვითარებაში კენ ვოლკერის მიერ შეტანილ წვლილზე ისაუბრა.

მინისტრმა ყურადღება გაამახვილა სამედიცინო განათლების ხარისხის უზრუნველყოფის მიმართულებით საქართველოს მიღწევებზე. როგორც მან აღნიშნა, 2018 წელს განათლების ხარისხის განვითარების ეროვნულმა ცენტრმა სამედიცინო განათლების მსოფლიო ფედერაციის (WFME) აღიარება ათი წლის ვადით მოიპოვა, რაც მნიშვნელოვანი წინგადადგმული ნაბიჯია საქართველოს სამედიცინო განათლების აკრედიტაციის სისტემის განვითარებისა და ქართული სამედიცინო პროგრამების კურსდამთავრებულთა საერთაშორისო მობილობის ხელშეწყობისთვის.

კონფერენციის მონაწილეებს მისასალმებელი სიტყვით მიმართეს ჯანდაცვის მინისტრმა მიხეილ სარჯველაძემ, კენ ვოლკერის საერთაშორისო უნივერსიტეტის რექტორმა ეკა ეკალაძემ, თბილისის სახელმწიფო სამედიცინო უნივერსიტეტის რექტორმა ირაკლი ნატროშვილმა.

ორდღიანი კონფერენცია თემაზე – „სამედიცინო განათლების განვითარება: ინტერნაციონალიზაცია, ინოვაცია და აკადემიური წარმატება“ – ემორის უნივერსიტეტის მედიცინისა და ნევროლოგიის პროფესორის, დოქტორ კენ ვოლკერის დაბადებიდან 90 წლის იუბილეს ეძღვნება.

კონფერენციის ფარგლებში მონაწილეები იმსჯელებენ სამედიცინო განათლების ხარისხის გაუმჯობესებაზე, საერთაშორისო თანამშრომლობის გაძლიერებაზე, სწავლების ინოვაციურ მიდგომებზე, ხელოვნური ინტელექტის გამოყენებაზე სასწავლო პროცესში და სტუდენტთა აკადემიური წარმატების ხელშეწყობაზე.

კონფერენციის პროგრამა მოიცავს ძირითად მოხსენებებს, პანელურ დისკუსიებს, სამეცნიერო პრეზენტაციებს, სტუდენტთა კვლევითი ნამუშევრების გამოფენას, ინტერაქციულ სამუშაო შეხვედრებს და კლინიკურ მასტერკლასებს.

საერთაშორისო კონფერენცია მიზნად ისახავს გამოცდილების გაზიარებისა და ახალი აკადემიური კავშირების ჩამოყალიბების შესაძლებლობის შექმნას და ხელს შეუწყობს საერთაშორისო პარტნიორობის განვითარებასა და სამედიცინო განათლების თანამედროვე სტანდარტების დანერგვას.

ღონისძიებაში მონაწილეობენ ემორის უნივერსიტეტის პროფესორები, სამედიცინო განათლების საერთაშორისო და ადგილობრივი ექსპერტები, უნივერსიტეტების ხელმძღვანელები, პროფესორები, მკვლევრები, სტუდენტები და პარტნიორი ინსტიტუციების წარმომადგენლებს.