„ჩვენ ვცხოვრობთ ეპოქაში, როდესაც კაცობრიობის მეცნიერული და ტექნოლოგიური შესაძლებლობები უპრეცედენტო სიმაღლეებს აღწევს, თუმცა მშვიდობისა და თანაცხოვრების საკითხები კვლავ უდიდეს გამოწვევებად რჩება. სწორედ ამიტომ განსაკუთრებულ მნიშვნელობას იძენს საუნივერსიტეტო დიპლომატია - უნივერსიტეტის როლი იქ, სადაც ტრადიციული დიპლომატიის შესაძლებლობები შეზღუდულია, პოლიტიკური დიალოგი შეწყვეტილი, ხოლო საზოგადოებებს შორის ნდობა შერყეული. ნება მომეცით, გაგიზიაროთ საქართველოს ტექნიკური უნივერსიტეტის გამოცდილება: 2022 წელს, უკრაინაში ფართომასშტაბიანი ომის დაწყების პირველივე თვეებში, უკიდურესად მძიმე და სახიფათო ვითარებაში, სტუ-ის რექტორი, აკადემიკოსი დავით გურგენიძე, სტუდენტური თვითმმართველობის პრეზიდენტთან ერთად, უკრაინაში გაემგზავრა. კიევის, ოდესისა და ლუცკის უნივერსიტეტებში ვიზიტისას ისინი შეხვდნენ უკრაინის განათლებისა და მეცნიერების მინისტრს, უნივერსიტეტების ხელმძღვანელებს, პროფესორებსა და სტუდენტებს. ეს იყო არა უბრალოდ ოფიციალური ვიზიტი, არამედ აკადემიური სოლიდარობისა და ადამიანური თანადგომის გამოხატულება გზავნილით: „თქვენ მარტო არ ხართ - აკადემიური საზოგადოება თქვენ გვერდით დგას“. ამავე პერიოდში სტუ-ის სტამბაში უსასყიდლოდ დაიბეჭდა უკრაინულენოვანი სასკოლო სახელმძღვანელოები საქართველოში თავშეფარებული უკრაინელი ბავშვებისთვის. ეს ინიციატივა გაცილებით მეტი იყო, ვიდრე საგანმანათლებლო დახმარება - ეს იყო ბავშვების იდენტობის, ღირსებისა და მომავლის შენარჩუნების მხარდაჭერა. საუნივერსიტეტო დიპლომატიის კიდევ ერთი უმნიშვნელოვანესი ასპექტი მეცნიერების საერთაშორისო ხასიათია. თუ დღეს მეცნიერებს ავუკრძალავთ ერთმანეთთან საუბარს და თანამშრომლობას, ხვალ ვინ აღადგენს დანგრეულ ხიდებს და ვინ დაიწყებს დიალოგს, როდესაც ამის აუცილებლობა დადგება? ამ საკითხის მნიშვნელობას განსაკუთრებით კარგად ვაცნობიერებთ საქართველოში - ქვეყანაში, რომლის ტერიტორიების ნაწილი დღემდე ოკუპირებულია. მიუხედავად პოლიტიკური დიალოგის ფაქტობრივი შეჩერებისა, საქართველოს ტექნიკური უნივერსიტეტი ცდილობს საოკუპაციო ხაზს მიღმა მცხოვრები ჩვენი თანამოქალაქეები მაქსიმალურად ჩართოს საუნივერსიტეტო ცხოვრებაში, საგანმანათლებლო და სამეცნიერო საქმიანობაში. აკადემიური კავშირებისა და თანამშრომლობის შენარჩუნება ნდობის აღდგენისა და მშვიდობისკენ მიმავალი გზის საფუძველია“, - ამის შესახებ საქართველოს ტექნიკური უნივერსიტეტის ვიცე-რექტორმა, პროფესორმა თამარ ლომინაძემ საერთაშორისო კონგრესზე განაცხადა.
საქართველოს ტექნიკური უნივერსიტეტის ვიცე-რექტორი, პროფესორი თამარ ლომინაძე მონაწილეობს შავი ზღვის უნივერსიტეტების ქსელის (Black Sea Universities Network – BSUN) კონგრესში, რომლის ფარგლებშიც საერთაშორისო კონფერენცია თემაზე - „მომავლის უნივერსიტეტი“ (University of Tomorrow) 5–6 ნოემბერს, მოლდოვის დედაქალაქ კიშინიოვში, მოლდოვის ტექნიკურ უნივერსიტეტში (Technical University of Moldova) გაიმართა და უმაღლესი განათლების განვითარების, უნივერსიტეტების ტრანსფორმაციის, ხელოვნური ინტელექტისა და საერთაშორისო აკადემიური თანამშრომლობის აქტუალურ საკითხებს მიეძღვნა.

ინფორმაციას საქართველოს ტექნიკური უნივერსიტეტი ავრცელებს.

მისივე ცნობით, საერთაშორისო კონგრესი შავი ზღვის რეგიონისა და ევროპის უმაღლესი საგანმანათლებლო დაწესებულებების წარმომადგენლებს, განათლების სფეროს ექსპერტებსა და საერთაშორისო ორგანიზაციების წარმომადგენლებს აერთიანებს. ღონისძიებაში შვიდი ქვეყნის წარმომადგენლები მონაწილეობენ. კონგრესის მიზანია უმაღლესი განათლების განვითარების თანამედროვე ტენდენციების გაანალიზება, მომავლის უნივერსიტეტის კონცეფციის ჩამოყალიბება და რეგიონული თუ საერთაშორისო აკადემიური თანამშრომლობის ახალი შესაძლებლობების განსაზღვრა.

პროფესორმა თამარ ლომინაძემ კონგრესის პირველი დღის პლენარულ სესიაში, სადაც უნივერსიტეტების როლი ახალ რეგიონულ და გლობალურ კონტექსტში განიხილეს, მიიღო მონაწილეობა და კონგრესის მონაწილეებს სიტყვით მიმართა. სტუ-ის ვიცე-რექტორი უნივერსიტეტის რექტორის, აკადემიკოს დავით გურგენიძის სახელით, მიესალმა საერთაშორისო კონგრესის მონაწილეებს და მათ წარმატებული მუშაობა უსურვა.
„კონგრესის ფარგლებში დაგეგმილია საერთაშორისო აკადემიური ქსელებისა და ევროპული საუნივერსიტეტო ალიანსების წარმომადგენლებთან შეხვედრები, მათ შორის ევროპული უნივერსიტეტების ასოციაციის (EUA), UNICA-სა და სხვა საერთაშორისო საგანმანათლებლო გაერთიანებების მონაწილეობით. ღონისძიების მეორე დღეს ასევე გაიმართება BSUN-ის გენერალური ასამბლეა და შავი ზღვის რეგიონის რექტორთა მე-17 კონფერენცია, სადაც ქსელის სამომავლო საქმიანობისა და 2026–2028 წლების პრიორიტეტული მიმართულებების საკითხები განიხილება.
კონფერენციის საერთაშორისო მომხსენებლებს შორის არიან World Academy of Art & Science-ის პრეზიდენტი დოქტორი გარი ჯეიკობსი (Garry Jacobs), World University Consortium-ის პრეზიდენტი დოქტორი ალბერტო ძუკონი (Alberto Zucconi) და ბუქარესტის პოლიტექნიკური უნივერსიტეტის რექტორი, პროფესორი მიჰნეა კოსტოიუ (Mihnea Costoiu).

საქართველოს ტექნიკური უნივერსიტეტისთვის ეს საკითხები განსაკუთრებულ აქტუალობას იძენს. როგორც საინჟინრო-ტექნოლოგიური და სამეცნიერო პროფილის უმაღლესი საგანმანათლებლო დაწესებულება, უნივერსიტეტი მნიშვნელოვან როლს ასრულებს თანამედროვე ტექნოლოგიების, ციფრული ინოვაციებისა და კვლევაზე დაფუძნებული განათლების განვითარებაში. ამ კონტექსტში საერთაშორისო აკადემიურ დიალოგში მონაწილეობა ქმნის შესაძლებლობას, უნივერსიტეტმა გაიზიაროს საერთაშორისო გამოცდილება, წარმოაჩინოს საკუთარი აკადემიური და სამეცნიერო პოტენციალი და გააძლიეროს თანამშრომლობა უცხოელ პარტნიორებთან“, - აცხადებს თამარ ლომინაძე.

სტუ-ის ინფორმაციით, კონფერენციის ცენტრალური თემა იყო ე.წ. University 4.0 - მომავლის უნივერსიტეტის მოდელი, რომელიც გულისხმობს უმაღლესი საგანმანათლებლო დაწესებულების გარდაქმნას ღია, ურთიერთდაკავშირებულ, ინოვაციებზე ორიენტირებულ და საზოგადოებრივ პროცესებში აქტიურად ჩართულ ინსტიტუციად. აღნიშნული კონცეფცია ეფუძნება აკადემიური ტრადიციების შენარჩუნებასა და თანამედროვე ტექნოლოგიების, ციფრული ინსტრუმენტებისა და ხელოვნური ინტელექტის შესაძლებლობების ინტეგრირებას.

კონგრესის დღის წესრიგში განსაკუთრებული ადგილი დაეთმო ხელოვნური ინტელექტის გავლენას განათლებასა და სამეცნიერო კვლევებზე, ციფრულ ტრანსფორმაციას, სწავლებისა და კვლევის ახალი მოდელების განვითარებას, უნივერსიტეტების საერთაშორისო ქსელურ თანამშრომლობას, ბოლონიის პროცესისა და ევროპის უმაღლესი განათლების სივრცის (EHEA) მომავალს. კონგრესის ორგანიზება მოლდოვის განათლებისა და კვლევის სამინისტროს მხარდაჭერით ხორციელდება და იგი დაკავშირებულია 2027 წელს მოლდოვასა და რუმინეთში დაგეგმილი ევროპის უმაღლესი განათლების სივრცის მინისტერიალისა და გლობალური პოლიტიკის ფორუმის მოსამზადებელ ღონისძიებებთან. მინისტერიალი 2027 წლის 26–27 მაისს კიშინიოვსა და იაშში გაიმართება და ევროპის უმაღლესი განათლების სივრცის 46 წევრი ქვეყნის წარმომადგენლებს გააერთიანებს. კონგრესის ერთ-ერთი მნიშვნელოვანი მოსალოდნელი შედეგია University 4.0-ის შესახებ სტრატეგიული პოზიციის დოკუმენტის შემუშავება და მიღება.