ფინანსური პირამიდა | მსოფლიოს მასშტაბით გავრცელებული პირამიდული სქემები

ფინანსური განათლება

ალექსანდრე წულაძემ საერთაშორისო კონფერენციის „განათლება – კეთილდღეობის კატალიზატორი“ გახსნის ცერემონიაში მიიღო მონაწილეობა

25.06.2025.15:07

საქართველოს განათლების მეცნიერებისა და ახალგაზრდობის მინისტრმა ალექსანდრე წულაძემ საერთაშორისო სამეცნიერო კონფერენციის „განათლება – კეთილდღეობის კატალიზატორი“ გახსნის ცერემონიაში მიიღო მონაწილეობა, რომელიც აღმოსავლეთ ევროპის უნივერსიტეტში გაიმართა.

მინისტრმა დამსწრე საზოგადოებას მისასალმებელი სიტყვით მიმართა და საზოგადოების კეთილდღეობის უზრუნველყოფის კუთხით განათლებისა და მეცნიერების მნიშვნელობაზე ისაუბრა.

ალექსანდრე წულაძე: „საქართველოს მთავრობა განათლებასა და მეცნიერებას განიხილავს როგორც ქვეყნის განვითარების სტრატეგიულ ღერძს. ჩვენი ამოცანაა, შევქმნათ სამართლიანი და ხელმისაწვდომი საგანმანათლებლო სისტემა, რომელიც უპასუხებს როგორც თანამედროვე მოთხოვნებს, ისე მომავალი თაობების საჭიროებებს, შექმნის ახალ შესაძლებლობებს ახალგაზრდებისთვის და ხელს შეუწყობს ინოვაციას, კონკურენტუნარიანობას და საზოგადოებრივ კეთილდღეობას.“

სამდღიანი კონფერენციის მიზანია განათლების, როგორც პიროვნული და საზოგადოებრივი კეთილდღეობის მამოძრავებელი ძალის წარმოჩენა და აღნიშნული მიმართულებით უნივერსიტეტების როლის ხაზგასმა. მონაწილეები იმსჯელებენ საზოგადოების კეთილდღეობასთან დაკავშირებული გამოწვევების იდენტიფიცირებასა და გადაჭრის გზებზე.

კონფერენცია ფარავს შემდეგ მიმართულებებს: განათლების, ჯანდაცვისა და სოციალური მეცნიერებები; ეკონომიკა; სამართალი; ციფრული ტრანსფორმაცია; უნივერსიტეტის დანიშნულება და მისია; განათლების ხარისხი.

გახსნის ღონისძიებაში მონაწილეობა ასევე მიიღეს ადგილობრივი, საკანონმდებლო და აღმასრულებელი ხელისუფლების წარმომადგენლებმა.

სამდღიან კონფერენციაში მონაწილეობენ – ცნობილი მეცნიერები, საერთაშორისო ორგანიზაციების – ევროპის უნივერსიტეტების ასოციაციის (EUA); Advance HE (Great Britain); HER (Great Britain) – წარმომადგენლები და პროფესორები ისეთი წარმატებული უნივერსიტეტებიდან, როგორებიცაა – Case Western University; Cleveland University (Ohio); Bremen University; Ashaferburg University; International University of Technology Cologne; Middlesex University (London); Arden University (London); Kings College London; Sorbonne University (Paris); Alicante University; University of Coimbra; Tuscia University; University of Education Upper Austria; University of Warsaw;

კონფერენციის კრებული გამოიცემა როგორც ბეჭდური სახით, ასევე, ნაშრომები გამოქვეყნდება საერთაშორისო მაღალრეიტინგულ ჟურნალში (SprigerBriefs).

კონფერენცია „განათლება – კეთილდღეობის კატალიზატორი“ საქართველოს განათლების, მეცნიერებისა და ახალგაზრდობის სამინისტროს სსიპ განათლების ხარისხის ეროვნული ცენტრის მხარდაჭერითა და აღმოსავლეთ ევროპის უნივერსიტეტის ორგანიზებით იმართება.